9 GASHYANTARE 2024
U BURUSIYA

Bakomeje kwiringira Yehova nubwo bahanganye n’ibibazo

FUNGURA

Urukiko rw’umujyi wa Blagoveshchensk ruherereye mu gace ka Amur vuba aha ruzatangaza umwanzuro warwo mu rubanza ruregwamo mushiki wacu Kristina Golik, Yekaterina Olshevskaya, Mariya Myasnikova na Valentina Yermilova. Ubushinjacyaha nta gihano burabasabira.

Icyo twabavugaho

Kristina Golik

Igihe yavukiye: 1992 (Muri Ukraine)

Ibimuranga: Yize ibijyanye no gushushanya no gukora imbuga za interinete

Yabatijwe mu mwaka wa 2006 kandi ari mu gisekuru cya gatanu cy’Abahamya ba Yehova mu muryango we.

Yashakanye na Dmitriy mu mwaka wa 2012. Dmitriy yahamwe n’icyaha muri Kamena 2021, akatirwa igifungo cy’imyaka itandatu n’amezi abiri

Ibyo yavuze

Ese hari umurongo wo muri Bibiliya ugufasha gukomeza kugira ibyishimo?

Igihe bantandukanyaga na Dmitriy numvaga ntazi icyo nakora kubera ako karengane. Ntiyari kongera kumfasha cyangwa ngo ampumurize. Ubwo rero nasenze Yehova cyane ngo amfashe. Mu gihe nasomaga Bibiliya nakozwe ku mutima n’amagambo yo muri Zaburi ya 17. Nakunze cyane umurongo wa 15 ugira uti: “Ariko njye nkora ibikwiriye kandi ni byo bituma unyishimira. Nkanguka nzi ko uri kumwe nanjye kandi numva nyuzwe.” Buri gihe iyo mbyutse nibuka ko Yehova we Mana yanjye ari we ushobora kumpumuriza, kandi akankomeza nk’uko mbikeneye kuruta undi muntu uwo ari we wese. Ubwo rero buri gihe mba mfite impamvu zituma nishima, nubwo mba mpanganye n’ibibazo.

Yekaterina Olshevskaya

Igihe yavukiye: 1984 (Blagoveshchensk)

Ibimuranga: Yashakanye na Anton mu mwaka wa 2010. Bafite umwana w’umuhungu ufite imyaka ine

Mu Kuboza 2022, umugabo we Anton na papa we witwa Sergey Afanasiyev bahamijwe icyaha kandi bakatirwa igifungo kiri hejuru y’imyaka itandatu

Ibyo yavuze

Ni gute ubucuti ufitanye na Yehova bwarushijeho gukomera muri ibi bigeragezo?

Mu myaka itanu ishize, nahangayikishijwe cyane n’urubanza rwa papa n’urw’umugabo wanjye, none ubu nanjye ndi kuburanishwa. Kandi birashoboka ko nanjye nshobora kuzafungwa maze ngasiga umuhungu wacu ufite imyaka ine, agasigara wenyine nta babyeyi. Nubwo bimeze bityo, numva meze nk’umukiranutsi Yobu igihe yavugaga amagambo ari muri Yobu 42:5, agira ati: “Ibyawe nari narabyumvishije amatwi gusa, ariko noneho ubu amaso yanjye arakureba.” Nubwo mfite ibyo bibazo byose kandi n’umugabo wanjye akaba adahari ngo ampumurize, numva Yehova andi hafi kurusha uko byari bimeze mbere. Umunsi umwe Anton yarambwiye ati: “Nubwo najya muri gereza kandi simbashe kubitaho, uzibonera ko Yehova ari we mutware mwiza w’umuryango. Azabaha ibyo mukeneye.” Kandi rwose Yehova yangaragarije ineza. Ntiyiyumvisha gusa uko merewe, ahubwo anyitaho mu buryo bw’ibyiyumvo kandi akampa ibyo nkeneye. Inshuro nyinshi abikora na mbere y’uko mbimusaba.

Mariya Myasnikova

Igihe yavukiye: 1994 (Chernigovka, mu gace ka Amur)

Ibimuranga: Yakoraga akazi ko mu biro

Mariya yigishijwe Bibiliya na mama we. Yashimishijwe no kumenya ukuntu ubuhanuzi bwo muri Bibiliya bwagiye busohora ndetse n’ibyiringiro Imana iduha byo kuzabaho iteka. Yabatijwe mu mwaka wa 2006

Yashakanye na Nikolay mu mwaka wa 2021

Ibyo yavuze

Ni iki kigufasha gukomeza kubona ibintu mu buryo bukwiriye muri ibi bibazo uhanganye na byo?

Ngerageza kubona ko ibigeragezo mpura na byo atari ikintu kibi, ahubwo ko ari uburyo mba mbonye bwo kurushaho kwitoza imico ya Gikristo. Zahabu itunganyirizwa mu muriro. Ibigeragezo mpura nabyo muri iki gihe, bimfasha kurushaho kugira imico Yehova yishimira kandi izamfasha mu gihe kiri imbere. Nanone nkunda amagambo avugwa muri 1 Yohana 2:17 agira ati: “Isi igenda ishirana n’irari ryayo, ariko umuntu ukora ibyo Imana ishaka azahoraho iteka ryose.” Ibintu bibaho muri iki gihe ni iby’akanya gato. Kuzirikana ibyo bimpa imbaraga zo gukomeza gushikama.

Valentina Yermilova

Igihe yavukiye: 1970 (Shimanovsk, mu gace ka Amur)

Ibimuranga: Yari umutekinisiye muri laboratwari

Yashakanye na Sergey mu mwaka wa 1995. Bafite umwana umwe w’umuhungu

Yakozwe ku mutima cyane no kumenya ko abapfuye bazazuka. Yabatijwe mu mwaka wa 2009

Sergey yahamijwe icyaha mu kwezi k’Ukuboza 2022, akatirwa igifungo cy’imyaka itandatu n’amezi atatu

Ibyo yavuze

Ibi bintu byakubayeho byakwigishije iki?

Niboneye agaciro ko kutibanda ku bibazo byanjye. Nakomeje kwibuka ko ikintu cy’ingenzi ari uko izina rya Yehova ryezwa. Abantu benshi babona ko kwitangira igihugu cyabo ari iby’agaciro. None se kuvuganira izina rya Yehova njye nagombye kubona ko bifite agaciro mu rugero rungana iki? Nifuza guha Yehova ibyiza kuruta ibindi no gutuma ahabwa icyubahiro. Kandi nzi neza ko atazigera antererana.

Dushimishwa n’urugero rwiza aba bashiki bacu baduhaye rwo kwishingikiriza kuri Yehova. Kandi twizeye ko Yehova azakomeza kubitaho no kubaha imigisha myinshi.—Zaburi 27:3.

Uko ibintu byagiye bikurikirana

Ku itariki ya 20 Nyakanga 2018

Inzu zabo zarasatswe
Ku itariki ya 22 Nyakanga 2021

Bashiki bacu bose uko ari bane batangiye gukurikiranwa mu nkiko
Ku itariki ya 27 Nyakanga 2021

Kristina na Mariya bamenyeshejwe ko batemerewe kurenga mu gace batuyemo
Ku itariki ya 3 Kanama 2021

Yekaterina yamenyeshejwe ko atemerewe kurenga agace atuyemo
Ku itariki ya 4 Kanama 2021

Valentina yamenyeshejwe ko atemerewe kurenga agace atuyemo
Ku itariki ya 26 Gicurasi 2023

Urubanza rwabo ni bwo rwatangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU