20 KANAMA 2021 | AMAKURU MASHYA: 28 UGUSHYINGO 2022
U BURUSIYA

AMAKURU MASHYA—URUBANZA RWASOMWE | Yehova akomeje gufasha abavandimwe batatu na mushiki wacu bo muri Dagestan bafunzwe

FUNGURA

Ku Itariki ya 24 Ugushyingo 2022, urukiko rw’akarere ka Kirovskiy mu mugi wa Makhachkala, rwahamije icyaha umuvandimwe Marat Abdulgalimov, Arsen Abdullaev, Anton Dergalev na mushiki wacu Mariya Karpova. Bahawe igifungo gisubitse kiri hagati y’imyaka itandatu n’itandatu n’igice. Ntibizaba ngombwa ko bajyanwa muri gereza.

Uko ibintu yagiye bikurikirana

Ku itariki 27 Gicurasi 2020

Nyuma y’umwaka Marat, Arsen, Anton na Mariya bafunzwe by’agateganyo, bafungishijwe ijisho
Ku itariki 4 Kamena 2019

Urukiko rw’akarere ka Sovetskiy mu mugi wa Makhachkala rwategetse ko bose uko ari bane bafungwa by’agateganyo
Ku itariki ya 1 Kamena 2019

Abasirikare bo mu rwego rushinzwe ubutasi na baporisi b’u Burusiya bigabije ingo 13 z’Abahamya ba Yehova bo muri Dagestan
Ku itariki ya 27 Gicurasi 2019

Abasirikare bo mu rwego rushinzwe ubutasi bo muri Dagestan batangije dosiye y’ikirego cya Marat, Arsen, Anton na Mariya

Icyo twabavugaho

Marat Abdulgalimov

Igihe yavukiye: 1991 (Makhachkala muri Repuburika ya Dagestan)

Ibimuranga: Avukana n’abana batatu. Akunda gukina umupira w’amaguru. Yize ibijyanye no gusudira none ubu akora mu iduka ricuruza inkweto

Kuva akiri muto yakundaga gusoma Bibiliya. Yakundaga kumarana igihe n’abantu bigana Kristo kandi bakunda bagenzi babo. Yabatijwe mu mwaka wa 2013

Ibyo yavuze

Mu gihe kigera k’umwaka wamaze ufunzwe by’agateganyo, ni iki cyagufashije kwihangana?

Najyaga ngereranya imimerere nari ndimo n’iyo Yozefu yabayemo. Nshobora gufungwa imyaka igera ku icumi kandi Yozefu we yafunzwe igera kuri 13. Nubwo mpanganye n’ibibazo, Yehova azamfasha nkomeze kumubera indahemuka. Niboneraga uko Yehova yasubizaga amasengesho yange kandi byatumaga mwikoreza imihangayiko yange yose. Zaburi ya 55:22 yamfashije kwihanganira iki kigeragezo. Uwo murongo utwizeza ko nitwikoreza Yehova imihangayiko yacu azadushyigikira. Nange ni byo nakoze.

Arsen Abdullaev

Igihe yavukiye: 1979 (Kasumkent muri Repuburika ya Dagestan)

Ibimuranga: Kuva akiri muto yakundaga gukina vole no gusoma ibitabo. Yabonye impamyabumenyi mu bijyanye no kwenga divayi. Yakoraga mu bijyanye no gusana ibyuma bishyushya amazi

Nubwo ababyeyi be babanje kumurwanya, yabatijwe mu mwaka wa 2000. Yashakanye na Suat. Bafite umwana w’umuhungu

Ibyo yavuze

Ni iki cyagufashije kudacika intege igihe wari ufunzwe by’agateganyo?

Indirimbo zacu zaramfashije cyane. Nakundaga kuziririmba kandi zatumaga numva merewe neza. Imwe mu ndirimbo nkunda ni iya 45, ifite umutwe uvuga ngo “Ibyo umutima wanjye utekereza.” Hari igihe numvaga nacitse intege, naniwe kandi numva nta kintu nshaka gukora. Icyakora nakoraga uko nshoboye kose nkikuramo ibyo bitekerezo. Icyo gihe naribwiraga nti: ‘Humura, ejo uzaramuka neza kandi ibyo bitekerezo biguca intege ufite ubu bizaba byagiye. Komera, umuryango wawe n’abavandimwe na bashiki bawe baragukeneye.’

Anton Dergalev

Igihe yavukiye: 1985 (Rostov-on-Don, mu gace ka Rostov )

Ibimuranga: Anton n’umuvandimwe we barezwe na nyina gusa. Nyina na nyirakuru bamwigishije gukunda amahame yo muri Bibiliya. Yakoze mu bijyanye n’amashanyarazi no gukora ubusitani. Yabatijwe mu mwaka wa 2002

Ibyo yavuze

Ni mu buhe buryo Yehova yagufashije muri iki kigeragezo?

Abavandimwe na bashiki bacu bakoze ibishoboka byose ngo batwiteho. Umwe mu bo twari dufunganywe yambwiye ko nyuma y’amezi make inshuti zanjye zitari kugira icyo zongera kunyoherereza. Icyakora yatangajwe no kubona ko bakomeje kunyohereza impano na nyuma y’amezi atandatu kugera hafi ku mwaka!

Ni izihe nama wagira abandi zabafasha kwitegura ibitotezo bashobora guhura na byo?

Nabagira inama yo kutirengagiza amateraniro. Amateraniro ni kimwe mu bintu nkumbuye cyane. Nanone nabagira inama yo gukoresha ibintu byose Yehova adutegurira. Bagakomeza kuba inshuti ya Yehova kandi ntibagire icyo batinya kuko Yehova adushyigikiye!

Mariya Karpova

Igihe yavukiye: 1980 (Magadan, mu gace ka Magadan)

Ibimuranga: Avukana n’abandi bana babiri. Akunda guserebeka ku rubura, gutembera no gusoma. Yarangije muri kaminuza yigisha ubuvuzi bw’amatungo

Yabonye muri Bibiliya ibisubizo bimunyuze by’ibibazo yibazaga ku gihe kizaza, maze yiyemeza kuba Umuhamya wa Yehova. Yabatijwe mu mwaka wa 1998

Ibyo yavuze

Ni iki cyatumye udaheranwa n’imihangayiko igihe wari ufunzwe by’agateganyo?

Najyaga nibuka imirongo yo muri Bibiliya maze nkayandika mu gakaye. Iyo mirongo yaramfashije cyane mu gihe cy’amezi atatu namaze ntafite Bibiliya. Amagambo yo mu Bafilipi 4:6, 7 yarankomeje cyane. Iyo natangiraga guhangayika nahitaga ndambura agakaye kange, ngasoma uwo murongo, maze nkatekereza nti: ‘Ntihakagire ikintu kiguhangayikisha.’ Nahitaga numva meze neza.

Ni iki kikwemeza ko Yehova yagufashije muri icyo kigeragezo?

Igihe nari mfunzwe by’agateganyo, Yehova yamfashije kwihanganira urupfu rwa Data. Inkuru y’uko yapfuye, ahubwo nayibwiwe na mama igihe banyemereraga ko tuvugana kuri terefone. Nanone inshuti zange ebyiri ni zo zitaga kuri mama. Zajyaga kumusura kandi zaramufashije mu gihe cyo gushyingura. Abavandimwe na bashiki bacu ntibigeze batererana mama. Baramuhamagaraga, bakamwandikira amabaruwa, bakamwoherereza udukarita kandi bakamuha n’ibindi bintu yabaga akeneye kugira ngo aze mu rubanza rwange.

Twiringiye ko Yehova azakora ibihuje n’izina rye, akaba icyo ashaka kuba cyo cyose, kugira ngo arinde kandi yite ku bagaragu be.—Kuva 3:14.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU