10 KANAMA 2023
U BURUSIYA

Nubwo batotezwa, biyemeje gukomeza kugira ibyishimo

FUNGURA

Urukiko rw’akarere ka Syktyvkarskiy ruri muri Repubulika ya Komi, vuba aha ruzasoma umwanzuro w’urubanza ruregwamo umuvandimwe Aleksandr Ketov, Andrey Kharlamov, Aleksandr Kruglyakov, mushiki wacu Lidiya Nekrasova n’umuvandimwe Sergey Ushakhin. Umushinjacyaha nta gihano arabasabira.

Icyo twabavugaho

Andrey Kharlamov

Igihe yavukiye: 1971 (Syktyvkar)

Ibimuranga: Akora akazi ko kwita ku bikoresho bitanga ubushyuhe n’ubukonje

Yashakanye na Larisa mu mwaka wa 1990

Umukozi bakoranaga ni we watangiye kumubwira ibyerekeye Bibiliya. Gushyira mu bikorwa ibyo yigaga muri Bibiliya byatumye agira ubuzima bwiza. Andrey na Larisa bombi babatirijwe rimwe mu mwaka wa 1994

Ibyo yavuze

Ni iki cyagufashije kwihangana?

Buri kigeragezo cyose mpuye na cyose aba ari uburyo mbonye bwo kumfasha kurushaho kuba incuti ya Yehova. Bamaze kunshinja ibyaha, kubyihanganira byabanje kungora. Ariko uko igihe cyagiye gihita niboneye ko Yehova yamfashije mu buryo bwihariye. Yehova yakoresheje umuntu ambwira amagambo ateye inkunga. Nemera ntashidikanya ko Yehova yakomeje kunyitaho. Ibyo binyibutsa amagambo ari muri Yakobo 5:11, agira ati: “Tuvuga ko abihanganye ari bo bahiriwe. Mwumvise ibyo kwihangana kwa Yobu kandi mwabonye ibyo Yehova yamukoreye hanyuma, mwibonera ko Yehova afite urukundo rurangwa n’ubwuzu akaba n’umunyambabazi.” Kwibonera uburyo Yehova yagiye angaragariza imbabazi byatumye niyemeza gukomeza kumubera indahemuka no kumugaragariza ko mukunda.

Aleksandr Kruglyakov

Igihe yavukiye: 1979 (Ukhta muri Repubulika ya Komi)

Ibimuranga: Akora akazi ko kuranga imitungo itimukanwa igurishwa

Yatangiye gusoma Bibiliya akiri ingimbi. Kwigana Bibiliya n’Abahamya ba Yehova byamufashije kureka ubusinzi no gukoresha ibiyobyabwenge. Yabatijwe mu mwaka wa 2000

Yashakanye na Tatyana mu mwaka wa 2005

Ibyo yavuze

Ni iki cyaguteye inkunga yo gukomeza kubwiriza nubwo watotezwaga?

Muri Luka 21:12, 13, Yesu yahanuye ko abigishwa be bari kuzatotezwa, bagafungwa kandi bakajyanwa imbere y’abayobozi. Ariko nanone yaravuze ati: “Muzaboneraho uburyo bwo kubabwiriza.” Natekereje uburyo nari kumva nkozwe n’isoni iyo nza gufungwa, ariko nasubiza amaso inyuma ko hari igihe nabonye uburyo bwo kubwiriza simbukoreshe. Ibyo byatumye nishyiriraho intego yo kubwiriza abayobozi benshi bishoboka. Nakundaga kubabwira aho ibyo bakora bihuriye n’umurimo wacu. Twese tugerageza gutuma abaturage babaho neza. Bo babikora bafunga abanyabyaha kugira ngo batanduza abandi baturage. Icyakora, abo bantu iyo bafunguwe, inshuro nyinshi barongera bagakora ibintu bibi. Ariko Bibiliya yo ifasha abantu guhinduka burundu kandi bakaba abanyamahoro.

Sergey Ushakhin

Igihe yavukiye: 1961 (Pinyug muri ntara ya Kirov)

Ibimuranga: Akora mu ruganda rukora impapuro

Yashakanye na Nataliya mu mwaka wa 1987. Bafite umuhungu n’umukobwa

Yamenye Abahamya ba Yehova bwa mbere igihe mama we yatangiraga kwiga Bibiliya. Kubona ibisubizo by’ibibazo yibazaga muri Bibiliya byamwemeje ko yabonye ukuri. Yabatijwe mu mwaka wa 1999. Nataliya we yabatijwe mu mwaka wa 2005

Ibyo yavuze

Ni iki cyagufashije gukomeza kurangwa n’icyizere?

Ni ibisanzwe ko iyo umuntu yacitse intege bishobora gutuma yumva nta mbaraga afite kandi ntiyitware neza. Icyakora, gusenga, gusoma Bibiliya no kumarana igihe n’abavandimwe na bashiki bacu, byamfashije guhangana n’ikibazo cyo gucika intege. Nasenze Yehova musaba ngo amfashe mbashe gutera abandi inkunga, by’umwihariko abavandimwe na bashiki bacu bageze mu zabukuru. Kubafasha kugira ngo bakomeze kwibanda ku bintu byiza bitubaho no kubabwira amagambo yo kubatera inkunga byatumye ngira ibyishimo byinshi. Nishimira ko Yehova ankoresha muri ubwo buryo.

Nk’uko izi nkuru z’ibyabaye zibigaragaza, Yehova aha “imbaraga nyinshi” abavandimwe na bashiki bacu bahanganye n’ibigeragezo bagakomeza kumubera indahemuka.—Yesaya 40:29.

Uko ibintu byagiye bikurikirana

Ku itariki ya 2 Werurwe 2021

Ingo 14 z’Abahamya ba Yehova bo mu gace ka Syktyvkar zarasatswe. Aleksandr Ketov, Andrey Kharlamov na Aleksandr Kruglyakov barafashwe bafungwa by’agateganyo. Lydia Nekrasova na Sergey Ushakhin babujijwe kuva mu gace batuyemo
Ku itariki ya 3 Werurwe 2021

Aleksandr Ketov na Andrey Kharlamov bararekuwe maze bafungishwa ijisho. Aleksandr Kruglyakov yagiye gufungirwa kuri sitasiyo ya polisi
Ku itariki ya 27 Mata 2021

Andrey Kharlamov baretse gukomeza kumufungisha ijisho
Ku itariki ya 28 Mata 2021

Aleksandr Ketov baretse gukomeza kumufungisha ijisho na Aleksandr Kruglyakov ararekurwa
Ku itariki ya 9 Mata 2022

Ni bwo urubanza rwatangiye
Ku itariki ya 9 Kamena2022

Umucamanza yavuze ko nta bimenyetso yashingiraho abashinja ubutagondwa bituma urubanza rusubizwa mu bugenzacyaha
Ku itariki ya 14 Gashyantare 2023

Urubanza rwarasubukuwe ariko ruhabwa undi mucamanza

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU