27 KAMENA 2023
U BURUSIYA

Umuvandimwe Skvortsov na Tibiy bahamijwe ibyaha

FUNGURA

Ku itariki ya 20 Kamena 2023, urukiko rw’umujyi wa Taganrog uri mu ntara ya Rostov rwahamije icyaha umuvandimwe Aleksandr Skvortsov na Valeriy Tibiy. Aleksandr yakatiwe igifungo cy’imyaka irindwi. Kandi yafunzwe kuva ku itariki ya 7 Ukuboza 2021. Azaguma muri gereza. Valeriy we yakatiwe igifungo gisubitse cy’imyaka itandatu. Yafunzwe kuva ku itariki ya 18 Gicurasi 2022 kandi yahise arekurwa.

Icyo twabavugaho

Aleksandr Skvortsov

Igihe yavukiye: 1962 (Taganrog)

Ibimuranga: Yakoze akazi ko gusudira

Yashakanye na Larisa mu mwaka wa 1983. Bafite abakobwa babiri

Larisa ni we watangiye kwigana Bibiliya n’Abahamya ba Yehova maze abatizwa mu mwaka wa 1996. Aleksandr yashimishijwe cyane n’ibyiringiro byo muri Bibiliya by’uko hazabaho isi itarangwamo akarengane. Yabatijwe mu mwaka wa 1997

Mu mwaka wa 2015 ni bwo yahamijwe icyaha bwa mbere maze akatirwa igifungo gisubitse cy’imyaka itanu n’igice

Ibyo umugore we Larisa yavuze a

Ni iki cyafashije umugabo wawe kwihangana igihe yari afunzwe by’agateganyo?

Mu mwaka umwe gusa, Aleksandr yafungiwe muri kasho zigera kuri 13. Nubwo hari igihe kubana neza n’izindi mfungwa bitamworoheraga, yakoraga uko ashoboye kugira ngo abane amahoro na buri wese. Yakundaga kuvuga ko gusenga Yehova, gusoma Bibiliya n’amabaruwa bamwohererezaga byamufashije gukomeza kugira ukwizera gukomeye. Kuba atari kumwe n’umuryango we n’incuti ze ni byo byamukomereye ariko Yehova yaramufashije amuha amahoro yo mu mutima.

Ni mu buhe buryo ibyababayeho byatumye urushaho kuba incuti ya Yehova?

Ubu narushijeho kwiringira Yehova kurusha mbere. Kubona uburyo njye n’umugabo wanjye adufasha binyemeza ko adukunda cyane. Nanone kubona uburyo abavandimwe na bashiki bacu batwitaho no kumenya ko basenga badusabira biranshimisha cyane.

Valeriy Tibiy

Igihe yavukiye: 1977 (Novopokrovka muri Crimea)

Ibimuranga: Yatwaraga amakamyo

Amaze kumenya izina ry’Imana yahise atangira kwigana Bibiliya n’Abahamya ba Yehova. Yabatijwe mu mwaka wa 2004

Yashakanye na Kristina mu mwaka wa 2012

Ibyo umugore we Kristina yavuze b

Ni iki cyafashije Valeriy guhangana n’ibintu byamubagaho atari abyiteze igihe yari afungiwe kuri sitasiyo ya polisi?

Inshuro nyinshi, Valeriy asenga asaba gutuza n’imbaraga zo kwihanganira urusaku n’ubwinshi by’abantu baba bari kumwe na we muri kasho. Iyo mico myiza abantu baba bafunganywe nawe nabo barayibonera. Bakunda kumubaza bati: “Ni iki gituma uhora utuje? Rwose ni wowe muntu uhora yishimye. Valeriy yishimira ibiganiro agirana nabo bitewe n’uko Yehova amufasha gushyira mu bikorwa amahame yo muri Bibiliya. Abantu bafunganywe nawe bakunda kumugisha inama. Aba yumva Yehova amurinze kubera ko izindi mfungwa zimwubaha.

Muri ibi bihe bitoroshye n’uwuhe murongo wo muri Bibiliya wagufashije by’umwihariko?

Muri ibyo bitotezo byose twahuye na byo, umurongo wo mu Migani 3:6 wamfashije kurushaho kwishingikiriza kuri Yehova. Uwo murongo ugira uti: “Ujye umuzirikana mu nzira zawe zose, na we azagorora inzira zawe.” Yehova wenyine, ni we ufite ubwenge buruta ubw’ibiremwa byose. Nize ko iyo havutse ikibazo ngomba guhita nsoma Bibiliya kugira ngo menye uko Yehova abona icyo kibazo. Uko ibibazo twahuye na byo byabaga bimeze kose Yehova yakomeje kutwitaho.

Dushimira Yehova cyane kubera urukundo atugaragariza n’uburyo aturinda kandi ibyo bidufasha twihanganira ibigeragezo uko byaza bimeze kose.—Zaburi 5:12.

Uko ibintu byagiye bikurikirana

Ku itariki ya 20 Werurwe 2021

Urugo rwa Skvortsov rwarasatswe
Ku itariki ya 7 Ukuboza 2021

Urugo rwa Skvortsov rwasatswe ku nshuro ya kabiri hamwe n’izindi ngo 29 z’Abahamya ba Yehova bo muri Taganrog. Yashinjwe ibyaha kandi afungwa by’agateganyo
Ku itariki ya 8 Ukuboza 2021

Aleksandr yafunzwe by’agateganyo
Ku itariki ya 29 Werurwe 2022

Valeriy yakorewe dosiye
Ku itariki ya 31 Werurwe 2022

Abagenzacyaha bahurije hamwe ikirego cya Aleksandr n’icya Valeriy
Ku itariki ya 18 Gicurasi 2022

Valeriy yarafashwe maze afungirwa kuri sitasiyo ya polisi
Ku itariki ya 26 Gicurasi 2022

Valeriy yafunzwe by’agateganyo
Ku itariki ya 6 Ukuboza 2022

Ni bwo urubanza rwatangiye
Ku itariki ya 20 Kamena 2023

Aleksandr yakatiwe igifungo cy’imyaka irindwi. Valeriy we yakatiwe igifungo gisubitse cy’imyaka itandatu.

a b Igihe twateguraga iyi nkuru, ntitwabashije kuvugana n’umuvandimwe Skvortsov na Tibiy kubera ko bari bafunzwe by’agateganyo.

Reba nanone

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU