8 KAMENA 2022
U BURUSIYA

AMAKURU MASHYA—UMUVANDIMWE YARAREKUWE | Batewe inkunga n’abavandimwe

FUNGURA

Ku itariki ya 10 Ugushyingo 2022, urukiko rw’intara ya Vologda rwatangaje umwanzuro warwo ku bujurire bw’umuvandimwe Yuriy Baranov na Nikolay Stepanov. Igihano Yuriy yari yarahawe mbere kizakomeza. Igifungo gisubitse cy’imyaka ine Nikolay yari yarakatiwe, cyaragabanyijwe kiba imyaka ine. Yahise arekurwa.

Ku itariki ya 5 Nzeri 2022, Urukiko rw’akarere ka Vologodskiy, ruri mu gace ka Vologda rwahamije icyaha Yuriy na Nikolay. Yuriy yakatiwe imyaka ine y’igifungo gisubitse kandi ntibizaba ngombwa ko ajyanwa muri gereza. Naho Nikolay we yakatiwe imyaka ine y’igifungo. Ako kanya yahise ajyanwa muri gereza.

Uko ibintu byagiye bikurikirana

Ku itariki ya 19 Ukuboza 2019

Abashinzwe umutekano bateye imiryango itandatu y’Abahamya ba Yehova bo mu mujyi wa Vologda. Yuriy na Nikolay barafashwe maze bafungwa by’agateganyo
Ku itariki ya 20 Ukuboza 2019

Yuriy yarafunguwe maze ajya gufungirwa mu rugo
Ku itariki ya 23 Ukuboza 2019

Nikolay yakomeje gufungwa by’agateganyo
Ku itariki ya 16 Werurwe 2020

Yuriy yarafunguwe ariko ntiyari yemerewe kuvugana kuri telefone n’abandi bantu bari kumwe mu rubanza kandi ntiyari yemerewe gukoresha telefone na interineti
Ku itariki ya 19 Gicurasi 2020

Umuvandimwe Yuriy yahawe umudendezo
Ku itariki ya 13 Kanama 2020

Nikolay yavanywe muri gereza hanyuma afungirwa mu rugo
Ku itariki ya 25 Nzeri 2020

Nikolay yarafunguwe
Ku itariki ya 7 Werurwe 2022

Urubanza rwaratangiye

Icyo twabavugaho

Yuriy Baranov

Igihe yavukiye: 1952 (Vologda, mu gace ka Vologda)

Ibimuranga: Yakoraga akazi ko gusudira akoresheje gaze n’amashanyarazi. Ubu ari mu kiruhuko cy’izabukuru kandi yita kuri nyina wamugaye ufite imyaka igera kuri 90

Yashakanye na Nadezhda mu mwaka wa 1990

We n’umugore we batangiye kwigana Bibiliya n’Abahamya ba Yehova, nyuma yo gushaka ibisubizo by’ibibazo bikomeye bibazaga. Yabatijwe mu mwaka wa 1994

Ibyo yavuze

Ni ayahe magambo ateye inkunga wabwiwe akagufasha kwihangana?

Abavandimwe na bashiki bacu banyohererezaga udukarita kandi bakampamagara. Ndibuka ko hari umuvandimwe wambwiye ati: “Ibintu byose bigira intangiriro kandi bikagira iherezo.” . . . Hari n’umucungagereza wambwiye ati: “Humura bizagenda neza.” Ntekereza ko Data wo mu ijuru ari we wabakoresheje kugira ngo bantere inkunga. . . . Ibyo byose binyereka ko Yehova ari Data utwitaho.

Nikolay Stepanov

Igihe yavukiye: 1974 (Vologda)

Ibimuranga: Mbere y’uko aba Umuhamya wa Yehova yabaye umusirikare. Akora imirimo ijyanye n’ubwubatsi

Kera ntiyemeraga Imana. Mu mwaka wa 1995, umukobwa w’incuti ye witwaga Alla yatangiye kwigana Bibiliya na mama we. Alla yamufashije kwemera ko Imana ibaho. Bombi babatijwe mu mwaka wa 1996, bashakana mu mwaka wa 1997. Bafite umwana umwe w’umuhungu

Ibyo yavuze

Ni mu buhe buryo abavandimwe na bashiki bacu bagufashije muri ibi bihe bigoye?

Hari igihe nitabye urukiko nsanga mu cyumba cy’urukiko, hari abavandimwe na bashiki bacu bagera nko kuri 50 kandi ibyo byaranshimishije cyane.

Nanone banyohererezaga udukarita kandi bakansengera. Hari mushiki wacu wanyandikiye ikintu kinkora ku mutima. Yaranditse ati: “Muvandimwe nkunda, komeza kugira ubutwari kandi ushikame. Yehova azakomeza kukuba hafi igihe cyose. Twebwe incuti zawe turagusengera kandi tuguhoza ku mutima. Iyo Data wo mu ijuru akwitegereje, arishima iyo abonye ukuntu ukomeza kumubera indahemuka kandi aragukunda.”

Kubona ukuntu abavandimwe na bashiki bacu bakomeza kugira ukwizera nubwo batotezwa, biradukomeza.—1 Abatesalonike 3:7.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU