13 Kanama 2021 | YAHUJWE N’IGIHE KU ITARIKI YA 6 WERURWE 2023
U BURUSIYA

AMAKURU MASHYA—YAGABANYIRIJE IGIFUNGO | Umuvandimwe Baranov na Li bakomeje gutuza no kwiringira Yehova

FUNGURA

Ku itariki ya 1 Werurwe 2023, urukiko rwo mu gace ka Khabarovsk rwagabanyirije igifungo umuvandimwe Yegor Baranov. Nyuma yo kujurira, igifungo cye bakigize imyaka ine n’igice isubitse. Ntibizaba ngombwa ko ajyanwa muri gereza.

Ku itariki ya 6 Kamena 2022, urukiko rw’akarere ka Vyazemskiy ruherereye mu gace ka Khabarovsk, rwahamije icyaha umuvandimwe Yegor kandi rumukatira igifungo gisubitse cy’imyaka itanu. Ikibabaje ni uko umuvandimwe Yen Sen Li yapfuye mbere y’uko urubanza rusomwa.

Uko ibintu byagiye bikurikirana

Ku itariki ya 2 Gashyantare 2021

Urukiko rwatangiye kuburanisha Yegor na Yen Sen
Ku itariki ya 20 Ugushyingo 2020

Yegor yararekuwe nyuma yo kumara amezi atanu n’igice afunzwe by’agateganyo
Ku itariki ya 26 Kanama 2020

Urukiko rwo mu gace ka Khabarovsk rwafatiriye imodoka ya Yen Sen
Ku itariki ya 29 Gicurasi 2020

Yegor yoherejwe aho yafungiwe by’agateganyo
Ku itariki ya 26 Gicurasi 2020

Ubushinjacyaha bwagejeje ikirego cyabwo mu rukiko rwo mu gace ka Khabarovsk burega Yegor na Yen Sen

Icyo twabavugaho

Yegor Baranov

Igihe yavukiye: 2001 (Olovyannaya, mu gace ka Trans-Baikal)

Ibimuranga: Afite bakuru be babiri. Se yapfuye mu mwaka wa 2013. Akunda ibimera n’inyamaswa. Yigaga ibijyanye n’amashyamba mbere y’uko afungwa

Nyina ni Umuhamya wa Yehova. Ibyiringiro byo kuzongera kubona se yazutse biramukomeza. Yabatijwe mu mwaka wa 2017 maze aba Umuhamya wa Yehova. Akunda gucuranga piyano, kwandika imivugo no guteka

Ibyo yavuze

Ni mu buhe buryo ibyakubayeho byatumye ubucuti ufitanye na Yehova burushaho gukomera?

Ibigeragezo nahuye na byo byatumye nishimira kumenya ko uko ibibazo duhura na byo byaba biri kose, Yehova yita kuri buri muntu ku giti ke kandi akamufasha. Naje kubona ko iyo ntangiye gushidikanya mu mutima wange, biba bigaragaza ko ntiringira ubushobozi Imana ifite bwo kumfasha. Buri gihe iba izi igikwiriye gukorwa kandi kenshi igikora mu buryo tutari twiteze. Igihe namaze mfunzwe, ukwizera kwange kwarageragejwe, byatumye mbona ko nari nkeneye kurushaho kwiringira Yehova kandi ibyo byatumye ukwizera kwange kurushaho gukomera.

Yen Sen Li

Igihe yavukiye: 1952 (Nikolaevsk-on-Amur, mu gace Khabarovsk)

Ibimuranga: Ni uwa gatatu mu bana batanu. Akora mu bijyanye n’amashanyarazi. Yashakanye na Olga mu mwaka wa 1991. Bafite umuhungu. Yashishikajwe no kwiga Bibiliya igihe we n’umugore we bamenyaga ko itanga ibyiringiro by’igihe kizaza. Yabatijwe mu mwaka wa 1994. Akunda gukina umukino wa esheki no gutembera n’amaguru

Ibyo yavuze

Muri icyo gihe wasengaga usaba iki?

Nasenze nsaba ko nge n’umugore wange twakomeza gushikama kandi tukagira amahoro yo mu mutima . . . koko rero igihe bampataga ibibazo naratuje kandi ibyo byatumye ngira ikizere ko Yehova adashobora kuntererana.

Igihe umugore wange yagiraga ikibazo cy’umutima maze bakamujyana kwa muganga, nasenze Yehova musaba ko yabona ubuvuzi bwiza, kandi Yehova yaranyumvise. Biragaragara ko Yehova yadufashije, akoresheje abavandimwe na bashiki bacu. Batubaye hafi rwose. Baduhaye ibyo twari dukeneye kandi batwitaho no mu buryo bw’umwuka.

Umugore wange yakomeje kugira ukwizera gukomeye kubera ko Yehova n’abavandimwe na bashiki bacu bamufashije. . . . Na we agerageza gutera inkunga abandi. Ibyo binyereka ko Yehova afasha umugore wange.

Dushimira abavandimwe na bashiki bacu kubera ko bakomeza kugaragaza ko biringira Yehova, kandi twizeye ko azakomeza kubaha imbaraga zo kwihangana.—2 Abatesalonike 3:3.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU