27 UKUBOZA 2022 | YAHUJWE N’IGIHE KU ITARIKI YA 27 WERURWE 2023
U BURUSIYA

AMAKURU MASHYA—YACIWE AMANDE | “Iyo duhuye n’ibigeragezo Yehova aradukomeza”

FUNGURA

Ku itariki ya 23 Werurwe 2023, urukiko rw’umujyi wa Apatity ruri mu gace ka Murmansk rwahamije icyaha umuvandimwe Denis Merkulov, kandi rumuca amande y’amafaranga y’u Rwanda asaga 7.100.000.

Icyo twamuvugaho

Denis Merkulov

Igihe yavukiye: 1976 (Kirovsk, mu gace ka Murmansk)

Ibimuranga: Akora akazi ko gusudira n’amashanyarazi

Yahangayikishwaga cyane n’urupfu kubera ko nta muntu warucika. Igihe yiganaga Bibiliya n’Abahamya ba Yehova, yashimishijwe no kumenya umugambi Imana ifitiye abantu. Yabatijwe mu mwaka wa 1995. Yashakanye na Nataliya mu mwaka wa 1998

Ibyo yavuze

Ni iki ibyakubayeho byakwigishije?

Nashimishijwe nuko ibigeragezo nahuye na byo byatumye mba umuntu mwiza. Buri munsi kwiringira Yehova ni byo byamfashije kwihangana. Nakomezaga kwibaza nti: ‘Ni mu rugero rungana iki ngaragaza ko niringira Yehova haba mu myanzuro mfata buri munsi cyangwa mu ntego nishyiriraho? Mara igihe kingana iki nsoma Bibiliya, ntegura amateraniro kandi nifatanya mu murimo wo kubwiriza?’ Iyo hagize ikintu gihinduka mu buzima bwanjye, ikintu cyonyine kigufasha kwihangana kandi ugatuza, ni ubucuti ufitanye na Yehova hamwe n’ukwizera gukomeye.

Ese haba hari umurongo wo muri Bibiliya wagufashije cyane?

Mu ijoro ryabanjirije umunsi bamfasheho, njye n’umugore wanjye, twari twaganiriye ku murongo wo muri Yesaya 41:10. Uwo murongo ugira uti: “Ntutinye kuko ndi kumwe nawe. Ntukebaguze kuko ndi Imana yawe. Nzagukomeza, kandi nzagufasha by’ukuri. Nzakuramiza ukuboko kwanjye kw’iburyo gukiranuka.” Ku munsi ukurikiyeho nafunzwe by’agateganyo, nasubiyemo uwo murongo incuro nyinshi nibwira. Iyo narangizaga kuvuga buri nteruro, narasengaga nkatekereza kuri buri jambo rigize buri nteruro. Ako kanya, nahitaga numva ari nk’aho ayo magambo ari jye Yehova yayabwiye. Ibyo byatumye nibonera ko burya Yehova atatureka ngo duhangane n’ibigeragezo kubera ko dukomeye ahubwo ko iyo duhuye n’ibigeragezo azadufasha tugashikama.

Duhumurizwa no kumenya ko uko ibigeragezo twahura na byo byaba biri kose, ubucuti dufitanye na Yehova no kumwiringira bituma Yehova adufasha ‘tugashikama kandi tugakomera.’—1 Petero 5:10.

Uko ibintu byagiye bikurikirana

Ku itariki ya 21 Nyakanga 2021

Abayobozi basatse ingo 14 z’Abahamya ba Yehova zo mu gace ka Apatity no hafi yaho. Abaporisi bo mu rwego rushinzwe ubutasi binjiye ku ngufu mu nzu ya Merkulov kandi bafata uwo mugabo n’umugore we bajya kubahata ibibazo. Babarekuye saa kumi za mu gitondo ku munsi ukurikiyeho
Ku itariki ya 22 Nyakanga 2021

Abayobozi basabye Denis kwitaba mu biro by’ubushinjacyaha. Bamufunze by’agateganyo
Ku itariki ya 23 Nyakanga 2021

Yararekuwe maze afungishwa ijisho
Ku itariki ya 17 Nzeri 2021

Yavaniweho gufungishwa ijisho ashyirirwaho kutarenga agace atuyemo
Ku itariki ya 15 Nyakanga 2022

Abayobozi bamushinje gutegura ibikorwa by’umuryango ushinjwa ubutagondwa azira gusenga Yehova no kuririmba indirimbo zo gusingiza Imana
Ku itariki ya 20 Nzeri 2022

Ni bwo urubanza rwatangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU