14 UKWAKIRA 2021
U BURUSIYA

Abahamya ba Yehova barenga 80 bakatiwe igifungo gisubitse babayeho bate?

FUNGURA

Kuva u Burusiya bwahagarika ibikorwa by’Abahamya ba Yehova muri Mata 2017, abavandimwe na bashiki bacu barenga 500 barafashwe kandi bashinjwa ubutagondwa. Abagera kuri 40 muri bo barafunzwe naho 15 bacibwa amande. Abarenga 80 bo bahamijwe ibyaha kandi bahabwa igifungo gisubitse. Nubwo batahise bajyanwa muri gereza, bararenganye kandi kubyihanganira biragoye.

Hashingiwe ku mategeko mpanabyaha y’u Burusiya, umucamanza afite uburenganzira ahabwa n’amategeko bwo kuba yakatira umuntu igifungo gisubitse aho kujyanwa muri gereza. Iyo umucamanza ahaye umuntu igifungo gisubitse anagena igihe kizamara akanamumenyesha ibindi bintu abujijwe. Iyo igihano cyatanzwe kitubahirijwe uwagihawe ajyanwa muri gereza akamaramo igihe kingana n’icyo yari yarakatiwe.

Umuntu wakatiwe igifungo gisubitse abaho ate? Yehova afasha ate abavandimwe na bashiki bacu bahawe icyo gifungo? Twaganiriye na bamwe mu bahawe igifungo gisubitse, kiri hagati y’imyaka ibiri n’itandatu. Batubwiye ingorane bahura na zo n’uko Yehova yabafashije kuzihanganira.

Igor Ivashin

Yabatijwe: Mu mwaka wa 1999

Igifungo yakatiwe: Imyaka itandatu y’igifungo gisubitse

Ibyo yavuze

Igifungo wahawe cyagize izihe ngaruka ku buzima bwawe bwa buri munsi?

Rimwe mu kwezi mba ngomba kuvugana n’ushinzwe kugenzura ko nubahiriza ibihano nahawe. Sinshobora kuva mu mugi ntuyemo ntabanje gusaba uruhushya n’iyo naba ngiye kwivuza.

Kuba narahamijwe ibyaha byagize ingaruka ku mishyikirano ngirana na bene wacu batari Abahamya kuko batiyumvisha impamvu umuntu yakwemera guhura n’ibibazo nk’ibyo bitewe gusa idini.

Ibibazo wagize byagize izihe ngaruka ku bagize umuryango wawe kandi se bakora iki ngo babyihanganire?

Abagize umuryango wange bose barahungabanye bitewe n’umwanzuro w’urukiko. Kandi byatumye abafite ibibazo by’uburwayi barushaho kuremba. Duhora duhangayitse kubera ko igihe icyo ari cyo cyose igihano cyange bashobora kugihindura maze nkajyanwa muri gereza.

Icyakora, iyo dutekereje ku byatubayeho bituma turangwa n’ikizere kandi bigatuma twumva twafasha abavandimwe na bashiki bacu bafite ibibazo nk’ibyacu. Muri gahunda y’iby’umwuka mu muryango twiyibutsa impamvu ibintu nk’ibyo bitubaho n’icyo byatumariye urugero nko kubwiriza mu rukiko, mu mugi dutuyemo no ku kazi.

Ese hari imigisha wabonye nubwo uhanganye n’ibibazo?

Narushijeho kuba inshuti ya Yehova. Iyo mbonye ukuntu Yehova amfasha mu bibazo byange, ibintu bikagenda neza birushaho kunkomeza. Binyereka ko Yehova ankunda cyane.

Vladimir Kulyasov

Yabatijwe: Mu mwaka wa 2010

Igifungo yakatiwe: Imyaka ibiri y’igifungo gisubitse

Ibyo yavuze

Ni izihe ngorane uhura na zo bitewe no kuba warahamijwe icyaha cy’ubutagondwa?

Namaze amezi umunani nambara akuma ku kuguru kagenzura aho ngiye hose. Sinari nemerewe kuva mu rugo hagati ya saa yine z’umugoroba na saa kumi n’ebyiri z’igitondo kandi sinari nemerewe no kuva mu mugi nari ntuyemo. Kuba narahamijwe icyaha cy’ubutagondwa bituma ntashobora kubona akazi. Maze gukatirwa namaze amezi atanu yose nshaka akazi kuko ahantu hose nagasabaga barakanyimaga. Abantu benshi bangiriraga impuhwe ariko bakansobanurira ko badashobora kumpa akazi kuko abakoresha babo batabyemera.

Wafashije ute Abakristo bagenzi bawe bagezweho n’ingaruka z’ibyakubayeho?

Iyo turi kuvuga ku bibazo twahuye na byo tuvuga no ku migisha Yehova yaduhaye. Tubabwira ukuntu ibyatubayeho byatumye tubona uburyo bwo kurushaho gukorera Yehova, guhesha ikuzo izina rye, kurushaho kuba inshuti ze kandi tukanarushaho kugira imico ya gikritso. Tubizeza ko nubwo twahuye n’ibyo bibazo byose tudashobora kwirengagiza imigisha twabonye.

Ese hari imigisha wabonye n’ubwo uhanganye n’ibibazo?

Hari mushiki wacu wampamagaye ambwira ko umukoresha we akeneye umukozi wo mu rugo. Twarasenze cyane. Uwo mukoresha yagendeye ku byo mushiki wacu yari yamubwiye, maze yemera kumpa akazi nta cyangombwa na kimwe anyatse. Uwo wari umugisha rwose! Yehova yari ashubije amasengesho yacu. Data wo mu ijuru yaramfashije niga umwuga mushya wo gukora ubusitani. Yehova ashobora gutuma umugaragu we aba icyo ashaka ko aba cyo cyose!

Denis Timoshin

Yabatijwe: Mu mwaka wa 1998

Igifungo yakatiwe: Imyaka ibiri y’igifungo gisubitse

Ibyo yavuze

Igifungo wahawe cyagize izihe ngaruka ku buzima bwawe bwa buri munsi?

Banyambitse akuma ku kuguru kagenzura aho ngiye hose. Karambabaza cyane kandi . . . mba numva kambangamiye cyane kuko gatuma numva meze nk’imbwa bambitse umukandara mu ijosi. Mba numva ukuguru kwange kutandiho.

Sinari nemerewe kuva mu gace runaka. Imbibi z’ako gace hari igihe zabaga ari igice cy’umuhanda. Ubwo rero hari igihe iyo nabaga ndi mu ruhande rumwe rw’umuhanda nta kibazo byabaga biteje ariko kugera ku rundi ruhande nkaba ndenze aho ntemerewe. Ubusanzwe nkora ibikoresho byo mu rugo, ubwo rero iyo mbonye ikiraka nkora ibishoboka byose ngo ntarenga aho nemerewe. Ibyo bituma numva mpangayitse, ariko ikimpangayikisha kurushaho ni ugusobanurira abakiriya bange impamvu ntashobora kwemera akazi kari mu gace runaka.

Ukora iki ngo uhangane n’imihangayiko uterwa no kuba warahawe igifungo gisubitse?

Ngerageza kubona ko ibimbaho ari uburyo mba mbonye bwo kugaragaza ko ndi indahemuka ku Mana. Nzi ko Yehova ambona mu buryo butandukanye n’uko abategetsi bambona.

Nge n’umugore wange dukunda gutekereza cyane ku migisha dufite yo kuba twifatanya mu kweza izina rya Yehova. Twiboneye ukuntu Yehova yagiye adufasha muri iyo myaka yose, akaduha ibyo dukeneye, akaduhumuriza kandi akadufasha kugira ukwizera gukomeye. Nubwo namaze umwaka n’igice mfungishijwe ijisho mbere y’uko mpabwa igifungo gisubitse kandi umugore wange akaba adashobora gukora kubera ikibazo cy’uburwayi, nta kintu na kimwe twigeze tubura.

Kuba twaramenye ibibazo abo bavandimwe bahanganye na byo, bituma turushaho gusenga tubasabira bo n’imiryango yabo. Ibyababayeho bigaragaza ko Yehova yumva amasengesho nk’ayo kandi ko akomeza gufasha abagaragu be b’indahemuka mu makuba y’uburyo bwose baba barimo.—2 Abakorinto 1:3, 4.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU