24 GICURASI 2022
U BURUSIYA

Abahamya bo mu mugi wa Sochi bakomeje gushikama nubwo urukiko rwabakatiye igifungo

FUNGURA

Ku itariki ya 28 Werurwe 2022, urukiko rw’akarere ka Khostinskiy ruri mu mugi wa Sochi, rwasomye umwanzuro w’urubanza ruregwamo umuvandimwe Vladimir Deshko, Yuriy Loginskiy, Yuriy Moskalev na mushiki wacu Tatyana Velizhanina. Umuvandimwe Deshko yakatiwe igifungo cy’umwaka umwe n’amezi ane, mushiki wacu Velizhanina we yakatiwe umwaka n’amezi atanu. Bombi igifungo bakatiwe bari bakimaze bafunzwe by’agateganyo. Ubwo rero ntibizaba ngombwa ko bajyanwa muri gereza. Umuvandimwe Loginskiy na Moskalev buri wese yakatiwe igifungo gisubitse cy’imyaka ibiri. Ntibizaba ngombwa ko bajyanwa muri gereza.

Uko ibintu byagiye bikurikirana

Ku itariki ya 24 Werurwe 2021

Bose uko ari bane barafashwe bafungwa by’agateganyo. Bashinjwa kwifatanya mu bikorwa by’ubutagondwa
Ku itariki ya 26 Werurwe 2021

Umuvandimwe Deshko na mushiki wacu Velizhanina boherejwe gufungirwa kuri sitasiyo ya polisi iri ku birometero 400. Umuvandimwe Loginskiy n’umuvandimwe Moskalev bo bafungishijwe ijisho
Ku itariki ya 3 Gashyantare 2022

Umuvandimwe Deshko yararekuwe ariko afungishwa ijisho
Ku itariki ya 3 Werurwe 2022

Dosiye ye yashyikirijwe urukiko
Ku itariki ya 4 Werurwe 2022

Mushiki wacu Velizhanina yararekuwe ariko afungishwa ijisho

Ibyo twabavugaho

Yuriy Loginskiy

Igihe yavukiye: 1966 (Sochi, muri gace ka Krasnodar)

Ibimuranga: Yubaka amakaro. Yashakanye n’umugore we Svetlana mu mwaka wa 1987. Bafite umuhungu umwe

We n’umugore we babatijwe mu mwaka wa 1996

Ibyo yavuze

Ni ibiki utari wemerewe igihe wari ufungishijwe ijisho?

Nabaga nemerewe gutembera amasaha abiri gusa, hagati ya saa 10:00 za mu gitondo na 12:00. Ibyo byumvikanisha ko ntashoboraga kujya ku kazi. Nanone sinari nemerewe kohereza no kwakira amabaruwa cyangwa ubundi butumwa kandi sinari nemerewe gukoresha ubundi buryo bw’itumanaho harimo na interineti.

Ni mu buhe buryo Yehova yafashije umuryango wawe?

Yehova ntiyanyitayeho njyenyine ahubwo yanitaye no ku mugore wanjye no ku muhungu wanjye. . . . Yehova azirikana ko abagize umuryango baba bagomba gushyigikirana. Iyo ni yo mpamvu umuryango wishingikiriza kuri Yehova cyane ushobora gutsinda ibigeragezo ibyo ari byo byose.

Yuriy Moskalev

Igihe yavukiye: 1964 (Yeginsu, muri Kazakisitani)

Ibimuranga: Mbere y’uko aba Umuhamya wa Yehova, yabanje kuba umusirikare aza no kuba umupolisi mu gace ka Sochi. Ababyeyi be n’abo bavukana babiri barapfuye. Yashakanye n’umugore we Nadezhda mu mwaka wa 1987. Bafite umukobwa umwe

Amaze kugereranya inyigisho zo muri Bibiliya n’iza Kiliziya y’Aborutodogisi, yahise atangira kwigana Bibiliya n’Abahamya ba Yehova. Yabatijwe mu mwaka wa 2005. Hashize umwaka umugore we na we yarabatijwe

Ibyo yavuze

Kwihanganira ibyo bigeragezo byakwigishije iki?

Iyo umuntu yihanganiye ibigeragezo ubuzima burakomeza. Ubwo rero nabonye ko nkeneye kubaho mu buryo bushimisha Yehova. Intego yanjye ni iyo gukomeza isiganwa kuko turi hafi kubona ibihembo. Sinkwiriye gutekereza ko ibintu bibi bizakomeza kubaho. Ahubwo nkwiriye kwibuka ko Yehova anshyigikiye. . . . Nubwo ibintu bitagenda nk’uko mbyifuza, nzi neza ko Yehova ashobora byose. Uko ibintu nahura na byo byaba bimeze kose, Yehova ntazigera antererana.

Twiringiye ko Yehova azakomeza gufasha abagaragu be b’indahemuka kandi akabaha ibyo bakeneye byose kugira ngo bihanganire iyi minsi y’imperuka igoye kwihanganira.—Zaburi 89:21.

a b Ntibyashobotse ko tubasha kuvugana na we.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU