2 KANAMA 2022
U BURUSIYA

Yishimira kuba agiye kugira uruhare mu mateka y’umuryango wacu

FUNGURA

Ku itariki ya 26 Nyakanga 2022, urukiko rw’umugi wa Snezhinskiy ruri mu gace ka Chelyabinsk rwahamije icyaha umuvandimwe Ilya Olenin. Umushinjacyaha yamusabiye igifungo cy’imyaka itandatu n’igice. Ariko urukiko rwamuciye amande y’amafaranga arenga 8.300.000 FRW.

Uko ibintu byagiye bikurikirana

Ku itariki ya 17 Mata 2017

Abapolisi b’u Burusiya bo mu rwego rushinzwe ubutasi barogoye umuhango wo kwibuka urupfu rwa Yesu. Umuvandimwe Ilya yashinjwe gukora umurimo w’ubumisiyonari ariko icyo kirego cyateshejwe agaciro.
Ku itariki ya 30 Ugushyingo 2020

Inzu ye barayisatse
Ku itariki ya 28 Nzeri 2021

Dosiye ye yashyikirijwe urukiko
Ku itariki ya 28 Ukwakira 2021

Urugo rwe rwasatswe ku nshuro ya kabiri. Bamujyanye kumuhata ibibazo kandi hari ibyo atari yemerewe gukora
Ku itariki ya 23 Gicurasi 2022

Urubanza rwaratangiye

Icyo twamuvugaho

Ilya Olenin

Igihe yavukiye: 1977 (Chelyabinsk, mu gace ka Chelyabinsk)

Ibimuranga: Igihe yari muto yakundaga gukora siporo. Mu mwaka 1993, umuryango we wakoze impanuka ikomeye, ajyanwa mu bitaro amaramo igihe kirekire. Akora akazi kajyanye n’iby’indege

Nyuma yo gukora impanuka yatangiye kwibaza intego y’ubuzima, bituma atangira gusoma Bibiliya. Yahuye n’Abahamya ba Yehova bwa mbere mu mwaka wa 1998. Kuba Bibiliya irimo inama zihuje n’ubwenge byatumye yemera ko ari iyo kwiringirwa. Yabatijwe mu mwaka 2006

Yashakanye na Natalya mu mwaka wa 2015. Bafite abana batatu

Ibyo yavuze

Iyo utekereje ibitotezo wahuye na byo wumva umeze ute?

Numva ari imigisha kuba ntotezwa. Nshimishwa n’uko ngira uruhare mu mateka y’umuryango wacu. Ariko nanone nzi ko bijyana n’inshingano. Ni nk’aho Yehova aba aregwa mu rukiko maze akemera ko tujya kuburanira izina rye. Amasengesho yanjye yarushijeho kugira ireme kandi agusha ku ngingo.

Ese haba hari igihe wabonye uburyo bwo kubwiriza igihe wari mu rukiko?

Igihe naganiraga n’ushinzwe iperereza, nakomezaga kumubwira ibijyanye n’imyizerere yanjye. Amaherezo yatangiye kumbaza ibibazo ku bijyanye na Bibiliya. Igihe twaganiraga bwa nyuma, twatekerezaga ko tutazongera kubonana. Nabonye ko ashobora kuziga Bibiliya kandi natunguwe n’uko yambwiye ko azabikora. Yanambajije ikibazo yazaheraho yiga.

Indi nkuru iteye inkunga n’ijyanye n’umwavoka wanjye. Igihe naburanaga bwa kabiri yazanye Bibiliya iriho igifuniko cy’uruhu maze ansaba ko namwereka umurongo urimo izina ry’Imana. Igihe twari mu rukiko, uwo mwavoka yegereye umushinjacyaha amusaba gusoma umurongo wo mu Kuva 15:3. Basomye uwo murongo mu ijwi riranguruye twese twumva. Ibyo byatumye bombi bamenya ko izina ry’Imana rivugwa muri Bibiliya.

Twishimira ko umuvandimwe Ilya n’abandi bavandimwe na bashiki bacu dukunda bakora ibihuje n’izina ryacu, bagahamya ibyerekeye Imana yacu Yehova.—Yesaya 43:10.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU