4 MUTARAMA 2022
U BURUSIYA

Kwitegura no kugira ibyiringiro ni byo bifasha umuvandimwe Pyotr Krupnov n’umugore we Maya

FUNGURA

Uko ibintu byagiye bikurikirana

Ku itariki ya 30 Ukuboza 2021

Urukiko rw’akarere ka Nikolskiy, mu gace ka Penza rwahamije icyaha umuvandimwe Pyotr Krupnov n’umugore we Maya, kandi rubakatira igifungo gisubitse k’imyaka itatu. Ntibizaba ngombwa ko bajyanwa muri gereza
Ku itariki ya 25 Ukwakira 2021

Ni bwo urubanza rwatangiye
Ku itariki ya 12 Ukwakira 2021

Pyotr na Maya bongewe ku rutonde rw’abantu bakora ibikorwa by’iterabwoba kandi by’ubutagondwa kubera ko baganira n’inshuti zabo ku birebana n’idini
Ku itariki ya 15 Nzeri 2021

Maya yatangiye gukurikiranwaho ibyaha. Pyotr na we yashinjwe ibyaha atangira gukurikiranwa
Ku itariki ya 11 Ukwakira 2020

Abashinzwe umutekano basatse inzu enye z’Abahamya ba Yehova mu gace ka Nikolsk harimo n’inzu ya Krupnov

Icyo twabavugaho

Pyotr Krupnov

Igihe yavukiye: 1963

Ibimuranga: Ni umutekinisiye mu bijyanye n’amazi. Yatangiye kwigana Bibiliya n’Abahamya ba Yehova mu mwaka wa 1996. Amaze gusoma ibitabo byandikwaga n’Abahamya ba Yehova kandi akitegereza ukuntu uwamwigishaga Bibiliya yitwaraga byatumye yemera ko yabonye ukuri. Yabatijwe mu mwaka wa 2002

Yamenyanye na Maya bahuriye mu materaniro. Bashakanye mu mwaka wa 2008

Ibyo yavuze

Ese waba wibuka igihe wiboneye ko Yehova yagufashije?

Nibuka ko hari igihe nasenze nsaba umwuka wera, kandi nahise nibuka ibivugwa mu murongo wo muri Yohana 10:28, hagira hati: “Nta wuzazikura mu kuboko kwanjye.” Gutekereza kuri uwo murongo, byatumye numva nkomeye kandi nishimye. Numvise rwose ko Data wo mu ijuru andeba kandi ko amfasha. Ibyo byatumye numva ntuje cyane kandi nifitiye ikizere.

Ni iki kigufasha kwihangana?

Ngerageza kwibuka ko ibigeragezo duhura na byo nta cyo bivuze ugereranyije n’imigisha dukesha gukorera Yehova hamwe n’iyo tuzabona muri Paradizo iteka ryose. Urukundo nkunda Yehova n’urwo nkunda bagenzi bange, rutuma ngira imbaraga nkeneye maze ngahangana n’ibitotezo.

Maya Krupnova

Igihe yavukiye: 1957 (Atasu, muri Kazakisitani)

Ibimuranga: Yakoraga imigati. Ubu ari mu kiruhuko k’izabukuru kandi akunda gukora ubusitani.

Yamenye bwa mbere Abahamya ba Yehova kubera umukobwa we. Bombi babatijwe mu mwaka wa 2001

Ibyo yavuze

Ni gute witeguye ibi bitotezo?

Natangiye kwitegura igihe abavandimwe na bashiki bacu bo mu mugi duturanye bafungwaga. Nanone nasomye igitabo cya Esiteri n’icya Yeremiya. . . . Nasomaga amakuru yo ku rubuga rwacu kandi nkitoza gufata indirimbo mu mutwe. Ikindi nakoze nateguye agakapu ko guhungana n’akandi natwara ndamutse mfunzwe. . . . Nanone nasengaga nsaba kugira ubwenge n’ubutwari, kugira ngo mbashe kwihanganira ibitotezo ntuje kandi nifitiye ikizere.

Ni gute abavandimwe na bashiki bacu bagufashije?

Buri wese yambereye isoko y’ihumure cyanecyane igihe nabaga mbikeneye. Igihe numvaga nacitse intege abavandimwe na bashiki bacu barampamagaraga cyangwa bakanyandikira, bambwira ko bankunda. . . . Nari nsanzwe nzi ko mfite umuryango munini kandi unkunda. Ariko guhera mu mwaka wa 2020, narushijeho kubisobanukirwa.

Duterwa inkunga n’urugero rwa Pyotr na Maya bakomeje kuba indahemuka bitewe n’“ibyiringiro bimeze nk’igitsika ubwato” hamwe no kwishingikiriza kuri Yehova.—Abaheburayo 6:19.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU