27 KAMENA 2019
U BUTALIYANI

Abaganga bashimishijwe n’uburyo bwo kuvura hadakoreshejwe amaraso

FUNGURA

Abaganga baje aho Abahamya batangiraga ibisobanuro mu nama yabereye i Palermo

Abaganga benshi bagize icyo bavuga kuri gahunda Abahamya ba Yehova bafite ku isi hose yo gutanga amakuru arebana n’uburyo bwo kuvura no kubaga hadakoreshejwe amaraso. Urwego rushinzwe gutanga amakuru ku bihereranye n’ubuvuzi (mu Butaliyani), rukorera ku biro by’Abahamya biri i Roma na rwo ruri muri iyo gahunda. Mu mwaka ushize, abahagarariye urwo rwego (mu Butaliyani) n’abari muri Komite zishinzwe guhuza abarwayi n’abaganga, berekanye ibyo bakora mu nama yahuje ihuriro ry’abanga batera ikinya, abagabanyiriza abarwayi ububabare n’abavura indembe, yabaye kuva ku itariki ya 10 kugeza ku ya 13 Ukwakira 2018, yabereye i Palermo, mu ntara ya Sicile. Iyo nama yahuje abahanga mu kubaga ikirangira, Abahamya babasobanuriye ibikorwa byabo.

Ubwo buba ari uburyo bwiza bwo guhanahana amakuru ahuje n’igihe n’abaganga babyifuza arebana no kuvura hadakoreshejwe amaraso. Iyo nama yabereye i Palermo yitabiriwe n’abaganga batera ikinya bagera ku 2.800, na ho iyabereye i Roma ni yo nama ya mbere yahuje abaganga babaga mu Butaliyani, kuko yitabiriwe n’abagera ku 3.500. Nanone yitabiriwe n’abayobozi b’ibitaro bikomeye. Muri bo harimo abari mu ihuriro ry’abaganga babaga bo mu Butaliyani n’abo muri Amerika. Hari ibigo bishamikiye kuri leta byashyigikiye iyo nama, urugero nka Minisiteri y’Ubuzima.

Vincenzo Scuderi, umuganga utera ikinya mu bitaro byo mu ntara ya Sicile, yageze aho Abahamya batangiraga ibisobanuro muri iyo nama. Ku itariki ya 18 Mutarama 2019, yavuye umurwayi w’Umuhamya wari urembye, ufite ikibazo gikomeye cy’umutsi ujyana amaraso. Yamubaze atamuteye amaraso, nubwo icyo gikorwa kitari cyoroshye. Uwo muganga yaravuze ati: “Ibisobanuro mwatanze muri iyi nama y’abaganga yo mu mwaka wa 2019, birumvikana. Inyandiko mwaduhaye zizadufasha cyane.”

Kugeza ubu, mu Butaliyani hari abaganga 5.000 bemera kuvura neza abarwayi b’Abahamya ba Yehova no kubabaga hadakoreshejwe amaraso. Buri mwaka, mu Butaliyani havurirwa Abahamya ba Yehova bagera ku 16.000 hadakoreshejwe amaraso.

Nyuma y’iyo nama, abaganga batera ikinya n’ababaga, bavuze uko byagenze igihe bavuraga abarwayi b’Abahamya

“Maze imyaka myinshi mvura abarwayi b’Abahamya ba Yehova. Mu myaka mike ishize, abaganga batera ikinya bahawe amabwiriza abafasha kumenya icyo bakora mu gihe umurwayi yanze guterwa amaraso. Ibyo byafashije abaganga bose kumenya uko barushaho kuvura abarwayi neza. Ayo mabwiriza yagaragazaga neza ko umurwayi afite ‘uburenganzira bwo kwemera cyangwa kwanga uburyo runaka bwo kuvurwa, nk’uko bivugwa mu Itegeko Nshinga (Ingingo ya 2, iya 13 n’iya 32), Itangazo Mpuzamahanga ku Burenganzira bw’Ikiremwamuntu, amasezerano ya Oviedo arengera ikiremwamuntu mu by’ubuvuzi n’amahame ibihugu by’u Burayi bigenderaho.”—Byavuzwe na Antonio Corcione, uhagarariye ikigo gishinzwe gusimbuza ingingo zirwaye, umuyobozi wa serivisi yo gutera ikinya no kwita ku ndembe mu bitaro bya Monaldi, akaba yarahoze ahagarariye ihuriro ryo mu Butaliyani ry’abaganga batera ikinya, abagabanyiriza abarwayi ububabare n’abavura indembe (SIAARTI)

“Ibyo nagiye mbona igihe navuraga Abahamya ba Yehova byatumye ge na bagenzi bange twongera gusuzuma icyo twakora ngo umurwayi adatakaza amaraso menshi, haba mbere yo kumubaga no mu gihe cyo kumubaga. Ubwo buryo bwafashije cyanecyane abantu banga guterwa amaraso kandi bituma natwe tugabanya umubare w’abarwayi dutera amaraso, nubwo baba bayemera.”—Ugo Boggi, umwarimu wigisha ibyo kubaga abarwayi muri Kaminuza ya Pisa (mu Butaliyani), umwarimu wungirije wigisha ibyo kubaga muri Kaminuza ya Pittsburgh (muri Leta Zunze Ubumwe za Amerika), akaba na perezida w’ihuriro ry’abaganga bo mu Butaliyani bakora ibirebana no gusimbuza ingingo (SITO)

“Mu bijyanye no gusimbuza ingingo zirwaye, gusimbuza umwijima biragorana cyane, kandi umurwayi aba ashobora gutakaza amaraso menshi. Nubwo bimeze bityo ariko, hari abarwayi bo hirya no hino ku isi babarirwa mu bihumbi bari barwaye umwijima, ariko ukaza gusimbuzwa; navuga ko twamenye uburyo twakoresha, kugira ngo umurwayi atava cyane. Ni uburyo bwizewe kandi bwakorewe isuzuma. Ubu tuzi icyo twakora kugira ngo twirinde gutera umurwayi amaraso. Abenshi mu barwayi twabaze umwijima, hamwe n’abari bawurwaye ariko tukawusimbuza, bavuwe bitabaye ngombwa ko baterwa amaraso. Mu gihe tubaga umwijima, ntibiba bikiri ngombwa ko dutera umurwayi amaraso, kubera ko aho gukoresha uburyo twakoreshaga kera, ubu tuba maso, tukabaga aho ikibazo nyirizina kiri. Numva dukwiriye gushimira Abahamya ba Yehova kubera ko batumye dutekereza ku buryo bwo kuvura, tutitagaho mu myaka 10 cyangwa 15 ishize, bwo kudatera abarwayi amaraso.”—Umberto Cillo, umwarimu muri Kaminuza ya Padua wigisha ibirebana no kubaga, kuvura umwijima no kuwusimbuza, akaba na perezida w’ihuriro ry’abaganga bo mu Butaliyani bakora ibirebana no gusimbuza ingingo (SITO)

“Nubaha cyane abarwayi b’Abahamya kubera ukuntu baba bakomeye ku myizerere yabo. Iyo ni yo mpamvu mu myaka ishize, nageragezaga gukora uko nshoboye kose ngo nubahirize ibyifuzo byabo. Ni abo kubahwa rwose. Abahamya ba Yehova ntibifuza gupfa cyangwa kwiyahura; baba bifuza guhabwa serivisi nziza.”—Francesco Corcione, umwarimu wigisha ibyo kubaga muri Kaminuza ya Naples Frédéric II, yahoze ari perezida w’ihuriro ry’abaganga bo mu Butaliyani babaga (SIC), akaba n’umwe mu bagize Académie Nationale de Chirurgie, i Paris, mu Bufaransa

“Igihe maze mvura Abahamya ba Yehova, cyatumye mbona ko burya abaganga n’abaforomo bakwiriye kubaha imico y’abarwayi n’imyizerere yabo. Ntekereza ko ibyo bihuje n’itegeko Nomero 219 ryo mu kwezi k’Ukuboza 2017, ryashyizweho n’u Butaliyani, rivuga ko ‘umuganga cyangwa umuforomo ashobora gutangira kuvura umurwayi ari uko gusa umurwayi asobanukiwe uburyo agiye kuvurwamo kandi akaba abwemera.’ Iyo umuganga asobanuriye neza umurwayi uko ari buvurwe, bombi baba barebwa n’ubwo buryo bwo kuvura, kandi umurwayi aba afite uburenganzira bwo guhitamo uko avurwa. Icyo gihe ni bwo umurwayi aba avuwe neza.”—Luca Ansaloni, diregiteri w’ishami rishinzwe kuvura indembe mu bitaro bya Bufalini, mu mugi wa Cesena, akaba na perezida w’ihuriro ry’abaganga bashinzwe ibirebana no kubaga no gusuzuma indwara (SIFIPAC)

“Abahamya ba Yehova bagize uruhare runini mu kudufasha kuvumbura uburyo bwiza bwo kuvura hadakoreshejwe amaraso. Uburyo bushya bwo kubaga, buzafasha cyane abaganga babaga ariko bakaba bifuza kubahiriza ibyifuzo by’abarwayi batemera guterwa amaraso bitewe n’imyizerere yabo. Kuvura umuntu utamuteye amaraso, ni byo bihendutse ugereranyije no kuyamutera.”—Diego Piazza, perezida w’ihuriro ry’abaganga bo mu mugi wa Catane, diregiteri w’ishami rishinzwe kurwanya no kuvura indwara mu bitaro bya Garibaldi-Nesima, mu mugi wa Catane, akaba yarahoze ari perezida w’ihuriro ry’abaganga bo mu Butaliyani (ACOI)

“Hari abantu batekereza ko guterwa amaraso nta cyo bitwaye. Bakunda guterwa amaraso kubera ko kuyabona byoroshye, bisa n’ibidahenze, kandi akaba azamura ingano y’amaraso mu buryo bwihuse. Ibyo ni byo bituma abaganga benshi bihutira gutera abarwayi amaraso. Icyakora uko imyaka yagiye ihita, byagaragaye ko gutera umurwayi amaraso, yaba amaraso yuzuye cyangwa ibice byayo, bishobora kumugiraho ingaruka. Ubushakashatsi bwinshi bwagaragaje ko abarwayi baterwa amaraso bahura n’ibibazo kurusha abarwayi batayatewe. Abatewe amaraso baba bashobora gupfa cyangwa bakaba barwaragurika ndetse bagatinda mu bitaro bitewe: no guturika udutsi two mu bwonko, kugira ibibazo by’impyiko, kuvura kw’amaraso, enfekisiyo cyangwa ibibazo byo guhumeka. Ntekereza ko uburyo Abahamya ba Yehova bavuwemo mu myaka 50 ishize, byatumye abaganga barushaho gusobanukirwa uburyo bwo kuvura hadakoreshejwe amaraso.”—Giandomenico Biancofiore, diregiteri w’ishami rishinzwe kubaga, gutera ikinya no kuvura indembe mu bitaro bya kaminuza bya Pisa, umwarimu muri Kaminuza ya Pisa wigisha ibyo gutera ikinya no kuvura indembe