22 GICURASI 2023
U BURUSIYA

“Ushobora kugira ubutwari nubwo waba ufite ubwoba”

FUNGURA

Ku itariki ya 24 Werurwe 2023, urukiko rw’akarere ka Zheleznodorozhny ruri mu gace ka Krasnoyarsk rwatangaje umwanzuro warwo mu rubanza rwa mushiki wacu Nataliya Voropaeva. Yaciwe amande y’amafaranga y’u Rwanda asaga 5.400.000.

Icyo twamuvugaho

Nataliya Voropaeva

Igihe yavukiye: 1971 (Krasnoyarsk)

Ibimuranga: Akora mu bijyanye no gutunganya imisatsi

Yibazaga niba koko Imana ibaho kandi ku isi hariho imibabaro myinshi. Abahamya ba Yehova bamufashije kubona uburyo Bibiliya ye isubiza icyo kibazo. Yabatijwe mu mwaka wa 1996

Ibyo yavuze

Ni mu buhe buryo abavandimwe na bashiki bacu bagufashije?

Amagambo ya nyuma umuvandimwe Feliks Makhammadiyev yavuze ari mu rukiko, agira ati: “Kubaho nta ncuti ufite ni nko kuba ku isi itariho izuba.” Rwose nemeranya na we. Incuti zanjye ntizahwemye kumbera nk’urumuri rw’izuba runsusurutsa. Igihe polisi yakoraga iperereza ku kirego cyanjye naraguye maze mvunika akaguru. Bamaze kumbaga namaze amezi abiri mu buriri. Abavandimwe na bashiki bacu barantwaraga, bakajya kumpahira, bakantekera kandi bakoraga ibishoboka byose ngo bampumurize kandi bamfashe. Ikindi kandi abarenga 100 baje kunshyigikira igihe nakatirwaga. Nshimira Yehova kuba yarampaye incuti nziza, rwose ni umugisha. Uburyo bamfashije byanyibukije ko nta kintu cyabuza Yehova kungaragariza urukundo.

Ibyakubayeho byakwigishije iki?

Namenye ko burya, ushobora kugira ubutwari nubwo waba ufite ubwoba. Kandi koko igihe namenyaga ko Yehova anyemera ni bwo narushijeho kugira ubutwari. Uko ndushaho kuba incuti ya Yehova kandi ngasoma Ijambo rye buri munsi, bituma nibonera ko amfasha buri munsi. Ibyo binyemeza ko Yehova atazigera antererana.

Kimwe na Nataliya, natwe twiyemeje gukomeza “kugira ubutwari bwinshi tukavuga tuti: “Yehova ni we umfasha, sinzatinya.’”—Abaheburayo 13:6.

Uko ibintu byagiye bikurikirana

Ugushyingo 2017–Ugushyingo 2020

Abapolisi batangiye kumuneka kandi inzu yabagamo barayisaka. Igihe bakoraga iperereza ku muvandimwe Andrey Stupnikov, umugore we Nataliya bamuhase ibibazo
Ku itariki ya 5 Nzeri 2022

Bamukoreye idosiye
Ku itariki ya 6 Nzeri 2022

Yabujijwe kuva mu gace atuyemo
Ku itariki ya 20 Ukwakira 2022

Bamushinje ibyaha
Ku itariki ya 27 Gashyantare 2023

Ni bwo urubanza rwe rwatangiye
Ku itariki ya 24 Werurwe 2023

Bamuciye amande angana n’amafaranga y’u Rwanda asaga 5.400.000.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU