1 MATA 2022
U BURUSIYA

AMAKURU MASHYA | Umuvandimwe Sergey Belousov avuganira izina ry’Imana

FUNGURA

Ku itariki ya 14 Mata, urukiko rwo mu mugi wa Seversk ruherereye mu gace ka Tomsk rwahamije icyaha umuvandimwe Sergey Belousov kandi rumukatira igifungo gisubitse cy’imyaka itatu. Ntibizaba ngombwa ko ajyanwa muri gereza.

Uko ibintu byagiye bikurikirana

Ku itariki ya 14 Nyakanga 2020

Abasirikare b’u Burusiya bo mu rwego rushinzwe ubutasi bigabije ingo zirindwi z’Abahamya harimo n’urwa Sergey. Mu mezi make mbere y’uko bigabiza ingo z’Abahamya, hari umumaneko wiyoberanyije yigira nk’aho ashishikajwe no kwiga Bibiliya. Yagiye afata rwihishwa amajwi y’ibyavugiwe mu materaniro
Ku itariki ya 25 Werurwe 2021

Sergey yatangiye gukurikiranwaho ibyaha
Ku itariki ya 30 Werurwe 2021

Sergey yashinjwe ibyaha hagendewe kuri ya majwi yafashwe mu materaniro. Sergey yarezwe kwifatanya mu materaniro y’idini yabaga hifashishijwe ikoranabuhanga rya videwo, kuririmba no gusenga Yehova

Icyo twamuvugaho

Sergey Belousov

Igihe yavukiye: 1978 (Esil, muri Kazakisitani)

Ibimuranga: Yakuriye mu muryango w’abanyamuzika. Yakoraga akazi mu bijyanye n’amashanyarazi, yanabaye umuyobozi mu nganda zitunganya ibintu biva muri peteroli. Nyuma yakoze mu bijyanye no kwiga imishinga. Yashakanye na Svetlana mu mwaka wa 1999. Bafite umukobwa umwe

Mu mwaka wa 2001, ni bwo yahuye n’Abahamya ba Yehova. Kwiga Bibiliya byatumye amenya izina bwite ry’Imana kandi abona ibisubizo bimunyuze by’ibibazo yibazaga. Yabatijwe mu mwaka wa 2002

Ibyo yavuze

Ni gute abavandimwe na bashiki bacu bakwitayeho wowe n’umuryango wawe?

Abavandimwe na bashiki bacu ntibigeze batwirengagiza. Umunsi wakurikiye uwo badusatseho, abavandimwe na bashiki bacu bahise baza kutureba twe na bene wacu kugira ngo badufashe. Igihe badusakaga ibikoresho byacu byose bya eregitoronike barabifatiriye, ni ukuvuga ko nta Bibiliya twari dufite yo gusoma. Ubwo rero, abo bavandimwe batuzaniye ibikoresho byabo bya eregitoronike kandi byatumye tubona Bibiliya n’ibitabo twari dukeneye ngo dukomeze ukwizera kwacu.

Ni iki cyagufashije kwihangana?

Buri gihe mpora nzirikana ko uko urubanza ruzagenda kose, mu maso ya Yehova twaratsinze. Ikintu cy’ingenzi si ukugira umwavoka ukomeye ahubwo ni ubucuti bukomeye dufitanye na Yehova. Nta kintu kibi twakoze. Birashimishije kuba turiho muri ibi bihe byihariye. . . . Intego yacu ni ukuvuganira ubutegetsi bw’ikirenga bw’Imana. Ntitujya mu rukiko kugira ngo twerekane ko turi abere ahubwo tujyanwa no kuvuganira izina rya Yehova.

Kimwe na Sergey, igihe cyose dusingiza izina rya Yehova, tuba twizeye tudashidikanya ko “azashyira hejuru ihembe ry’ubwoko bwe.”—Zaburi 148:13, 14.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU