1 MATA 2019
U BURUSIYA

Undi Muhamya yakatiwe mu Burusiya

FUNGURA

Ku itariki ya 1 Mata 2019, urukiko rwakatiye Dennis Christensen igifungo k’imyaka itandatu, ruherutse gufatira umwanzuro undi Muhamya witwa Sergey Skrynnikov w’imyaka 56, rumuziza ukwizera kwe. Urwo rukiko rwamuciye amande menshi agera hafi kuri miriyoni eshanu z’amafaranga y’u Rwanda. Nubwo ubushinjacyaha bwamusabiraga igifungo k’imyaka itatu, nta gifungo yakatiwe.

Uwo Muhamya n’umugore we Nina, bafite umukobwa umwe. Bafasha umukobwa wabo n’umukwe wabo kurera abana babo batanu. Nanone kandi, uwo Muhamya yita kuri nyirabukwe na sebukwe bageze mu za bukuru.

Igihe Sergey yari imbere y’urukiko, yavuganiye ukwizera kwe mu buryo burangwa n’ikinyabupfura. Yaravuze ati: “Ibintu birimo bimbaho biramutse bibaye ku muntu udafite ukwizera, yakumva yihebye. . . . Ariko kubera ko nge ndi Umuhamya wa Yehova, nizeye ko ibintu bizageraho bikagenda neza. Imana niyemera ko urukiko runkatira imyaka itatu y’igifungo, sinzabona ko iyo myaka ari igihano, ahubwo nzabona ko ari inshingano mpawe yo kujya kubwiriza ahandi hantu. Sinihebye na mba! . . . Imana izakomeza imfashe naba mfunzwe cyangwa ntafunzwe. Ibyo binyereka ko ntari ngenyine. Iyo dukomeje kuba indahemuka Yehova atuba hafi.”

Ukwizera gukomeye kw’Abahamya bagenzi bacu, urugero nka Sergey, kuradukomeza. Iyo twibutse ibigeragezo bikomeye bahanganye na byo, bidutera kuvuga amagambo nk’ayo Pawulo yavuze igihe yasengaga Imana agira ati: “Imana itanga ibyiringiro ibuzuzemo ibyishimo byose n’amahoro bitewe no kwizera kwanyu, kugira ngo mugire ibyiringiro bisaze binyuze ku mbaraga z’umwuka wera.”—Abaroma 15:13.

Amagambo Sergey yavuze yongera ku rubanza

Yahinduwe avanywe mu Kirusiya

Mbere mbere mbanje gushimira Perezida w’urukiko Gleb Borisovich Noskov, kubera ko atemeye ko nkomeza gufungwa ntaraburana, kandi bigatuma nongera kubana n’umuryango wange. Nanone ndashimira abakozi bose b’urukiko.

Ndashimira kandi umushinjacyaha Nadezhda Gennadiyevna Naumova, kubera ko atemeye ko nshyirwaho iterabwoba igihe nabazwaga.

Nanone ndashimira abavoka bange ari bo Irina Aleksandrovna Krasnikova na Anton Nikolayevich Bogdanov kubera ibyiza bakoze ngo bamfashe. Mvugishije ukuri, natangajwe no kubona bazana impuguke iturutse mu mugi wa Chelyabinsk.

Ndashimira Abahamya bagenzi bange kubera ko buri gihe bazaga kumva urubanza kandi bakantera inkunga, nubwo babaga bazi ko batari bwemererwe kwinjira.

Ndashimira mama, kuko yazaga kunshyigikira nubwo yabaga arwaye.

Ndashimira umugore wange, kubera ko yanshyigikiye haba mu byiza no mu bibi, mu myaka 37 yose tumaranye.

Ariko by’umwihariko ndashimira Yehova Imana yange ko yampaye amahoro n’ibyishimo byo mu mutima. Mushobora kuba mutabyumva, ariko mbabwije ukuri, mu mutima wange nta cyo nicuza kandi nta mubabaro mfite; ahubwo ndishimye kandi mfite amahoro.

Ibirimo bimbaho, bihuje n’ubuhanuzi bwo mu rwandiko rwa kabiri rw’Abakorinto 4:8, 9, bugira buti: “Turabyigwa impande zose, ariko ntidutsikamiwe ku buryo tudashobora kwinyagambura; turashobewe ariko ntitwihebye rwose; turatotezwa ariko ntitwatereranywe; dukubitwa hasi ariko ntiturimburwa.”

Ayo magambo anyereka ko nubwo abagaragu b’Imana batotezwa, nanone bari gukomeza gusohoza inshingano Umwami Yesu yabahaye yo gutangaza ubutumwa bwiza. Ayo magambo areba abantu bose bihatira kwigana Kristo.

Muri Matayo 28:19, 20, Yesu yaravuze ati: “Ku bw’ibyo rero, nimugende muhindure abigishwa mu bantu bo mu mahanga yose, mubabatiza mu izina rya Data n’iry’Umwana n’iry’umwuka wera, mubigisha gukurikiza ibyo nabategetse byose. Kandi dore ndi kumwe namwe iminsi yose kugeza ku mperuka.”

Umwuka wa Yehova ukomeje gufasha Abakristo, ukabaha imbaraga zirenze izisanzwe; ibyo bibafasha gukora umurimo bahawe nubwo batotezwa. Iyo dutekereje ku bintu byabaye mu mateka y’Abahamya ba Yehova bo muri iki gihugu, dusanga ibyo ari ukuri. Mu myaka ya 1930, abagaragu b’Imana bakoze ibintu bisa n’ibidashoboka, kuko bagombaga kubwiriza mu cyahoze ari Leta Zunze Ubumwe z’Abasoviyeti hose. Ariko kubera ko uwo murimo wari ushyigikiwe na Kristo, yatumye ubutumwa bwiza bugera mu bice byose by’iki gihugu. Nyuma y’imyaka igera kuri 20, ni ukuvuga mu wa 1950, leta y’Abasoviyeti ubwayo yohereje imiryango y’Abahamya ibarirwa mu bihumbi mu gice cya kure cyane cya Siberiya. Ibyo bimaze imyaka irenga 60 bibaye. Ese hari icyo byatanze? Abategetsi bo muri Siberiya batangajwe no kubona uburyo ubutumwa bwiza bwakwiriye muri ako gace. Hari umuhanga, uzi amateka y’Abahamya bo muri Leta Zunze Ubumwe z’Abasoviyeti wagize ati: “Kurwanya Abahamya ba Yehova ni ukurushywa n’ubusa. Impamvu ni uko, uko urushaho kubatoteza, ni ko barushaho kujya mbere.”

Ibyabaye ku Bahamya ba Yehova icyo gihe, ni byo birimo bibabaho muri iki gihe. Ni ba nde duhura na bo iyo tubwiriza ku nzu n’inzu? Ni abagore n’abari mu kiruhuko k’iza bukuru. Ntushobora gusanga abantu bakiri bato mu ngo. Nanone, kubwiriza abantu baba mu mazu arinzwe cyane, urugero nka za gereza, inkiko no mu bindi bigo, ntibyoroshye. Ariko abo bantu na bo barabwirizwa bitewe n’uko uyu murimo wo kubwiriza uyobowe na Kristo kandi Yehova akaba yaratumye Minisiteri y’Ubutabera ikora ibyo ashaka. Umuntu yavuga ko Minisiteri y’Ubutabera, urwego rw’igihugu rushinzwe ubugenzacyaha, ibiro by’umushinjacyaha n’abagize inzego zishinzwe umutekano na bo bagize uruhare mu murimo wo kubwiriza kuko batumye Abahamya ba Yehova bagera ku bantu benshi kurushaho. Mu buhe buryo? Impamvu ni uko ibyo abo bayobozi bakoze, uhereye i Kaliningrad ukagera i Sakhalin, no mu birwa bya Kuril; uhereye muri Arkhangel’sk ukagera muri Crimea, na Yalta; mu miryango, ku kazi, muri za gereza, mu nkiko no mu bigo ngororamuco, hose usanga abantu bavuga ibyerekeye Yehova, Umutegetsi w’Ikirenga w’isi n’ijuru. Twebwe Abahamya ba Yehova ntitwari tuzi ko umurimo wo kubwiriza uzagera ku bantu benshi bigeze aho. Ubu ni nk’aho twugururiwe irindi rembo rigana mu murimo, tubona uburyo bwo kubwiriza ahandi hantu n’abandi bantu. Dushimishwa cyane no kubona ahantu hashya ho kubwiriza. Kandi ibyo tubifashwamo n’ibiro by’umushinjacyaha.

Ubu noneho reka dutekereze ku bintu bishobora kuzaba mu gihe kiri imbere. Leta y’iki gihugu iramutse imaze indi myaka icumi ifunga Abahamya ba Yehova, wazasanga muri buri gereza harimo nibura Abahamya 200. Tekereza nawe Abahamya ba Yehova bagize amatorero ane bari muri gereza imwe! Biramutse bigenze bityo, wasanga abayobozi ba za gereza ari bo basaba Minisiteri y’Ubutabera kurekura Abahamya ba Yehova. Mutekereza ko Abahamya ba Yehova bo baba basenga basaba iki icyo gihe? Baba bavuga bati: “Nyagasani turakwinginze, ntitwifuza ko abayobozi ba gereza batugirira impuhwe; ntitwifuza ko baturekura. Dufite abantu benshi twigisha Bibiliya, kandi hari abantu benshi tutarabwiriza.”

Icyakora urebye ibirimo bitubaho udafite ukwizera wakwiheba. Uwo muntu yavuga ati: “Sinigeze nica umuntu, nta we nibye nta n’uwo nigeze mbwira nabi. Ibyo ni byo bikubiye muri raporo zikunze gutangwa. Nyamara ibyo ntibibuza ubushinjacyaha gusaba ko mfungwa imyaka itatu.” Mu by’ukuri ibyo byagombye gutuma niheba, ariko kuko ndi Umuhamya wa Yehova ibyo ntibituma numva nihebye. Imana niyemera ko mfungwa iyo myaka itatu, sinzabona ko ari igihano, ahubwo nzabona ko ari inshingano nshya yo kubwiriza ahandi hantu. Ubwo rero sinihebye na mba. Nzabona ko iyo ari inshingano nziza yo gukorera Imana ahandi hantu hatari Abahamya. Iyo tugiye kubwiriza dusanga ibinyamakuru byarateguye umurima, twe twahagera tukabiba imbuto gusa.

Waba ufunzwe cyangwa udafunzwe Imana ikomeza kukuba hafi. Ntituri twenyine. Iyo dukomeje kuba indahemuka, Imana iradushyigikira. Niringiye ko Imana izampa imbaraga kandi ikampumuriza, kandi niba bihuje n’ibyo Imana ishaka, izatuma Perezida w’urukiko Naumova ategeka ko mfungwa, nk’uko ubushinjacyaha bubishaka. Ntegerezanyije amatsiko umwanzuro uzafatwa ku itariki ya 1 Mata. Mu Baheburayo 13:6 hanyizeza ko: ‘Yehova ari we umfasha, sinzatinya. Umuntu yantwara iki?’ Niboneye ukuntu Yehova yamfashije. Nta muntu n’umwe unteye ubwoba.

Sergey Skrynnikov