23 GICURASI 2024
U BURUSIYA

“Yehova azabana nanjye”

FUNGURA

Urukiko rw’akarere ka Urupskiy ko muri Repubulika ya Karachayevo-Circassian, vuba aha ruzatangaza umwanzuro w’urubanza ruregwamo umuvandimwe Aleksey Pasynkov. Ubushinjacyaha nta gihano buramusabira.

Icyo twamuvugaho

Aleksey Pasynkov

Igihe yavukiye: 1988 (Moscow, mu gace ka Moscow)

Ibimuranga: Yarezwe na mama we gusa. Aleksey akora iby’amazi no gutunganya imbere mu nzu

Mama we yatangiye kwigana Bibiliya n’Abahamya ba Yehova, igihe Aleksey yari afite imyaka 10. Yakozwe ku mutima n’ukuntu Abahamya bubaha Bibiliya n’urukundo bagaragaza. Mama we yabatijwe mu mwaka wa 2000, Aleksey we abatizwa muri 2002

Yashakanye na Yuliya mu mwaka wa 2013. Bafite umwana umwe w’umuhungu, ufite ubumuga

Ibyo yavuze

Ni uwuhe murongo wa Bibiliya ugufasha kwihangana wowe n’umugore wawe?

Akenshi nkunda gutekereza ku magambo ari mu 1 Abakorinto 10:13, agira ati: “Nta kigeragezo cyabagezeho kitari rusange ku bantu. Ariko Imana ni iyo kwizerwa, kandi ntizabareka ngo mugeragezwe ibirenze ibyo mushobora kwihanganira, ahubwo nanone izajya ibacira akanzu muri icyo kigeragezo, kugira ngo mushobore kucyihanganira.” Mu myaka ishize, njye n’umugore wanjye twagiye duhura n’ibibazo bikomeye. Umuhungu wacu yavukanye ikibazo gikomeye cyo mu mutwe. Ubu afite imyaka umunani kandi akenera guhora yitabwaho. Muri 2021, ababyeyi b’umugore wanjye bakoze impanuka. Papa we yahise apfa, mama we aramugara. Nyuma y’aho twahise duhura n’iki kigeragezo duhanganye na cyo. Uyu murongo wa Bibiliya unyibutsa ko ibi bibazo ari bimwe mu bihe bigoye bigize ubuzima bwo muri iyi si. Ariko inshuro nyinshi twagiye twibonera ko Yehova aturi hafi, kandi ko akomeza kuduha imbaraga kugira ngo twihangane. Nzishimira kubona ibi bibazo byose birangira. Nanone nizeye ntashidikanya ko nubwo ibigeragezo mpura na byo, byamara igihe kirere, Yehova azabana nanjye.

Twishimira kumenya ko uko ibibazo twahura na byo byaba bimeze kose, Yehova ashobora kudutabara kandi tugakomeza kugira ibyishimo.—Zaburi 5:11.

Uko ibintu byagiye bikurikirana

Ku itariki ya 23 Ugushyingo 2021

Abapolisi bagiye gufata Aleksey aho akorera, maze bajya no gusaka mu rugo iwe
Ku itariki ya 8 Ukuboza 2022

Yatangiye gukurikiranwaho icyaha
Ku itariki ya 3 Werurwe 2023

Urugo rwe rwongeye gusakwa. Aleksey na Yuliya bahaswe ibibazo
Ku itariki ya 31 Werurwe 2023

Urugo rwa mama wa Aleksey n’iz’abavandimwe be zarasatswe
Ku itariki ya 4 Ukwakira 2023

Yategetswe kutarenga agace atuyemo
Ku itariki ya 14 Ukuboza 2023

Ni bwo urubanza rwe rwatangiye

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU