KOMEZA KUBA MASO

Isaha abahanga batekereza ko isi izarangirira yaragabanutse—Ni iki Bibiliya yo ibivugaho?

FUNGURA

Ku wa Kabiri, tariki ya 24 Mutarama 2023, abahanga mu bya siyansi bongeye gusuzuma isaha batekereza ko isi izarangirira. a Iyo saha y’ikigereranyo ivuga ko umunsi w’imperuka uzaba saa sita z’ijoro kandi abahanga basanze igihe gisigaye ngo igere cyaragabanutse.

‘Isaha isi izarangirira” igereranya akaga gakomeye kazagera ku isi bitewe n’ibikorwa by’abantu. Ku wa Kabiri, tariki ya 24 Mutarama 2023, abahanga mu bya siyansi bagaragaje ko iyo saha yegereje cyane bashingiye ku bintu biri kuba muri iki gihe, urugero nk’intambara yo muri Ukraine, gukoresha ibitwaro bya kirimbuzi mu ntambara n’imihindagurikire y’ibihe.’—Byavuzwe na AFP.
‘Ku wa kabiri, tariki ya 24 Mutarama 2023, inama yahuje abahanga mu bya siyansi, yavuze ko ‘Isaha isi izarangirira’ ishigaje amasegonda 90 kugira ngo igere. Ni ukuvuga ko ari ubwa mbere mu mateka y’abantu igihe batekereza ko Harimagedoni izazira kigabanutse cyane.’—Byavuzwe na ABC.
“Inama yahuje abahanga mu bya siyansi bo hirya no hino ku isi, yatanze umuburo w’uko hatagize igikorwa, ikiremwamuntu cyo ubwacyo cyakwirimbura.”—Byavuzwe na The Guardian.

Ese koko iyi si n’abayituyeho biri hafi kurimbuka? Ese dukwiriye gutinya ibizabaho mu gihe kizaza? Ni iki Bibiliya ibivugaho?

Ni ibiki bizaba mu gihe kizaza?

Dukurikije ibyo Bibiliya ivuga, ‘isi izahoraho iteka ryose’ kandi hari abantu “bazayituraho iteka ryose” (Umubwiriza 1:4; Zaburi 37:29). Ubwo rero, abantu ntibashobora kurimbura isi cyangwa ngo batume idashobora guturwaho.

Icyakora, Bibiliya na yo ivuga ko hazabaho imperuka. Urugero, ivuga ko ‘isi izashira.’—1 Yohana 2:17.

Kugira ngo usobanukirwe neza icyo Bibiliya iba ishaka kuvuga iyo ivuze imperuka, soma ingingo ifite umutwe uvuga ngo: “Ese isi iri hafi kurimbuka? Apocalypse ni iki?”
Kugira ngo umenye icyo Bibiliya ivuga ku birebana n’ibintu bibera hano ku isi, soma ingingo ivuga ngo: “Ese imperuka y’isi izaza ryari?”

Komeza kurangwa n’icyizere

Nubwo muri iki gihe ku isi hari ibibazo byinshi, Bibiliya idufasha gukomeza kurangwa n’icyizere. Mu buhe buryo?

Bibiliya itanga inama z’ingirakamaro zidufasha mu buzima bwacu bwa buri munsi (2 Timoteyo 3:16, 17). Urugero, kugira ngo umenye ukuntu Bibiliya yagufasha gukomeza kurangwa n’icyizere nubwo waba uhanganye n’ibibazo, soma ingingo ivuga ngo: “Uko wakwirinda guhangayika bikabije”.
Nanone Bibiliya itanga ibyiringiro nyakuri by’igihe kizaza (Abaroma 15:4). Isobanura neza, ibyo tugomba kwitega muri iki gihe no mu gihe kizaza. Ibyo bidufasha gukomeza kugira icyizere uko ibibera mu isi byagenda kose.

Kugira ngo urusheho gusobanukirwa ibintu Bibiliya yigisha, turagutera inkunga yo kwiga amasomo ya Bibiliya atangwa ku buntu.

a “Isaha igaragaza umunsi w’imperuka, bayikoze bashaka gutanga umuburo w’uko abantu bari hafi kurimbura iyi si, bakoresheje ikoranabuhanga n’ibindi bikorwa byangiza. Iyo saha y’ikigereranyo, yibutsa abantu ko niba twifuza gukomeza kuba kuri uyu mubumbe, twagombye kugira icyo dukora.”—Bulletin of the Atomic Scientists.