2 KANAMA 2021
U BURUSIYA

Abageze mu zabukuru bakomeje kuba indahemuka no kurangwa n’ibyishimo n’ubwo batotezwa

FUNGURA

Kuva ibikorwa by’Abahamya ba Yehova bo mu Burusiya bahagarikwa mu mwaka wa 2017, abayobozi bagiye bibasira abavandimwe na bashiki bacu, baba abato na bageze mu zabukuru. Umuto muri bo afite imyaka 18 naho umukuru afite imyaka 89. Ku itariki ya 18 Nyakanga 2021, abavandimwe na bashiki bacu 18 bafite imyaka 60 cyangwa irenga bahamijwe ibyaha kandi barakatirwa, bazira gusa kwifatanya mu bikorwa byo gusenga Imana. Batatu muri bo, baherutse gufungwa. a Raporo ya 4 y’Inteko Nyobozi yo mu mwaka wa 2021 yibanze ku bitero byagabwe ku bavandimwe na bashiki bacu bageze mu zabukuru.

None se abo bavandimwe na bashiki bacu bageze mu zabukuru bihanganira bate ibitotezo? Twishimiye kubagezaho amagambo ateye inkunga yavuzwe na bamwe muri bo.

Aleksandr Ganin

Igihe yavukiye: 1957

Igifungo: Yakatiwe imyaka itatu y’igifungo gisubitse, n’amezi ikenda azamara atemerewe kuva mu gace atuyemo

Igihe yabatirijwe: 1997

Ibyo yavuze

Ni iki cyagufashije gukomeza kugira ibyishimo muri ibi bihe bigoye?

Yehova yakoresheje umuryango we aduha amabwiriza yadufasha gukomeza kurangwa n’ikizere kandi ntitwihebe. Nge n’umugore wange twari dusanzwe dufite ibibazo by’uburwayi na mbere y’uko mfungwa. Ariko twashakaga ibiduhuza, ntitube twarangara ngo twibagirwe ikintu kingenzi kurusha ibindi, ari cyo gukomeza kugirana na Yehova ubucuti bukomeye.

Ese hari icyahindutse kuri wowe no ku muryango wawe bitewe n’ibitotezo uhura na byo?

Byatumye ukwizera kwacu kurushaho gukomera kandi turushaho kunga ubumwe. Nizera ntashidikanya ko ari ubuhanuzi bwo muri Bibiliya buri gusohora, kandi bigomba kuba nk’uko byahanuwe. Ikindi kandi nzi ko twegereje igihe hazabaho ibintu bikomeye cyane. Ibyo byose bituma ndushaho kugira imbaraga zo gukomeza gukorera Yehova.

Yuriy Krutyakov

Igihe yavukiye: 1952

Igifungo: Yakatiwe igifungo gisubitse k’imyaka itandatu, kirimo imyaka itanu azamara afungishijwe ijisho n’umwaka umwe azamara atemerewe kuva mu gace atuyemo

Igihe yabatirijwe: 1998

Ibyo yavuze

Ni izihe ngorane wowe n’umuryango wawe mwahuye na zo kubera iki gitotezo?

Urebye igifungo gisubitse ni kiza ukigereranyije no gushyirwa muri gereza. Icyakora mu myaka yange sinshobora kubona akazi narahamwe n’icyaha. Amafaranga mpabwa buri kwezi y’ikiruhuko k’izabukuru, ntahagije ku buryo nabonamo ibyo kurya, imiti no kwivuza.

Ni ubuhe burwayi ufite kandi ni iki kigufasha kubwihanganira?

Ndwaye rubagimpande. Navuye muri gereza ndwaye umusonga. Kubera ko kasho nari mfungiwemo yarimo abantu banywa itabi, ibihaha byange bifite ikibazo. Nkora uko nshoboye ngakurikiza inama ngirwa n’abaganga kandi nkita ku buzima bwange uko nshoboye kugira ngo nkomeze gukorera Yehova.

Ni mu buhe buryo wiboneye ko Yehova agushyigikiye kuva urubanza rwawe rwarangira?

Abavandimwe na bashiki bacu baramfashije cyane. Niboneye ko ibivugwa muri Zaburi ya 133:1 ari ukuri. Kwibonera uko abavandimwe na bashiki bacu bangaragarije urukundo byari umugisha uturuka kuri Yehova. Ntitwigeze dutekereza ko dushobora kugira inshuti z’abavandimwe na bashiki bacu zingana n’izo dufite ubu. Niboneye ukuntu byose Yehova yagiye abikora, akatwitaho akoresheje umuryango w’abavandimwe, akatugaragariza ineza yuje urukundo kandi akanaduha imigisha myinshi muri ibi bihe bigoye. Maze kwibonera ibyo byose nta kintu cyari kumbuza gukomeza gukorera Imana irangwa n’urukundo, ari yo Yehova.

Lyudmila Ponomarenko

Igihe yavukiye: 1950

Igifungo: Yakatiwe igifungo gisubitse k’imyaka ibiri n’umwaka umwe azamara afungishijwe ijisho

Igihe yabatirijwe: 1998

Ibyo yavuze

Kuba ufungishijwe ijisho bigira izihe ngaruka ku buzima bwawe bwa buri munsi?

Sinshobora kwimukira mu yindi nzu, ntabimenyesheje urwego rw’igihugu rushinzwe kugenzura ibikorwa by’abantu bakatiwe igifungo gisubitse. Ngomba no kwitaba urwo rwego buri kwezi.

None se bikugiraho izihe ngaruka?

Natangiye kumara igihe kirekire ndwaye umutwe. Icyamfashije ni ugusenga nsaba kubona ibintu mu buryo bushyize mu gaciro no gukomeza kurangwa n’ikizere mu gihe mpuye n’ibintu ntashobora kugira icyo nkoraho.

Yehova yagufashije ate?

Kuva urubanza rwange rwasomwa Yehova yakomeje kumpa imigisha. Yaramfashije nkomeza ibikorwa byange byo kumusenga kandi ntiyigeze antererana. Abavandimwe na bashiki bacu bakomeje kumba hafi, igihe natangiraga guhura n’ibitotezo bari biteguye kumfasha. Ni gihe ibintu byabaga bikomeye bimwe muri byo bisa n’ibidashoboka, byarangiraga Yehova abihinduyemo imigisha. Byanyigishije ko ngomba kwiringira Yehova kandi nkamwishingikirizaho muri byose. Nshimira Yehova kuba yarampaye uburyo bwo kubwira abari mu rukiko ibimwerekeye. Byarashimishije cyane. Nta mpamvu yatuma nshika intege, niyemeje gukomeza isiganwa kugeza ndirangije kandi ngafasha abandi kugira ngo nabo bazarirangize.

Gennady Shpakovskiy

Igihe yavukiye: 1958

Igifungo: Yabanje gukatirwa igifungo k’imyaka itandatu. Yajuririye uwo mwanzuro, maze urukiko ruvanaho igihano yari yarahawe. Ariko azamara imyaka 2 hari ibyo atemerewe gukora

Igihe yabatirijwe: 1995

Ibyo yavuze

Kuva urubanza rwawe rwarangira ni ibiki ubujijwe?

Sinemerewe kwifatanya cyangwa gutegura ibikorwa byo mu rwego rw’idini mu gihe k’imyaka ibiri. Sinemerewe kuva mu rugo hagati ya saa tanu za nijoro na saa kumi n’ebyiri za mu gitondo. Sinshobora kuva mu mugi ntuyemo cyangwa kwimukira mu yindi nzu ntabiherewe uruhushya. Kabiri mu kwezi, ngomba kwitaba urwego rw’igihugu rushinzwe kugenzura ibikorwa by’abantu bafunzwe by’agateganyo.

Muri ibyo bihe bigoye ni mu buhe buryo abavandimwe na bashiki bacu bagufashije?

Bamfashije mu buryo butandukanye. Uhereye igihe nafatiwe bwa mbere, nge n’abagize umuryango wange, batwohererezaga amabaruwa, udukarita, ibyo babaga badushushanyirije n’ubutumwa bugufi batwandikiraga badutera inkunga, batubwira ko badukunda, ko badushyigikiye kandi ko biteguye kudufasha igihe cyose tubikeneye.

Ni iki gituma urushaho kwiyemeza gukomeza gukorera Yehova?

Ibintu byose byatubayeho nge n’umuryango wange mu myaka ishize, byatumye ndushaho kwizera ko nkorera Imana y’ukuri, Yehova. Gusoma, gutekereza no kugira uruhare mu bikorwa Bibiliya ivuga ko byari kuranga “iminsi y’imperuka” bituma nemera ntashidikanya ko ndi mu nzira y’ukuri izangeza mu isi nshya.

Valentina Suvorova

Igihe yavukiye: 1948

Igifungo: Yakatiwe igifungo gisubitse k’imyaka ibiri

Igihe yabatirijwe: 1996

Ibyo yavuze

Kuba baraguhamije icyaha byakugizeho izihe ngaruka?

Nsenga Imana y’urukundo n’imbabazi kandi irangwa n’ibyishimo, ubwo rero gufatwa nk’umuntu w’umunyabyaha bikojeje isoni kandi birababaje. Bituma mpora mpangayitse. Rimwe na rimwe mbura ibitotsi, nkarwara umutwe, nkagira ikibazo cy’umutima kandi nkanababara umugongo.

Ni iki cyagufashije gukomeza gutuza?

Ikintu cyamfashije ni urukundo nkunda Yehova, amategeko ye, amahame ye n’umuryango wacu kandi ndabyishimira. Nari nsanzwe nzi ko Data wo mu ijuru Yehova, arangwa n’urukundo, impuhwe, ko aduhumuriza kandi akadushyigikira. Ariko ubu narushijeho kwibonera ko Yehova anyitaho buri munsi kandi akamfasha gukomeza kumubera indahemuka. Nanone nshimira inshuti zange, abavandimwe bafite inshingano, abagize itorero n’umuryango w’abavandimwe muri rusange.

Dushimira abavandimwe na bashiki bacu bageze mu za bukuru bo mu Burusiya kubera urugero rwiza baduha. Dukwiriye kubigana bitewe n’ubutwari n’ubudahemuka bagaragaza kandi ikiruta byose Imana ibaha agaciro kenshi.—Imigani 16:31.

a Mushiki wacu Valentina Baranovskaya ufite imyaka 70, yakatiwe igifungo k’imyaka ibiri. Umuvandimwe Aleksandr Ivshin, ufite imyaka 63, yakatiwe igifungo k’imyaka irindwi n’igice. Naho umuvandimwe Yuriy Savelyev, ufite imyaka 68 akatirwa igifungo k’imyaka itandatu.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU