25 NYAKANGA 2023
U BURUSIYA

Gusenga no gukomeza kugira imyifatire myiza ni byo bikomeza Abahamya bo mu gace ka Vladivostok

FUNGURA

Urukiko rw’akarere ka Pervorechenskiy ruherereye mu gace ka Vladivostok, vuba aha ruzatangaza umwanzuro warwo mu rubanza ruregwamo mushiki wacu Nina Astvatsaturova, Yelena Barmakina, Ludviga Katanaeva, Yekaterina Treguba, Yelena Tsorn, umuvandimwe Igor Lonchakov na Yuriy Redozubov. Umushinjacyaha nta gihano arabasabira.

Icyo twabavugaho

Yelena Barmakina

Igihe yavukiye: 1967 (Cherepanovo mu ntara ya Novosibirsk)

Ibimuranga: Akora akazi ko gufotora

Yamenyanye n’Abahamya ba Yehova nyuma y’uko mama we na musaza we batangiye kwiga Bibiliya. Yabatijwe mu mwaka 2000

Yashakanye na Dmitriy mu mwaka wa 2006. Mu mwaka wa 2023 ni bwo Dmitriy yakatiwe igifungo cy’imyaka umunani.

Ibyo yavuze

Ni iki cyagufashije kandi kikaguhumuriza muri ibi bihe bigoranye?

Nyuma yo gusaka urugo rwacu, njye n’umugabo wanjye bahise badufata kandi Dmitriy we yahise afungwa by’agateganyo. Si nari nzi icyo nagombaga gukora ntari kumwe n’umugabo wanjye n’icyo nari gukora ngo mufashe. Mu minsi ya mbere no gusenga byari byananiye kubera ko nari mfite ikiniga cyinshi. Icyakora naje kwibuka ko iyo mpangayitse cyane nabuze ibyo navuga mu isengesho, nshobora gusoma amasengesho yanditse muri Bibiliya y’abagaragu ba Yehova ba kera b’indahemuka maze Yehova akayabona nk’aho ari ayanjye (Abaroma 8:26). Ibyo byarampumurije cyane muri ibyo bihe bitari byoroshye.

Igor Lonchakov

Igihe yavukiye: 1977 (Saratov mu ntara ya Saratov)

Ibimuranga: Yari ashinzwe itumanaho mu biro by’iposita

Igihe Igor yigaga mu mashuri yisumbuye ni bwo mama we yabaye Umuhamya wa Yehova. Ibyishimo mama we yagiraga ni byo byatumye nawe atangira kwiga Bibiliya. Yabatijwe mu mwaka wa 2008

Ibyo yavuze

Ni uwuhe murongo wo muri Bibiliya wagufashije cyane?

Ibibazo by’ubuzima, imihangayiko n’ubukene nahuye na byo, byatumye nongera gutekereza uburyo nahoze mbayeho neza. Nasenze Yehova mubwira uko niyumvaga. Nyuma yaho natekereje ku magambo ari mu Mubwiriza 7:10, hagira hati: “Ntukavuge uti: ‘kuki iminsi ya kera yari myiza kurusha iy’ubu?’ Ubwenge si bwo buba buguteye kubaza utyo.” Uwo murongo watumye ndeka kwitekerezaho ahubwo ntekereza ku migisha mfite; urugero kuba nari mfite mama, umukobwa twifuza kubana n’abavandimwe na bashiki bacu bo mu itorero. Bose baramfashije cyane. Icy’ingenzi kurushaho, nzi neza ko Yehova ari kumwe nanjye. Buri gihe iyo ngiye gusenga, nshimira Yehova kubera iyo migisha yose yampaye, aho kumubwira ibibazo byanjye gusa.

Yuriy Redozubov

Igihe yavukiye: 1972 (Komsomolsk-on-Amur mu ntara ya Khabarovsk)

Ibimuranga: Akiri umwana yize ibijyanye no gushushanya. Yigishije ibijyanye n’ubugeni

Yashakanye na Anastasiya mu mwaka wa 1998. Bafite abakobwa batatu

We n’umugore we batangiye kujya basomera hamwe Bibiliya. Bamaze guhura n’Abahamya ba Yehova bishimiye ukuntu babonye muri Bibiliya ibisubizo by’ibibazo byose bibazaga. Anastasiya yabatijwe mu mwaka wa 2003 naho Yuriy we abatizwa mu mwaka wa 2004

Ibyo yavuze

Ni mu buhe buryo gusenga byagufashije kwihangana?

Kuva ibitotezo byatangira, narushijeho gusenga ngusha ku ngingo. Kandi niyemeje kujya nsenga Yehova buri gihe uko ibibazo nahura na byo byaba bimeze kose. Kimwe mu bintu nsenga nsaba Yehova ni ukumfasha ngakomeza gutuza. Ayo masengesho yatumye njye n’umuryango wanjye tudacika intege cyangwa ngo duhangayike cyane. Ahubwo numva ari imigisha gukomeza gukorera Yehova muri iyo mimerere itoroshye. Ubu numva nararushijeho kuba incuti ya Yehova.

Yekaterina Treguba

Igihe yavukiye: 1991 (Vladivostok mu ntara ya Primorye)

Ibimuranga: Yigisha icyongereza

Akiri umwana nyirakuru yajyaga amusomera igitabo cy’Amateka ya Bibiliya. Yatangiye kwiyigisha Bibiliya afite imyaka 15. Yabatijwe mu mwaka wa 2008

Ibyo yavuze

Ibyakubayeho byakwigishije iki?

Kimwe mu bintu byangoye ni ugukomeza kugira ibyishimo kandi mpanganye n’ibibazo. Nasomaga inkuru z’abavandimwe na bashiki bacu bari bafunzwe, kandi uko babaga bafite ibibazo bikomeye niko barushagaho kugira ibyishimo. Icyakora siniyumvishaga ikintu cyari gutuma ngira ibyishimo. Gutekereza ku magambo y’indirimbo y’Ubwami ya 111, ifite umutwe uvuga ngo: “Impamvu zituma tugira ibyishimo,” byaramfashije. Muri iyo ndirimbo harimo amagambo agira ati: “Dufite ibyishimo byinshi, duheshwa na Bibiliya.” Ayo magambo yatumye ntangira gutekereza ku buryo nakwiyigisha neza Ijambo ry’Imana Bibiliya, ngasenga buri gihe nsaba kugira ibyishimo kandi narabibonye.

Yelena Tsorn

Igihe yavukiye: 1972 (Vladivostok mu ntara ya Primorye)

Ibimuranga: Yabaye umwarimu n’umuyobozi w’ikigo kirererwamo abana

Umuhamya wa Yehova bari baturanye yamufashije kubona ibisubizo by’ibibazo yibazaga ku birebana n’imibabaro n’urupfu. Yabatijwe mu mwaka wa 2011

Ibyo yavuze

Ni iki cyagufashije gukomeza kurangwa n’icyizere?

Iyo ntekereje ku myaka mike ishize, nemera ntashidikanya ko Yehova ari we wamfashije mu bintu byose. Buri gihe aba azi ibirimo biba. Nkunda gutekereza ku isezerano rye riri muri Yesaya 54:17, rigira riti: “Intwaro yose yacuriwe kukurwanya nta cyo izageraho . . . Uwo ni wo murage w’abagaragu ba Yehova.” Iri sezerano rimfasha kwibanda ku by’igihe kizaza no kugaragaza ko nshimira kubera urukundo Yehova n’abavandimwe bangaragariza

Duhumurizwa no kumenya ko Yehova akomeza guha umugisha abagaragu be b’indahemuka, akabitaho, ‘akabereka ko abemera kandi akabarinda.’—Zaburi 5:12.

Uko ibintu byagiye bikurikirana

Ku itariki ya 6 Kanama 2019

Yelena Barmakina yashinjwe ibyaha
Ku itariki ya 8 Kamena 2020

Nina, Ludviga na Yelena Tsorn bakorewe dosiye
Ku itariki ya 17 Kamena 2020

Ni bwo urubanza rwa Yelena Barmakina rwatangiye
Ku itariki ya 9 Nyakanga 2020

Urugo rwa Nina, Ludviga, Yelena Tsorn n’urwa Yuriy zarasatswe. Yuriy bagiye kumuhata ibibazo. Nina, Ludviga na Yelena Tsorn babujijwe kuva mu gace batuyemo
Ku itariki ya 4 Nzeri 2020

Igor yashinjwe ibyaha
Ku itariki ya 8 Nzeri 2020

Yekaterina yashinjwe ibyaha
Ku itariki ya 29 Nzeri 2020

Ikirego cya Yelena Barmakina bagishubije mu bushinjacyaha bitewe n’uko nta bimenyetso bihagije bari gushingiraho bamushinja ubutagondwa
Ku itariki ya 11 Kanama 2021

Yuriy yashinjwe ibyaha. Dosiye ya Yelena Barmakina yasubiwemo, maze ibirego byose birahuzwa
Ku itariki ya 28 Nzeri 2022

Nibwo urubanza rwatangiye

a b Ntitwabonye uko tuvugisha mushiki wacu Astvatsaturova na Katanaeva.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU