27 MUTARAMA 2022
U BURUSIYA

Yehova yafashije abavandimwe babiri bakomeza kugira ubutwari

FUNGURA

Urukiko rw’akarere ka Kirsanovskiy ruri mu ntara ya Tambov, vuba aha ruzasoma umwanzuro w’urubanza ruregwamo umuvandimwe Anton Kuzhelkov na Nikolay Prokhorov. Umushinjacyaha nta gihano arabasabira.

Uko ibintu byagiye bikurikirana

Ku itariki ya 21 Ukuboza 2020

Abayobozi batangiye gukora iperereza ku muvandimwe Anton na Nikolay babaziza gutegura ibikorwa by’umuryango ushinjwa ubutagondwa
Ku itariki ya 24 Ukuboza 2020

Abashinzwe iperereza basatse ahantu 19 harimo n’urugo rwa Anton. Anton bamujyanye ku birometero 350 uvuye iwe bagiye kumuhata ibibazo. Nikolay nawe yahaswe ibibazo kandi ategekwa kutava mu rugo
Ku itariki ya 25 Ukuboza 2020

Anton ntiyemerewe gusubira iwe ahubwo yarafunzwe
Ku itariki ya 30 Kanama 2021

Anton yimuriwe ku y’indi sitasiyo ya porisi

Icyo twabavugaho

Anton Kuzhelkov

Igihe yavukiye: 1993 (Sortavala muri Repuburika ya Karelia)

Ibimuranga: Ni imfura mu bahungu batatu. Akiri umwana yakundaga kuroba amafi no guserebeka ku rubura. Se ni we wamwigishije kubaka

Yabatijwe mu mwaka wa 2007. Yashakanye na Alyona mu mwaka wa 2015

Ibyo Alyona, umugore wa Anton yavuze a

Ni ibihe bibazo wahuye na byo igihe wabaga wagiye gusura Anton?

Igihe bamwemereraga gusurwa, najyaga mu biro by’umugenzacyaha kabiri mu kwezi ngiye kumusaba urwo ruhushya. Ibyo byarangoraga cyane bigatuma mpangayika. Nanone kugira ngo njye ku mureba nagombaga kubanza kwerekana icyemezo kerekana ko ntarwaye COVID-19. Kandi kwipimisha byari bihenze.

Mbabazwa n’uko gahunda yo kumusura yahagaze. Icyakora urubanza rwe rwaratangiye, ubwo rero iyo ari buburane banyemerera kujyayo. Ariko urubanza rubera mu mugi uri ku birometero 100 uvuye mu rugo.

Ni iki gifasha umugabo wawe kwihangana igihe afunzwe?

Gusenga amasengesho avuye ku mutima rimwe na rimwe agasenga yinginga anarira bimufasha kwihangana. Mu bintu byose ahura na byo yibonera ko Yehova amushyigikiye. . . . Nanone akunda kwitegereza ibyaremwe. Urugero iyo agiye gutembera mu kibuga akunda kwitegereza inyoni. . . . Atekereza ku bwenge bw’Umuremyi no ku rugero rw’ibishwi Yesu yatanze. . . . Ibyo bintu byose bimufasha gukomeza kwishima.

Nikolay Prokhorov

Igihe yavukiye: 1964 (Morshan mu ntara ya Tambov)

Ibimuranga: Yabaye umusirikare. Akunda koga no gutembera

Yashakanye na Yelena mu mwaka wa 2008. Bafite umuhungu n’umukobwa. Bamaze kwibonera uko Abahamya ba Yehova bagira imico myiza byatumye batangira kwiga Bibiliya. Babatijwe mu mwaka wa 2008

Ibyo yavuze

Ese watubwira igihe wagezemo ukibonera ko ari Yehova ugufashije?

Niyo ndi mu bihe bitanyoroheye nibonera ko Yehova anshyigikiye cyane. . . . Hari igihe nigeze kwisanga ndi kumwe n’abayobozi gusa kandi intego yabo yari uko nakora ibyo bashaka, byakwanga bagashaka icyo bandega. . . . Aho nari nicaye ndi ngenyine nibazaga icyamfasha gukomeza kuba indahemuka kandi mfite ubwoba. Nahise nsenga Yehova musaba ko yamfasha akampa gutuza. Igihe umuporisi umwe yabonaga ko nubitse umutwe nsenga, yarambajije ati: “Uri gusenga usaba iki?” Naramubwiye nti: “Ndi gusaba ko ntakwibabarira bitewe n’ibibazo mfite.” Nahise nibuka amagambo ari muri Yesaya 54:17. Ayo magambo yamfashije kubona ko nta cyo bashobora kuntwara. Yatumye ngira ubutwari kandi n’abo baporisi barabyiboneye. Amaherezo barekeye aho kuntera ubwoba. Banansabye kutababikira inzika.

Ni mu buhe buryo Abakristo bagenzi bawe babafashije wowe n’umugore wawe?

Abagize itorero baradufashije cyane. N’ubwo abayobozi bashoboraga kubagirira nabi abenshi mu bagize itorero babashije kutuvugisha. Nanone bagenzi bacu bo mu Burusiya ndetse no mu bindi bihugu nabo baraduhamagaye.

Buri wese yaradufashije muri ibyo bihe bitoroshye. No mugihe cyo kuburana babaga baje kudutera inkunga . . . Urwo rukundo nyakuri abavandimwe batugaragarije rwabaye ubuhamya mu bari mu rubanza bose. Ibyo badukoreye byaradufashije njye n’umugore wange, bituma dukomeza gushikama muri ibi bihe bigoye.

Twiringiye ko Yehova azakomeza gufasha abavandimwe na bashiki bacu batotezwa bagakomeza kugira ubutwari.—Imigani 1:33.

a Umuvandimwe Kuzhelkov afunzwe by’agateganyo. Kumuvugisha nti byadukundiye.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU