20 MUTARAMA 2022
U BURUSIYA

Abahamya barindwi bo mu Burusiya bakomeje kwishingikiriza ku Muremyi wabo

FUNGURA

Vuba aha urukiko rw’umugi wa Pechora ruri muri Repuburika ya Komi, ruzatangaza umwanzuro warwo mu rubanza ruregwamo Abahamya ba Yehova barindwi. Abo ni Nikolay Anufriyev, Eduard Merinkov, Gennadiy Polyakevich, Aleksandr Prilepskiy, Viktor Shchannikov, Gennadiy Skutelets na Aleksandr Vorontsov. Ubushinjacyaha nta gihano burabasabira.

Uko ibintu byagiye bikurikirana

Ku itariki ya 28 Mutarama 2020

Abayobozi basatse ingo 12 z’Abahamya ba Yehova muri Repuburika ya Komi. Umuvandimwe Polyakevich na Skutelets batangiye gukurikiranwaho ibyaha
Ku itariki ya 30 Mutarama 2020

Gennadiy Polyakevich yafunzwe by’agateganyo naho Gennadiy Skutelets we afungishwa ijisho
Ku itariki ya 20-25 Gicurasi 2020

Abayobozi batangiye guhata ibibazo abandi Bahamya bo mu gace ka Pechora kugira ngo batange ubuhamya muri urwo rubanza. Hari umuvandimwe waturitse agatsi ko mu bwonko, kubera iterabwoba bashyizweho n’umugenzacyaha. Ariko ubu yarorohewe
Ku itariki ya 26 Kamena 2020

Igifungo cya Gennadiy Polyakevich cyarongerewe. Umucamanza yavuze ko Gennadiy Polyakevich ashinjwa gukora “icyaha gikomeye kandi yabigambiriye,” hakubiyemo no kuba yaravuze ko “agomba gukomeza gukorera Yehova nubwo abategetsi bamutoteza.”
Ku itariki ya 24 Kanama 2020

Abayobozi basatse izindi ngo 12 z’Abahamya ba Yehova
Ku itariki ya 10 Ugushyingo 2020

Umuvandimwe Aleksandr Prilepskiy, Aleksandr Vorontsov, Eduard, Nikolay na Viktor batangiye gukurikiranwaho ibyaha. Ibirego byabo byahurijwe hamwe n’ibya Gennadiy Polyakevich na Gennadiy Skutelets
Ku itariki ya 25 Ugushyingo 2020

Igihe Gennadiy Polyakevich yari amaze amezi 10 muri gereza, yararekuwe maze afungishwa ijisho
Ku itariki ya 27 Mutarama 2021

Nyuma yo kumara umwaka afungishijwe ijisho Gennadiy Skutelets yararekuwe

Icyo twabavugaho

Eduard Merinkov

Igihe yavukiye: 1975 (Pechora)

Ibimuranga: Kuva akiri muto akunda ibikorwa bitandukanye byo kwirangaza, urugero nko gutembera mu bwato ku ruzi rwa Pechora. Akora muri Kampani ishinzwe ibya gariyamoshi. Yabatijwe mu mwaka wa 1993. Yashakanye na Valentina mu mwaka wa 1997. Bafite umukobwa witwa Iolanta

Ibyo yavuze

Ni iki ukora kugira ngo ukomeze kuba inshuti ya Yehova kandi se byagufashije bite kwihangana?

Kimwe mu bintu nkunda cyane . . . ni ugufata mu mutwe indirimbo zisanzwe zo kuri Tereviziyo ya JW no kuziririmba. Ziramfasha nkumva ko Yehova anshyigikiye. Izo ndirimbo nziririmba aho ndi hose naba ndi mu rugo, mu modoka ndetse n’iyo ndi mu kazi! Nanone nkunda Zaburi ya 27 kandi nyisoma kenshi ntuje.

Ni iki kigufasha gukomeza kuba indahemuka ntucike intege?

Kuba Umuremyi w’ijuru n’isi yifuza ko mubera inshuti bintera ibyishimo. Nifuza gukorera Yehova iteka ryose, uko ikigeragezo nahangana na cyo cyaba kimeze kose. Niyemeje gukomeza kubera Yehova indahemuka kugeza ku iherezo.

Aleksandr Prilepskiy

Igihe yavukiye: 1964 (Pechora)

Ibimuranga: Akiri umwana yakundaga gukina tenisi. Acuranga gitari. Yabatijwe mu mwaka wa 1994. Yashakanye na Vera mu mwaka wa 1990. Bafite umukobwa umwe n’abuzukuru babiri

Ibyo yavuze

Ni iki kigufasha kwihangana?

Urukundo nkunda Yehova hamwe n’ibyiringiro mfite by’uko isi izaba nziza, bituma nkomeza kwihangana kandi ngakorera Yehova. Nanone kwitegereza ibintu Data wo mu ijuru yaremye na byo birankomeza.

Ni iyihe nama wagira abandi yabafasha kwitegura ibitotezo bazahura na byo?

Natera inkunga abavandimwe na bashiki bacu yo gukomeza gukoresha neza no kwishimira amafunguro yo mu buryo bw’umwuka duhabwa muri iki gihe. Nibabigenza batyo bizatuma bakomeza kuba maso kandi bakunde Imana n’imico yayo ihebuje. Nanone, bizatuma bakundana cyane, kandi bakore ibishoboka byose kugira ngo bamenye neza bagenzi babo kandi bababarire.

Aleksandr Vorontsov

Igihe yavukiye: 1984 (Pechora)

Ibimuranga: Abagize umuryango we n’inshuti ze batumye amenya Yehova akiri muto. Yakoze mu bijyanye no kubaza. Yabatijwe mu mwaka wa 2012. Yashakanye na Yelena mu mwaka wa 2016

Ibyo yavuze

Haba hari ikintu umuvandimwe cyangwa mushiki wacu yakubwiye kikagufasha kwihangana?

Nyuma y’iburanisha ry’ibanze, hari umuvandimwe wambwiye ko yakomeje kunzirikana mu isengesho atari mbere y’urubanza gusa ahubwo no mu gihe nari ndi imbere y’urukiko. Yanyibukije urugero rwa Nehemiya. Naramwiganye igihe nari ngiye kuburana, maze nsenga bucece, igihe nari mpagaze imbere y’abacamanza.—Nehemiya 2:4.

Haba hari inkuru yo muri Bibiliya yagufashije kwihangana?

Inkuru ya Esiteri yaramfashije cyane. Na we yabayeho mu gihe abantu bo mu bwoko bwe batotezwaga. Yarakeneye kugira ubutwari kugira ngo abashe kuvuganira ubwoko bwe. Kwishyira mu mwanya wa Esiteri bimfasha guhagarara nshize amanga imbere y’urukiko kugira ngo mvuganire Abakristo bagenzi bange.

Twizeye ko abavandimwe bacu bakomeje kwizera ko bazabona ineza ya Yehova kandi ko azabaha imigisha muri iki gihe no mu gihe kizaza.—Zaburi 27:13.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU