Niba ujya wumva amakuru avugwa hirya no hino ku isi, ushobora kuba warabonye ko hari igihe ibintu bibi bikorwa mu izina ry’idini. Amadini yose ntakomoka ku Mana y’ukuri (Matayo 7:​15). N’ikimenyimenyi, Bibiliya ivuga ko abantu benshi bayobye.​—Soma muri 1 Yohana 5:​19.

Icyakora Imana yita ku bantu bafite imitima itaryarya bakunda ukuri kandi bagakunda ibyiza (Yohana 4:​23). Itumirira abantu nk’abo kwiga ukuri ko mu Ijambo ryayo Bibiliya.​—Soma muri 1 Timoteyo 2:​3-5.

Kugira ngo Yehova Imana afashe abantu baturutse mu madini atandukanye kunga ubumwe, arimo arabigisha ukuri kandi akabatoza gukundana (Mika 4:​2, 3). Ubwo rero idini ry’ukuri uzaribwirwa n’uko abayoboke baryo bitanaho.​—Soma muri Yohana 13:​35.

Abasenga Imana by’ukuri bashingira imyizerere yabo n’imibereho yabo kuri Bibiliya (2 Timoteyo 3:​16). Nanone bubaha izina ry’Imana (Yeremiya 16:​21). Bashyigikira Ubwami bw’Imana kuko bazi ko ari bwo byiringiro rukumbi by’abantu (Daniyeli 2:​44). Bigana Yesu bagakorera abandi ibikorwa byiza, bityo ‘umucyo wabo ukamurika’ (Matayo 5:​16). Ku bw’ibyo, Abakristo b’ukuri uzababwirwa n’uko basura abaturanyi babo mu ngo, kugira ngo babagezeho ubutumwa bwiza bw’Ubwami bw’Imana.​—Soma muri Matayo 24:​14; Ibyakozwe 5:​42; 20:​20.