Ntitwigisha Bibiliya gusa

FUNGURA

“Umuntu wese afite uburenganzira bwo kumenya gusoma no kwandika, kuko bituma yigirira icyizere kandi ibyo ni inkingi y’iterambere.”—UNESCO. *

HARI raporo zigaragaza ko ku isi hose hari abantu barenga miriyoni 700, bafite imyaka 15 kujyana hejuru, batazi gusoma no kwandika. Ibyo bituma abo bantu bacikanwa na byinshi. Muri byo harimo kutamenya inyigisho zo muri Bibiliya n’amahame arimo, kandi ‘yarandikiwe kutwigisha’ (Abaroma 15:4). Ni yo mpamvu mu bihugu byinshi, Abahamya ba Yehova bigisha abantu Bibiliya kandi bakabigisha gusoma no kwandika. Ibyo byose babikora ku buntu. Byagize akahe kamaro?

Reka dufate urugero rw’Abahamya ba Yehova bo mu gihugu cya Megizike, cyiganjemo abantu bavuga icyesipanyoli. Kuva mu mwaka wa 1946, Abahamya ba Yehova bigishije gusoma no kwandika abantu barenga 152.000, kandi abenshi muri bo na bo bagiye bigisha abandi. Abayobozi bandikiye Abahamya amabaruwa menshi babashimira icyo gikorwa bakoze. Hari ibaruwa yagize iti “Ikigo cy’Igihugu Gishinzwe Uburezi kirabashimira kuba mwarafashije leta muri gahunda yo kwigisha abantu bakuru gusoma no kwandika.”

Iyo gahunda yagiriye akamaro abakuru n’abato. Urugero, igihe Josefina yari afite imyaka 101, yatangiye kwiga gusoma no kwandika, kandi nyuma y’imyaka ibiri gusa yari amaze kubimenya.

Nubwo ururimi rw’ibanze rwo muri Megizike ari icyesipanyoli, si rwo rwonyine Abahamya bigisha abantu. Mu mwaka wa 2013, abantu bari mu matsinda umunani y’abasangwabutaka bigishijwe gusoma no kwandika mu ndimi zabo kavukire.

Iyo umuntu azi gusoma no kwandika bimufasha kwiga ibindi bintu. Ikiruta byose, ni uko bifasha abantu b’ingeri zose gusoma Bibiliya, igitabo cyahumetswe n’Imana. Icyo gitabo gishobora gutuma umuntu abaturwa, akareka imigenzo ijyanye n’ubupfumu, inyigisho zo mu madini y’ibinyoma n’imyifatire mibi.—Yohana 8:32.

^ par. 2 Ishami ry’Umuryango w’Abibumbye ryita ku Burezi, Ubumenyi n’Umuco.

YATANGAJE ABAGIZE UMURYANGO WE

Daniel yize ururimi rw’amarenga rwo muri Megizike yifashishije DVD

Daniel afite ubumuga bwo kutumva no kutavuga. Ibyo byatumaga akunda kurakazwa n’ubusa kandi agatuka abagize umuryango we. Igihe yari afite imyaka igera kuri 23, Umuhamya ufite ubumuga bwo kutumva witwa Josué yatangiye kumwigisha Bibiliya. Yatangiye amucira amarenga agakoresha n’amashusho. Nyuma yaho Josué yigishije Daniel ururimi rw’amarenga rwo muri Megizike akoresheje DVD. *

Daniel yize Bibiliya arahinduka maze atangira “kugwa neza, kwiyoroshya, kwitonda no kwihangana,” ari byo Bibiliya yita ‘kwambara umuntu mushya’ (Abakolosayi 3:10, 12). Nanone yazirikanye inama yo muri Bibiliya imusaba kumvira ababyeyi be no kububaha (Abefeso 6:1, 2). Abagize umuryango we byarabatangaje cyane! Nyina wa Daniel yashimiye Josué amarira azenga mu maso, kuko yamufashirije umuhungu we kumenya Imana. Mu wa 2007, Daniel yarabatijwe aba Umuhamya wa Yehova.

^ par. 12 Muri Megizike, hari ibitabo 46 biboneka kuri DVD mu rurimi rw’amarenga rwo muri icyo gihugu. Urubuga rwacu rwa jw.org ruriho ibitabo byo mu ndimi z’amarenga zigera kuri 80. Nanone hari inyandiko zisomwa n’abafite ubumuga bwo kutabona.