24 NZERI 2021
U BURUSIYA

Gusoma Bibiliya no kwifatanya mu materaniro buri gihe byakomeje umuvandimwe Maksim Beltikov

FUNGURA

Uko ibintu byagiye bikurikirana

Urukiko rw’akarere ka Pavlovskiy mu ntara ya Krasnodar vuba aha ruzatangaza umwanzuro w’urubanza ruregwamo umuvandimwe Maksim Beltikov. a Ubushinjacyaha nta gihano buramusabira
Ku itariki ya 29 Kamena 2020

Yategetswe kutava mu gace atuyemo
Ku itariki ya 23 Kamena 2020

Yatangiye gukurikiranwaho ibyaha. Mu byo yaregwaga harimo “kwifatanya mu bikorwa by’idini byo kwigisha” hakubiyemo “kuyobora no gutega amatwi ibiganiro bishingiye ku bitabo by’imfashanyigisho za Bibiliya”
Ku itariki ya 29 Mata 2020

Abayobozi basatse urugo rwa Maksim. Nyuma yaho bamuhase ibibazo

Icyo twamuvugaho

Maksim Beltikov

Igihe yavukiye: 1980 (Baltiysk, mu gace ka Kaliningrad)

Ibimuranga: Akiri umwana yakundaga gucuranga indirimbo gakondo. Yabaye umwubatsi. Mubyara we ni we wamwigishije Bibiliya. Yashimishijwe no kumenya ko izina bwite ry’Imana ari Yehova. Nanone yatangajwe no kubona ukuntu ubuhanuzi bwo muri Bibiliya bugenda busohora n’ukuntu Bibiliya ikubiyemo inama z’ingirakamaro. Yabatijwe mu mwaka wa 2001. Yashakanye na Mariya mu mwaka wa 2005. Bafite abana batatu bakiri bato

Ibyo yavuze

Yehova yagufashije ate wowe n’umuryango wawe muri ibi bitotezo?

Yehova yaduhaye ibyo umuryango wange wari ukeneye byose ngo ukomeze kubaho no kumubera inshuti. Umugore wange n’abana bagerageje kwiyumvisha uko nari merewe kandi bakoraga uko bashoboye bakantera urwenya kugira ngo ne kwibanda ku bitotezo mpanganye na byo. Hari umuvandimwe wanteye inkunga akoresheje Zaburi ya 23. Yarambwiye ati: “Ntuzareke Yehova n’umuryango we. Ahubwo jya umureka akwiteho.”

Ni gute gusoma Bibiliya no kwifatanya mu materaniro byagufashije gukomeza kugira ibyishimo?

Gusoma Bibiliya buri gihe no kwifatanya mu materaniro byamfashije gukomeza kugira ibyishimo no kwizera ko Yehova anshyigikira muri byose. Nge n’umugore wange twifatanyije mu ikoraniro ry’iminsi itatu ryabereye i Seoul, muri Koreya y’Epfo, mu mwaka wa 2018. Umunsi wo ku Cyumweru, umuvandimwe watangaga disikuru yasabye abari mu gice gikoresha ururimi rw’Igikoreya ko abantu bose bafunzwe bazira ukwizera kwabo bahaguruka. Hahagurutse abavandimwe babarirwa mu bihumbi. Ndabyibuka neza naribwiye nti: ‘Niba aba barabishoboye, nta kabuza nange nzabishobora.’

Ni gute ibyakubayeho byatumye urushaho kuba inshuti ya Yehova?

Ubucuti mfitanye na Yehova ntibwarushijeho gukomera gusa ahubwo bwaranahindutse. Nsigaye nsenga amasengesho agusha ku ngingo. Igishishikaje ni uko ibyo nsaba atari byo bituma nsenga ngusha ku ngingo, ahubwo mba mfite ibintu byinshi byo gushimira Yehova ibyo bigatuma nonosora amasengesho yange. Natangiye gusoma Bibiliya nkoresheje ubundi buryo, nsoma nshaka ingero zihuje n’imimerere ndimo.

Twifuza ko abavandimwe na bashiki bacu bo mu Burusiya bakomeza gushikama kandi bagakomeza kugira ukwizera basoma Bibiliya kandi bagakomeza gukundana. Tuzi ko “Imana y’urukundo n’amahoro” izakomeza kubana na bo bavandimwe bacu dukunda.—2 Abakorinto 13:11.

a Hari igihe biba bitoroshye kumenya itariki urubanza ruzasomerwa.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU