Yeremiya 46:1-28
46 Ibi ni byo Yehova yabwiye umuhanuzi Yeremiya bizaba ku bihugu:+
2 Yavuze ibizaba kuri Egiputa,+ avuga ibizaba ku ngabo za Farawo Neko+ umwami wa Egiputa, wari ku Ruzi rwa Ufurate i Karikemishi, uwo Nebukadinezari* umwami w’i Babuloni yatsinze mu mwaka wa kane w’ubutegetsi bwa Yehoyakimu+ umuhungu wa Yosiya umwami w’u Buyuda, ati:
3 “Nimutegure ingabo nto* n’inini,Mujye ku rugamba.
4 Mwa bagendera ku mafarashi mwe, nimutegure amafarashi maze muyicareho.
Muhagarare mu myanya yanyu kandi mwambare ingofero zanyu.
Mutyaze amacumu kandi mwambare amakoti yanyu y’ibyuma.
5 Yehova aravuga ati: ‘Kuki mbona abishwe n’ubwoba?
Barimo barasubira inyuma kandi abarwanyi babo bajanjaguwe.
Bahunze bafite ubwoba, abarwanyi babo biruka ubutareba inyuma.
Ahantu hose hari ubwoba.’
6 ‘Uzi kwiruka cyane ntashobora guhunga kandi abarwanyi ntibashobora gutoroka.
Mu majyaruguru ku nkombe z’Uruzi rwa UfurateNi ho basitariye baragwa.’+
7 Uwo ni nde uzamutse nk’Uruzi rwa Nili,Ameze nk’inzuzi zifite amazi yivumbagatanyije?
8 Ni Egiputa izamutse imeze nk’Uruzi rwa Nili,+Imeze nk’inzuzi zifite amazi yivumbagatanyijeKandi iravuga iti: ‘nzazamuka ndengere isi yose.
Nzarimbura umujyi n’abawutuyemo.’
9 Muzamuke mwa mafarashi mwe!
Namwe mwa magare akururwa n’amafarashi mwe, mwiruke nk’abasazi!
Mureke abarwanyi bajye imbere,Ab’i Kushi n’ab’i Puti bitwaza ingabo,+N’ab’i Ludimu+ barwanisha imiheto kandi bakayikora.*+
10 “Uwo ni umunsi w’Umwami w’Ikirenga Yehova nyiri ingabo, umunsi azihorera ku banzi be. Inkota izarya ihage, ihage amaraso yabo, kuko Umwami w’Ikirenga Yehova nyiri ingabo afite igitambo azatambira mu gihugu cy’amajyaruguru ku Ruzi rwa Ufurate.+
11 Wa mukobwa wo muri Egiputa we,Zamuka ujye i Gileyadi ushake amavuta avura.+
Waruhijwe n’ubusa ushaka imiti yagukiza,Kuko nta muti uzakuvura ngo ukire.+
12 Ibihugu byumvise ko wakozwe n’isoni+Kandi ijwi ryo gutaka kwawe ryuzuye mu gihugu hose.
Kuko umurwanyi asitara ku wundi murwanyi,Maze bombi bakagwira icyarimwe.”
13 Ibi ni byo Yehova yabwiye umuhanuzi Yeremiya ku birebana no kuza kwa Nebukadinezari* umwami w’i Babuloni, aje kurimbura igihugu cya Egiputa, yaravuze ati:+
14 “Mubivuge muri Egiputa, mubitangaze i Migidoli,+Mubitangaze i Nofu* n’i Tahapanesi.+
Uvuge uti: ‘muhagarare mu myanya yanyu kandi mwitegure,Kuko inkota izica abantu babakikije bose.
15 Kuki abagabo bawe b’abanyambaraga bashize?
Ntibashoboye kwihagararaho,Kuko Yehova yabagushije hasi.
16 Basitara ari benshi maze bakagwa.
Barabwirana bati:
“Nimuze duhaguruke dusubire muri bene wacu no mu gihugu cyacu,Kuko inkota iri kwica abantu benshi.”’
17 Aho ni ho batangarije bati:
‘Farawo umwami wa Egiputa nta kindi ashoboye uretse gusakuza gusa!
Yitesheje uburyo bwiza* yari abonye.’+
18 Umwami witwa Yehova nyiri ingabo aravuga ati: ‘ndahiye mu izina ryanjye koAzaza* ameze nk’uko Tabori+ imeze mu misozi,Nk’uko Karumeli+ imeze ku nyanja.
19 Yewe mukobwa utuye muri Egiputa we,Tegura ibyo uzahungana,Kuko Nofu* izahinduka ikintu giteye ubwoba;Izatwikwa* isigare nta muntu uyituyemo.+
20 Egiputa imeze nk’inyana nziza cyane.
Ariko amasazi aryana cyane azayitera aturutse mu majyaruguru.
21 Abasirikare bayo bavuye mu bindi bihugu,* bameze nk’ibimasa bibyibushye,Ariko na bo basubiye inyuma maze bahungira rimwe.
Ntibashoboye kwihagararaho,+Kuko umunsi w’ibyago byabo wabagezeho.
Igihe cyo kubabaza ibyo bakoze cyari kigeze.’
22 ‘Ijwi ryayo rimeze nk’iry’inzoka ihunga;Bakurikira Egiputa bafite imbaraga nyinshi, bafite amashoka,Bameze nk’abantu bagiye gutema ibiti.*
23 Yehova aravuga ati: “bazatema ishyamba ryayo, nubwo bisa n’ibigoye kuryinjiramo kubera ibiti byinshi.
Kuko ari benshi cyane kuruta inzige; ntibabarika.
24 Umukobwa wo muri Egiputa azakorwa n’isoni.
Azahabwa abantu bo mu majyaruguru.”’+
25 “Yehova nyiri ingabo Imana ya Isirayeli aravuga ati: ‘ngiye guhagurukira Amoni+ yo muri No,*+ Farawo, Egiputa, imana zayo,+ abami bayo, ni ukuvuga Farawo n’abamwiringira bose.’+
26 “Yehova aravuga ati: ‘nzabateza abashaka kubica,* ni ukuvuga Nebukadinezari* umwami w’i Babuloni+ n’abagaragu be. Ariko nyuma yaho, Egiputa izongera guturwa nk’uko byahoze mbere.’+
27 Ariko wowe mugaragu wanjye Yakobo ntutinyeKandi nawe Isirayeli ntugire ubwoba.+
Kuko nzagukiza nkuvanye kureKandi abagukomokaho nzabagarura, mbavanye mu gihugu cy’abari barabajyanye ku ngufu.+
Yakobo azagaruka agire amahoro n’umutuzo,Nta muntu umutera ubwoba.+
28 Yehova aravuga ati: ‘wowe mugaragu wanjye Yakobo ntutinye, kuko ndi kumwe nawe.
Ibihugu byose nabatatanyirijemo nzabirimbura.+
Icyakora wowe sinzakurimbura+Nzagukosora mu rugero rukwiriye,+Ariko sinzabura kuguhana.’”
Ibisobanuro ahagana hasi
^ Mu rurimi iki gitabo cyanditswemo ni “Nebukadirezari,” akaba ari ubundi buryo bwo kuvuga iryo zina.
^ Ni ingabo nto akenshi zakoreshwaga n’abarashishaga imiheto.
^ Cyangwa “bakayibanga.”
^ Mu rurimi iki gitabo cyanditswemo ni “Nebukadirezari,” akaba ari ubundi buryo bwo kuvuga iryo zina.
^ Cyangwa “Memfisi.”
^ Mu rurimi iki gitabo cyanditswemo ni “igihe cyagenwe.”
^ Ni ukuvuga, uzatsinda Egiputa.
^ Cyangwa “Memfisi.”
^ Bishobora no kuvugwa ngo: “Izahinduka ahantu hadatuwe.”
^ Cyangwa “abacanshuro.”
^ Cyangwa “gushaka inkwi.”
^ Ni ukuvuga, Tebesi.
^ Cyangwa “abahiga ubugingo bwabo.”
^ Mu rurimi iki gitabo cyanditswemo ni “Nebukadirezari,” akaba ari ubundi buryo bwo kuvuga iryo zina.
