Yosuwa 3:1-17
-
Abisirayeli bambuka Yorodani (1-17)
3 Nuko Yosuwa n’Abisirayeli* bose bazinduka kare mu gitondo bava i Shitimu+ bagera kuri Yorodani, aba ari ho barara mbere yo kwambuka.
2 Hashize iminsi itatu, abayoboraga+ Abisirayeli banyura mu nkambi
3 babwira abantu bati: “Nimubona isanduku y’isezerano rya Yehova Imana yanyu, abatambyi b’Abalewi+ bayihetse, muzahite muhaguruka muyikurikire
4 kugira ngo mumenye inzira munyuramo, kuko ari ubwa mbere muzaba munyuze aha hantu. Ariko ntimuzayegere. Ahubwo hagati yanyu na yo hazabemo nka metero 890.”*
5 Yosuwa abwira Abisirayeli ati: “Mwitegure,+ kuko ejo Yehova azabakorera ibitangaza.”+
6 Yosuwa abwira abatambyi ati: “Mufate isanduku y’isezerano+ mugende imbere y’abantu.” Nuko bafata isanduku y’isezerano bagenda imbere y’abantu.
7 Yehova abwira Yosuwa ati: “Uyu munsi ndatangira kwereka Abisirayeli bose+ ko ufite icyubahiro, kugira ngo bamenye ko nzabana nawe+ nk’uko nabanaga na Mose.+
8 Utegeke abatambyi baheka isanduku y’isezerano uti: ‘nimugera ku nkombe ya Yorodani, muzinjire mu mazi muhagararemo.’”+
9 Yosuwa abwira Abisirayeli ati: “Nimuze hano mwumve amagambo Yehova Imana yanyu yambwiye.”
10 Hanyuma Yosuwa aravuga ati: “Iki ni cyo kizabamenyesha ko Imana ihoraho ibafasha+ kandi ko izirukana muri iki gihugu Abanyakanani, Abaheti, Abahivi, Abaperizi, Abagirugashi, Abamori n’Abayebusi.+
11 Dore isanduku y’isezerano ry’Umwami w’isi yose igiye kugenda imbere yanyu ibabanzirize muri Yorodani.
12 None nimutoranye abagabo 12 mu miryango ya Isirayeli, ni ukuvuga umwe muri buri muryango.+
13 Abatambyi bahetse Isanduku ya Yehova Umwami w’isi yose nibaba bagikandagiza ibirenge muri Yorodani, amazi yatembaga aturutse haruguru arahagarara, amere nk’urugomero.”*+
14 Igihe abantu bavaga mu nkambi ariko batarambuka Yorodani, abatambyi bari bahetse isanduku y’isezerano,+ ni bo bari imbere.
15 Abatambyi bari bahetse Isanduku bakigera kuri Yorodani bagakandagira mu mazi (mu gihe cyo gusarura imyaka, amazi ya Yorodani aba yuzuye cyane+),
16 amazi yatembaga aturutse ruguru yahise ahagarara, akora ikintu kimeze nk’urugomero kure cyane hafi y’ahitwa Adamu, umujyi uri hafi y’i Saretani, naho ayatembaga agana mu Nyanja ya Araba, ari yo Nyanja y’Umunyu, yo aratemba arashira. Amazi yarahagaze maze abantu bambukira aharebana n’i Yeriko.
17 Mu gihe abatambyi bari bahetse isanduku y’isezerano rya Yehova bari bahagaze ku butaka bwumutse+ hagati muri Yorodani, Abisirayeli bose bambutse bagenda ku butaka bwumutse,+ kugeza ubwo bose bari bamaze kwambuka Yorodani.
Ibisobanuro ahagana hasi
^ Mu rurimi iki gitabo cyanditswemo ni “abana ba Isirayeli.”
^ Mu rurimi iki gitabo cyanditswemo ni “nk’imikono 2.000.” Reba Umugereka wa B14.
^ Cyangwa “urukuta.”
