28 KAMENA 2024
U BURUSIYA

Bashiki bacu batatu bo muri Repubulika ya Kalmykia mu Burusiya bahamijwe icyaha

FUNGURA

Ku itariki ya 24 Kamena 2024, urukiko rw’umujyi wa Elista wo muri Repubulika ya Kalmykia rwahamije icyaha mushiki wacu Tsagan Khalgaeva, Yekaterina Menkova na Kishta Tutinova. Tsagan na Yekaterina buri wese yakatiwe igifungo gisubitse cy’imyaka ibiri. Kishta we yakatiwe igifungo gisubitse cy’imyaka itatu. Ariko ntibizaba ngombwa ko bajyanwa muri gereza.

Icyo twabavugaho

Tsagan Khalgaeva

Igihe yavukiye: 1978 (Lagan muri Repubulika ya Kalmykia)

Ibimuranga: Yari umudozi

Yagiye mu madini atandukanye, ashakisha ibisubizo by’ibibazo yibazaga. Igihe yatangiraga kwigana Bibiliya n’Abahamya ba Yehova, yabonye ibisubizo bishingiye kuri Bibiliya by’ibibazo byose yibazaga

Yabatijwe mu mwaka wa 2004

Ibyo yavuze

Ni ikihe kintu cyihariye wishimiye muri ibi bihe bitoroshye urimo?

Nshimira abavandimwe na bashiki bacu kuba barasengaga bansabira. Iyo nacitse intege mba numva ikintu kimwe cyampumuriza ari ugusenga Yehova. Nubwo bimeze bityo hari ubwo kubona amagambo akwiriye navuga mu isengesho biba bitoroshye. Icyakora nzi ko n’abandi baba basenga bansabira, kandi nibonera ukuntu Yehova asubiza ayo masengesho. Ibi byatumye nanjye niyemeza kujya nshyira abandi mu masengesho yanjye mu gihe bahanganye n’ibibazo. Iyo nsenze nsabira abavandimwe banjye kandi nkibuka ko na bo banzirikana mu masengesho yabo binsubizamo imbaraga, kandi bikanyibutsa ko twese dufatanyije kwihangana mu bibazo duhanganye na byo.

Yekaterina Menkova

Igihe yavukiye: 1982 (Tavn-Gashun muri Repubulika ya Kalmykia)

Ibimuranga: Yakoraga muri laboratwari

Yashatse mu mwaka wa 2009. Afite umwana umwe w’umuhungu

Yashimishijwe n’ukuntu Abahamya ba Yehova babaho bahuje n’ibyo Bibiliya yigisha, ndetse n’ukuntu yagize ubuzima bwiza bitewe no gukurikiza amahame ya Bibiliya. Yabatijwe mu mwaka wa 2017

Ibyo yavuze

Ni iyihe mirongo yo muri Bibiliya yagufashije kurushaho kwiringira Yehova?

Amagambo ari muri Zaburi ya 8:3, 4 yarankomeje cyane. Ayo magambo agira ati: “Iyo ndebye mu kirere, nkabona imirimo y’intoki zawe, nkareba ukwezi n’inyenyeri waremye, bituma nibaza nti: ‘Umuntu ni iki ku buryo wamuzirikana?Kandi se umuntu waremwe mu mukungugu ni iki ku buryo wamwitaho?’” Muri aya magambo Bibiliya ivuga ko Yehova yaremye ikirere n’ibikirimo byose akoresheje intoki ze. Iyo mbitekerejeho bituma nizera ko Yehova afite imbaraga nyinshi zo kumfasha, ku buryo ntakwiriye kugira ikintu na kimwe ntinya.

Kishta Tutinova

Igihe yavukiye: 1961 (Novolesnoy, mu gace ka Astrakhan)

Ibimuranga: Yari umudozi. Yareze abahungu be babiri ari wenyine

Abagize umuryango we ni Ababuda. Ariko hari umuhamya wa Yehova waje kumwigisha Bibiliya. Kishta yishimiye kumenya uko gusenga Imana bibatura umuntu ku migenzo no ku miziririzo. Yabatijwe mu mwaka wa 2003

Ibyo yavuze

Ni iki cyagufashije gukomeza kubona ibintu mu buryo bukwiriye?

Igihe nari mfunzwe, namaze amezi arenga ane ntasohoka mu nzu. Ibyo byarushijeho kugorana, kuko icyo gihe nabanaga n’umuhungu wanjye ndetse n’umuryango we mu nzu y’icyumba kimwe. Twari abantu barindwi muri iyo nzu. Kuba rero ntarashoboraga kugira aho njya, byatangiye kungiraho ingaruka. Ariko gutekereza ku magambo yo mu Migani 24:10 byaramfashije. Ayo magambo agira ati: “Nucika intege igihe uhanganye n’ibibazo, imbaraga zawe zizaba nke.” Niboneye ko ngomba guhitamo ibyo ngomba kwibandaho, niba ngomba kwibanda ku bintu byiza cyangwa ku bintu bishobora kunca intege. Nanone nibutse urugero rwa Yozefu. Igihe yari afunzwe, ntiyigeze yemera ko ubuzima yari arimo bumuhindura umurakare. Ubwo rero niyemeje kujya ntekereza ku bintu byiza mfite kandi ibyo byatumye nkomeza kugira ibyishimo.

Dushimishwa n’izi ngero nziza z’abagaragu ba Yehova bakomeje kuba indahemuka. Nanone dushimishwa no kumenya ko Yehova yibonera ibigeragezo duhura na byo kandi ko azaha imigisha abamubera indahemuka.—Zaburi 37:18.

Uko ibintu byagiye bikurikirana

Ku itariki ya 16 Gashyantare 2023

Kishta yatangiye gukurikiranwaho icyaha
Ku itariki ya 28 Gashyantare 2023

Urugo rwa Kishta rwarasatswe, kandi bajya kumufunga by’agateganyo
Ku itariki ya 1 Werurwe 2023

Tsagan yirukanywe ku kazi bitewe n’uko abantu bamenye ko ari gukurikiranwaho icyaha. Kishta yarafunguwe ariko ategekwa kutava iwe
Ku itariki ya 21 Nyakanga 2023

Kishta yemerewe noneho kuba yava iwe
Ku itariki ya 19 Ukuboza 2023

Yekaterina na Tsagan batangiye gukurikiranwa mu nkiko. Bombi bategetswe kutarenga agace batuyemo
Ku itariki ya 9 Gashyantare 2024

Kishta yategetswe kutarenga agace atuyemo
Ku itariki ya 1 Mata 2024

Urubanza rwabo ni bwo rwatangiye
Ku itariki ya 24 Kamena 2024

Bahamijwe icyaha kandi bakatirwa igifungo gisubitse

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU