Amaganya 2:1-22
א [Alefu]
2 Mbega ngo Yehova ararakara agatwikiriza umukobwa w’i Siyoni igicu cy’umujinya we!
Yamanuye ubwiza bwa Isirayeli ku ijuru, abujugunya hasi.+
Ku munsi w’uburakari bwe ntiyibutse aho akandagiza ibirenge.*+
ב [Beti]
2 Yehova yarimbuye aho Yakobo atuye hose nta mpuhwe.
Yashenye ahantu hakomeye h’umukobwa w’u Buyuda afite umujinya mwinshi.+
Yarabishenye abigeza ku butaka, ahumanya ubwami+ n’abatware babwo.+
ג [Gimeli]
3 Yambuye Isirayeli imbaraga* zayo bitewe n’uburakari bwe bumeze nk’umuriro ugurumana.
Yashubije ukuboko kwe kw’iburyo inyuma, igihe umwanzi yari amwegereye;+Kandi uburakari bwe bukomeje kugurumanira Yakobo nk’umuriro utwika ibintu byose biwukikije.+
ד [Daleti]
4 Yahese umuheto* we nk’umwanzi. Ukuboko kwe kw’iburyo kwiteguye kurwana nk’umwanzi.+
Yakomeje kwica abantu beza bose.+
Yasutse umujinya we umeze nk’umuriro+ mu ihema ry’umukobwa w’i Siyoni.+
ה [He]
5 Yehova yabaye nk’umwanzi.+
Yarimbuye Isirayeli.
Yarimbuye iminara yaho yose,Asenya ahantu hayo hose hakomeye.
Yatumye umukobwa w’i Buyuda arira cyane kandi agira amaganya menshi.
ו [Wawu]
6 Asenya akazu ke ko kugamamo,+ nk’usenya akazu ko mu murima.
Umunsi mukuru we yawukuyeho.*+
Yehova yatumye iminsi mikuru n’isabato byibagirana muri Siyoni.
Mu gihe cy’uburakari bwe bwinshi ntiyubaha umwami n’umutambyi.+
ז [Zayini]
7 Yehova yataye igicaniro cye.
Yanze burundu urusengero rwe.+
Inkuta z’iminara yaho ikomeye yatumye zifatwa n’umwanzi.+
Amajwi yumvikanye mu nzu ya Yehova+ nk’ay’abari mu munsi mukuru.
ח [Heti]
8 Yehova yiyemeje gusenya urukuta rw’umukobwa w’i Siyoni.+
Yarambuye umugozi wo gupimisha.+
Ntiyashubije ukuboko kwe inyuma ngo areke kurimbura.*
Atuma ibyo kuririraho n’urukuta birira.
Byose byacikiye intege rimwe.
ט [Teti]
9 Amarembo yaho yatebeye mu butaka.+
Yarimbuye ibifashe inzugi zaho arabivunagura.
Umwami waho n’abatware baho bari mu bihugu.+
Nta mategeko* akihaba; abahanuzi baho na bo ntibakibona iyerekwa riturutse kuri Yehova.+
י [Yodi]
10 Abayobozi b’umukobwa w’i Siyoni bicaye hasi bacecetse.+
Bitera umukungugu ku mitwe kandi bakambara imyenda y’akababaro.*+
Abakobwa b’i Yerusalemu bubitse umutwe bawugeza ku butaka.
כ [Kafu]
11 Amaso yanjye ananijwe no kurira.+
Ibyo mu nda* yanjye biribirindura.
Umwijima wanjye wasutswe hasi bitewe no kurimbuka k’umukobwa* w’abantu banjye,+Bitewe n’uko abana n’impinja bitura hasi, ahahurira abantu benshi mu mujyi.+
ל [Lamedi]
12 Bakomeza kubaza ba mama babo bati: “Ibyokurya n’ibyokunywa biri he?”+
Bitewe n’uko bitura hasi nk’umuntu wakomerekeye mu mujyi ahahurira abantu benshi,Kubera ko bicirwa mu gituza cya ba mama babo.
מ [Memu]
13 Ubwo se nguhe uruhe rugero?
Cyangwa nkugereranye n’iki wa mukobwa w’i Yerusalemu we?
Wa mukobwa w’i Siyoni we, nakugereranya n’iki kugira ngo nguhumurize?
Kurimbuka kwawe ni kunini nk’inyanja.+ Ni nde wagukiza?+
נ [Nuni]
14 Ibyo abahanuzi bawe beretswe byari ibinyoma kandi nta cyo bimaze+Ntibyagaragaje icyaha cyawe kugira ngo utajyanwa mu kindi gihugu ku ngufu.+
Ahubwo bakomezaga kwerekwa, bakakubwira amagambo y’ibinyoma kandi ayobya.+
ס [Sameki]
15 Abantu baca mu muhanda bose bakoma amashyi bakaguseka.+
Bavugiriza batangaye+ kandi bakazunguriza umutwe umukobwa w’i Yerusalemu bavuga bati:
“Ese uyu ni wa mujyi bajyaga bavuga bati: ‘ni ubwiza butunganye, ibyishimo by’isi yose?’”+
פ [Pe]
16 Abanzi bawe bose bakuvuga nabi.
Baravugiriza kandi bakaguhekenyera amenyo bakavuga bati: “Twaramumize.+
Uyu ni wo munsi twari dutegereje.+ Wageze kandi turawureba.”+
ע [Ayini]
17 Yehova yakoze ibyo yiyemeje.+ Yashohoje ibyo yavuze,+Ibyo yategetse kera.+
Yarashenye ntiyagira impuhwe.+
Yatumye umwanzi wawe yishimira ko ugezweho n’ibyago. Yatumye abanzi bawe bakurusha imbaraga.*
צ [Tsade]
18 Yewe rukuta rw’umukobwa w’i Siyoni we, umutima w’abantu utakira Yehova.
Reka ku manywa na nijoro amarira atembe nk’umugezi.
Nturuhuke kandi ntutume ijisho* ryawe riruhuka.
ק [Kofu]
19 Haguruka urire ijoro ryose.
Suka ibiri mu mutima wawe imbere ya Yehova nk’usuka amazi.
Mutegere ibiganza kugira ngo abana bawe bakomeze kubaho,Abana bawe bakomeje kwitura hasi, ahantu hose imihanda ihurira bitewe n’inzara.+
ר [Reshi]
20 Yehova, reba kandi witegereze uwo wateje imibabaro myinshi.
Ese abagore bakwiriye gukomeza kurya ababakomokaho, bakarya abana bavutse igihe kigeze,*+Cyangwa se abatambyi n’abahanuzi bakwiriye kwicirwa mu rusengero rwa Yehova?+
ש [Shini]
21 Umuhungu ukiri muto n’umusaza barambaraye mu nzira.+
Abasore n’abakobwa* banjye bishwe n’inkota.+
Wabishe ku munsi w’uburakari bwawe. Warabishe ntiwabagirira impuhwe.+
ת [Tawu]
22 Wahamagaje ibiteye ubwoba+ biturutse impande zose, nk’ubihamagarije umunsi mukuru.
Ku munsi w’uburakari bwa Yehova nta n’umwe warokotse cyangwa ngo acike ku icumu;+Abo nabyaye kandi nkabarera, umwanzi wanjye yarabatsembye.+
Ibisobanuro ahagana hasi
^ Cyangwa “intebe y’ibirenge bye.”
^ Mu rurimi iki gitabo cyanditswemo ni “ihembe.”
^ Mu rurimi iki gitabo cyanditswemo ni “yabanze umuheto.”
^ Cyangwa “yarawushenye.”
^ Mu rurimi iki gitabo cyanditswemo ni “ngo areke kumira bunguri.”
^ Cyangwa “amabwiriza.”
^ Cyangwa “bakenyera ibigunira.”
^ Ni imvugo y’ubusizi ishobora kuba yumvikanisha impuhwe no kwishyira mu mwanya w’abandi.
^ Mu rurimi iki gitabo cyanditswemo ni “amara.”
^ Mu rurimi iki gitabo cyanditswemo ni “ihembe.”
^ Mu rurimi iki gitabo cyanditswemo ni “umukobwa w’ijisho ryawe.”
^ Cyangwa “bavutse bashyitse.”
^ Mu rurimi iki gitabo cyanditswemo ni “abakobwa b’amasugi.”
