28 UGUSHYINGO 20222022 | YAHUJWE N’IGIHE KU ITARIKI YA 27 MATA 2023
U BURUSIYA

AMAKURU MASHYA—YACIWE AMANDE | Kwiringira Yehova byatumye abavandimwe bakomeza gutuza

FUNGURA

Ku itariki ya 26 Mata 2023, urukiko rw’akarere ka Leninskiy ruherereye mu gace ka Nizhny Novgorod rwahamije icyaha umuvandimwe Oleg Konshin, Sergey Malyanov, Roman Zhivolupov na mushiki wacu Svetlana Malyanova, akaba ari umukobwa wa Sergey. Urwo rukiko rwabaciye amande ari hagati y’amafaranga arenga 6.080.000 FRW kugeza ku mafaranga 9.450.000 FRW.

Icyo twabavugaho

Sergey Malyanov

Igihe yavukiye: 1969 (Nizhny Novgorod, mu gace ka Nizhny Novgorod)

Ibimuranga: Kuva akiri muto yatojwe gukora siporo yo ku rubura. Yazengurutse u Burusiya n’ibindi bihugu ari kumwe n’itsinda ry’abantu b’i Moscow baserebeka ku rubura. Afite umukobwa witwa Svetlana, na we bari kumwe muri uru rubanza

Yatangiye kwiga Bibiliya igihe umwe mu bo bari kumwe muri rya tsinda yamuhuzaga n’Abahamya ba Yehova. Yakundaga kujya mu materaniro ahantu hatandukanye, kubera ko yabaga ari kumwe na rya tsinda bagiye mu mikino. Urukundo n’ubumwe yabonaga mu bagaragu ba Yehova byamukoze ku mutima. Yabatijwe mu mwaka wa 1998

Ibyo yavuze

Wowe n’umukobwa wawe mwagiye mufashanya mute muri ibi bihe bigoye?

Igihe bajyaga kumpata ibibazo bwa mbere, umushinjacyaha yanshyizeho iterabwoba. Yambwiraga ibintu byari kutubaho njye n’umukobwa wanjye, iyo ndamuka nanze gukorana nabo neza no gusinya urupapuro rwemeza ko ibyo nshinjwa ari ukuri. Kugira ngo barusheho kudutera ubwoba, hari ubwo njye n’umukobwa wanjye bakoraga ku buryo buri wese ari bunyure, aho undi ari bunyure agiye mu biro by’ubugenzacyaha. Ntekereza ko bibwiraga ko kubonana byari gutuma ducika intege maze tukareka ibyo twiyemeje. Icyakora ibyo batekerezaga si ko byagenze. Ahubwo muri icyo gihe gito twahuraga byatumaga duterana inkunga kandi buri wese akizeza undi ko Yehova azadufasha. Aho kugira ngo bintere ubwoba, kubona ukuntu umukobwa wanjye yabaga ashikamye kandi yari yemeje gukomeza kubera Yehova indahemuka byarankomezaga. Nashoboye kubasobanurira ko ibyo badukorera byose, ntashoboraga gusinya urwandiko rwemeza ko ibyo nshinjwa ari ukuri.

Svetlana Malyanova

Igihe yavukiye: 1996 (Nizhny Novgorod)

Ibimuranga: Akunda ubusizi, gusoma no kuririmba. Yigisha Icyongereza n’Igifaransa

Yatangiye kwiga ibyerekeye Yehova akiri muto. Papa we witwa Sergey ni we wamwigishaga. Yabatijwe mu mwaka wa 2016 afite imyaka 20

Ibyo yavuze

Ni gute ibyakubayeho byateye inkunga abandi?

Ndwaye indwara yo guhangayika, ubwo rero igihe batangiraga gufata abavandimwe na bashiki bacu bakabafunga, nibazaga niba nanjye nabasha kwihanganira ibyo bitotezo. Igihe byambagaho, abapolisi bakinjira iwacu nahise ntangira gusenga. Nari nzi ko Yehova wenyine ari we nari kwishingikirizaho. Ndetse n’igihe banshyiragaho igitutu, bampata ibibazo natunguwe cyane n’ukuntu nabashije kwihangana, kuko Yehova yamfashije. Rimwe na rimwe hari igihe umuvandimwe cyangwa mushiki wacu avuga ati: “Niba Svetlana yarihanganye, nanjye nabishobora!”

Abavandimwe na bashiki bacu bakomeje kuba indahemuka nubwo batoteza, ni igihamya igaragaza ko ‘abiringira Yehova’ bazagira ‘ubutwari n’umutima ukomeye’.—Zaburi 27:14.

Uko ibintu byagiye bikurikirana

Ku itariki ya 7 Gashyantare 2019

Umucamanza yemereye polisi kugenzura abo Sergey avugisha kuri telefone n’abo bandikirana ku bikoresho by’ikoranabuhanga
Ku itariki ya 16-17 Nyakanga 2019

Polisi yasatse ingo 31 z’imiryango y’Abahamya ba Yehova bo mu gace ka Nizhny Novgorod no mu mugi wa Nizhny Novgorod. Oleg, Sergey na Svetlana barafashwe bajyanwa mu kigo gifungirwamo abantu by’agateganyo. Bahise batangira gukurikiranwa mu nkiko
Ku itariki ya 18 Nyakanga 2019

Oleg, Sergey na Svetlana bari bafunzwe by’agateganyo bararekuwe. Urukiko rwategetse ko bombi batemerewe kurenga agace batuyemo, kuvugana cyangwa gukoresha interineti
Ku itariki ya 24 Kanama 2021

Roman yatangiye gukurikiranwa mu nkiko ashinjwa kwifatanya mu bikorwa by’umuryango ushinjwa ubutagondwa kandi yabujijwe kurenga mu gace atuyemo
Ku itariki ya 3 Werurwe 2022

Ni bwo urubanza rwatangiye

a Igihe twateguraga iyi nkuru nta bwo twabashije kubona ifoto y’umuvandimwe Roman Zhivolupov.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU