5 KANAMA 2021
U BURUSIYA

AMAKURU MASHYA | Umuvandimwe Dmitriy Terebilov ashobora gufungwa ku nshuro ya gatanu ariko ubu bwo azaba azira idini rye

FUNGURA

Ku itariki ya 22 Nzeri 2022, urugereko rwa kabiri rw’urukiko rusesa imanza rwanze ubujurire bw’umuvandimwe Dmitriy Terebilov. Aracyafunzwe.

Ku itariki ya 12 Mutarama 2022, urukiko rw’intara ya Kostroma Regional rwanze ubujurire bwa DmitriyTerebilov.

Uko ibintu byagiye bikurikirana

Ku itariki ya 6 Nzeri 2021

Urukiko rw’akarere ka Sverdlovskiy mu mugi wa Kostroma rwakatiye umuvandimwe Dmitriy Terebilov igifungo k’imyaka itatu. Yahise ajyanwa muri gereza urubanza rukimara kurangira
Ku itariki ya 8 Nzeri 2020

Ni bwo urubanza rwa Dmitriy rwatangiye
Ku itariki ya 25 Gicurasi 2020

Dmitriy yatangiye gukurikiranwaho ibyaha ku mugaragaro kandi yabujijwe kuva mu gace atuyemo
Ku itariki ya 19 Nzeri 2019

Konti zo muri banki za Dmitriy zarahagaritswe, ntiyemerewe kuzikoresha
Ku itariki ya 13 Kamena 2019

Ni bwo ikirego cyo gushinja Dmitriy cyatangijwe. Ashinjwa gutanga ibitabo byabuzanyijwe no kwifatanya mu materaniro y’umuryango waciwe mu Burusiya
Ku itariki ya 25 Nyakanga 2018

Dmitriy n’umugore we bavuye mu ikoraniro ryari ryabereye muri Morudaviya basanze inzu yabo barayisatse. Bakigera mu rugo abayobozi barabafashe kandi babahata ibibazo

Icyo twamuvugaho

Dmitriy Terebilov

Igihe yavukiye: 1980 (Kostroma)

Ibimuranga: Yapfushije nyina akiri muto. Akiri umwana yakundaga imikino y’iteramakofe. Yafunzwe inshuro enye azira ibiyobyabwenge

Yatangiye kwiga Bibiliya mu mwaka wa 2010, icyo gihe yigaga akoresheje amabaruwa kuko yari muri gereza. Yarekuwe mu mwaka wa 2013. Yabatijwe mu mwaka wa 2014. Yashakanye na Irina mu mwaka wa 2015. Bombi bakunda gutembera bagenda n’amaguru, kuzamuka imisozi no kugenda ku magare

Ibyo yavuze

Wamenyanye ute n’Abahamya ba Yehova?

Nabamenye igihe nari ndi muri gereza ku nshuro ya kane, icyo gihe nari mfunzwe nzira gukoresha ibiyobyabwenge. Muri Kanama 2010, nakiriye ibaruwa ya mbere yari yanditswe n’umuvandimwe wo mu gace ka Udmurtia. Imyaka yose namaze mfunzwe uwo muvandimwe yaramfashije cyane, yanyandikiraga amabaruwa kandi akanyoherereza ibitabo. Na n’ubu ni inshuti yange magara.

Ku itariki ya 21 Kamena 2013 narangije igihano cyange nuko ndafungurwa. Nimukiye i Kostroma kandi nshakisha Abahamya ba Yehova.

Ni iki cyagufashije kugira ibyishimo kandi ntuheranwe n’imihangayiko?

Mu mwaka wa 2018 nateranye ikoraniro rifite umutwe uvuga ngo: “Gira ubutwari.” Tukiva mu ikoraniro twahise dutangira gushyira mu bikorwa ibyo twari twize. . . . Nibuka ko igihe twageraga mu rugo bamaze kuduhata ibibazo, nyuma yo gusaka inzu yacu ku nshuro ya kabiri, twahasanze abavandimwe na bashiki bacu benshi. Bari baje kutureba, bakimara kumva ko badusatse. Ibyo na byo byatweretse ko Yehova aturi hafi.

Wiyumva ute iyo utekereje ko ushobora gufungwa uzira ukwizera kwawe?

Kubera ko nabonye ukuntu Yehova yamfashije igihe cyose, n’uko afasha abavandimwe na bashiki bacu bari muri gereza bazira ukwizera kwabo, nizera ntashidikanya ko nge n’umuryango wange azatwitaho. Navuye muri gereza niyemeje kuba Umuhamya wa Yehova kandi nta kintu cyabihindura.

Mu gihe Dmitriy akomeje kurangwa n’ibyishimo bituruka mu kuba ‘atukwa bamuhora izina rya Kristo’ twizeye ko ‘umwuka w’ikuzo, ni ukuvuga umwuka w’Imana, uzakomeza kuba kuri we.’—1 Petero 4:14.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU