16 UKUBOZA 2021
U BURUSIYA

Gusoma Bibiliya buri gihe byafashije abavandimwe batanu na mushiki wacu kwihanganira ibigeragezo

FUNGURA

Uko ibintu byagiye bikurikirana

Vuba aha urukiko rw’akarere ka Leninskiy ruherereye mu gace ka Saransk ruzatangaza umwanzuro w’urukiko mu rubanza ruregwamo umuvandimwe Denis Antonov, Vladimir Atryakhin, Aleksandr Korolev, Aleksandr Shevchuk, Georgiy Nikulin na mushiki wacu Yelena Nikulina. Ubushinjacyaha nta gihano burabasabira
Ku itariki ya 11 Kamena 2021

Baburaniye bwa mbere mu rukiko rw’akarere ka Leninskiy mu gace ka Saransk
Ku itariki ya 2 Mata 2021

Yelena yashinjwe kwifatanya mu bikorwa by’umuryango wabuzanyijwe no gushaka abayoboke b’uwo muryango
Ku itariki ya 31 Werurwe 2021

Vladimir yashinjwe gutegura ibikorwa by’umuryango ukora ibikorwa by’ubutagondwa
Ku itariki ya 2 Nyakanga 2019

Aleksandr Shevchuk na Georgiy bararekuwe ariko babwirwa ko batemerewe kurenga agace batuyemo
Ku itariki ya 28 Werurwe 2019

Vladimir yararekuwe ava muri kasho ariko bamubwira ko atemerewe kuva mu gace atuyemo
Ku itariki ya 8 Gashyantare 2019

Aleksandr Shevchuk, Vladimir na Georgiy bagiye gufungwa by’agateganyo
Ku itariki ya 4 Gashyantare 2019

Urwego rushinzwe ubutasi rwatanze ikirego cyarwo rushinja abavandimwe batanu na mushiki wacu Yelena gutegura ibikorwa by’umuryango ushinjwa ubutagondwa

Icyo twabavugaho

Denis Antonov

Igihe yavukiye: 1976 (Syktyvkar, muri Repubulika ya Komi)

Ibimuranga: Akiri umwana, umuryango we wahoraga wimuka kubera akazi ka papa we. Yize ishuri ry’imyuga kugira ngo azakore mu bijyanye n’amashanyarazi no gukanika ibikoresho bikoreshwa mu gucukura amabuye y’agaciro

Yamaze imyaka itanu akora ibijyanye n’amashanyarazi aho bacukura amabuye y’agaciro. Akunda gufotora no gukina umukino wa esheki

Yibazaga byinshi ku birebana n’Imana. Yagiye agerageza gusobanukirwa ibitabo by’amadini na Bibiliya ariko ntiyagira icyo ageraho. Igihe yari mu gisirikare yatangiye kwandikirana n’incuti ye yiganaga Bibiliya n’Abahamya ba Yehova. Denis yakozwe ku mutima no kumenya ko izina ry’Imana ari Yehova kandi ko ibivugwa muri Bibiliya bihuje n’ukuri. Yabatijwe mu mwaka wa 1998, aba Umuhamya wa Yehova. Yashakanye na Olga mu mwaka wa 2015

Ibyo yavuze

Watubwira imirongo yo muri Bibiliya yagufashije kugira ubutwari no kwihangana?

Umwe mu mirongo nkunda cyane ni uwo mu Ntangiriro 15:1 . . . Uyu murongo wakomeje kungaruka mu bwenge cyane igihe abasirikare bo mu rwego rushinzwe ubutasi bansangaga iwanjye nimugoroba maze bakajya kumpata ibibazo. . . . Uwo murongo watumye ntuza kandi umfasha gukomeza kugira ukwizera.

Vladimir Atryakhin

Igihe yavukiye: 1987 (Rozhdestveno, muri Repubulika ya Morudaviya)

Ibimuranga: Yarezwe n’umubyeyi umwe. Afite murumuna we. Akunda gukina umupira w’amaguru, vole na hoke. Akora porogaramu za mudasobwa. Akora mu bijyanye no kugenzura uko mudasobwa zikora

Igihe yari akiri umunyeshuri yashishikazwaga na Bibiliya. Yabatijwe mu mwaka wa 2004 aba Umuhamya wa Yehova. Yashakanye na Mariya mu mwaka wa 2009. Bafite abana babiri bato, igihe bamufungaga umwe yari afite amezi 9 naho undi afite imyaka ibiri

Ibyo yavuze

Ni gute ubucuti ufitanye na Yehova bwarushijeho gukomera muri ibi bigeragezo?

Igihe natandukanaga n’umuryango wanjye, numvaga mbabaye cyane kandi mpangayitse. Igihe nari ndi muri gereza, umwe mu bahakoraga yari arimo kuzuza impapuro, maze ambaza impamvu abayobozi bamfunze. Mu gihe twaganiraga, namubwiye ko mpangayikiye umuryango wanjye. Yahise ambwira adaciye ku ruhande ati: “Incuti zawe ntizizaterana umuryango wawe.” . . . Yari azi neza ko abo duhuje ukwizera bazita ku muryango wanjye. . . Byanyeretse ko Yehova yakoresheje uwo mucungagereza kugira ngo anyibutse ko nshobora kumwiringira. Igihe navaga muri gereza kandi nkaganira n’umugore wanjye, nashimishijwe no kumenya ko Yehova yitaye ku muryango wanjye akoresheje abavandimwe.

Aleksandr Korolev

Igihe yavukiye: 1978 (Zemetchino, mu gace ka Penza)

Ibimuranga: Yakuze atabana na papa we. Akiri umwana yakundaga kuroba no gukina umupira w’amaguru. Arangije amashuri yisumbuye, yabaye umushoferi w’ikamyo n’imashini. Yanabaye umushumba kandi akora ibijyanye no kwita ku matungo. Ubu akora akazi k’ububaji

Kwigana Bibiliya n’Abahamya ba Yehova byatumye abona ibisubizo by’ibibazo yari amaze imyaka yibaza. Yabatijwe mu mwaka wa 1998. Mu mwaka wa 2006 yashakanye na Natalya wari ufite umwana w’umuhungu.

Ibyo yavuze

Kujya mu materaniro byakugiriye akahe kamaro?

Ibice bya Bibiliya dusoma mu materaniro yo mu mibyizi biramfasha cyane. Iyo nsuzumye ingero z’abagaragu ba Yehova bo mu gihe cyashize, bituma ngira ubutwari n’ukwizera nkabo. Nanone gushyira mu bikorwa inama tubona mu materaniro bimfasha gukomeza kugira imyitwarire myiza. Nkomeza gusenga Yehova musaba ubuyobozi bwo gukora ibyiza no kwirinda ibintu byatukisha izina rye.

Georgiy Nikulin

Igihe yavukiye: 1963 (Rovenky, muri Ukraine)

Ibimuranga: Yize ibijyanye no gukora imodoka no kuzitwara. Nanone azi gushushanya, gukora amaradiyo, kwita ku bikoresho no kubaza

Akunda cyane kwiga no kumenya ibintu bishya. Cyane cyane yashishikazwaga no kumenya aho abantu bakomotse. Kwigana Bibiliya n’Abahamya ba Yehova byatumye abona ibisubizo bimunyuze by’ibibazo yibazaga

Ibyo yavuze

Ni iki cyagufashije gukomeza kugira ukwizera n’ubutwari igihe wari ufunzwe?

Gukora ubushakashatsi ku mirongo yo muri Bibiliya no kuyitekerezaho byaramfashije. Nanone kandi [Bibiliya] irimo ingero nyinshi z’abagaragu ba Yehova bagaragaje ukwizera n’ubutwari. Nkunda cyane kuzitekerezaho no kubigana.

Tuzi ko kuva kera Satani yakoresheje ibinyoma kugira ngo aduce intege twe kwihangana. Tugomba kwitega ko abantu bazatubeshyera ariko ntitugomba kubiha agaciro.

Yelena Nikulina

Igihe yavukiye: 1968 (Monastyrskoe, Repubulika ya Morudoviya)

Ibimuranga: Akiri umwana yakundaga guserebeka ku rubura no kudoda. Yize ibijyanye n’ubudozi kandi nyuma yaho yaje gukora akazi ko gukora imideri. Yimukiye i Saransk n’i Tolyatti agiye gushaka akazi. Yakoze akazi ko kudoda. Ubu akora ibijyanye n’isuku

Yashakanye na Georgiy mu mwaka wa 2016. Batangiye kwiga Bibiliya. Bize ko Imana yita ku bantu kandi ko igira impuhwe n’urukundo. Yabatijwe mu mwaka wa 2017

Ibyo yavuze

Ni gute ubufasha wahawe n’abavandimwe bwakugiriye akamaro?

Hashize umwaka aba polisi basatse inzu yacu habaye inkongi y’umuriro inzu yacu irashya dusigara tudafite aho kuba. . . . Abavandimwe bacu batwitayeho cyane ku buryo byakoze ku mutima abo dufitanye isano batari Abahamya. Ubu barimo gushyira mu bikorwa ibyo Bibiliya yigisha kandi bakomeje gushyiraho imihati kugira ngo babe inshuti za Yehova.

Aleksandr Shevchuk

Igihe yavukiye: 1989 (Pyatigorsk, mu gace ka Stavropol)

Ibimuranga: Yize ibijyane n’imiterere y’ubutaka n’ubwubatsi. Yaje kwimukira i Saransk. Akora mu ruganda rukora ibikoresho byo mu nzu. Akunda gukina basiketi na tenisi

Sekuruza na nyirakuruza boherejwe muri Siberiya bazira ko ari Abahamya ba Yehova. Ababyeyi be bombi bavukiye muri Siberiya

Yabatijwe mu mwaka wa 2006. Yakoze imirimo isimbura iya gisirikare

Ibyo yavuze

Mu mezi ane wamaze ufunzwe, ni ibi ki byagufashije gukomeza kwihangana?

Igihe nari nkiri muto, buri gihe mu gitondo twafatiraga hamwe isomo ry’umunsi mu muryango. Ibyo nabigize akamenyero kandi ngeze no muri gereza narabikomeje. Nkigera muri gereza nta Bibiliya nari mfite, nageragezaga kwibuka imirongo nari narafashe mu mutwe cyangwa ingero z’abagaragu ba Yehova nari narasomye maze nkazitekerezaho. Umurongo nkunda cyane ni uwo muri Yesaya 40:26-31. Umfasha kutibagirwa ko Yehova ari we Muremyi kandi ko afite imbaraga nyinshi. Akoresha izo mbaraga kugira ngo atwiteho kandi adukomeze mu bihe bikomeye.

Twizeye ko Yehova azakomeza kugaragariza urukundo rudahemuka abavandimwe na bashiki bacu batotezwa bo mu Burusiya, igihe cyose bazakomeza kumwiringira.—Intangiriro 32:10.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU