Таҥара киһи барыта киниэхэ үҥэн чугаһыырын баҕарар (Саалтыыр 64:3). Ол эрээри кини дьон үҥэрин барытын истибэт. Холобур, ойоҕор куһаҕаннык сыһыаннаһар эр киһи үҥэрэ эппиэтэ суох хаалыан сөп (1 Петр 3:7). Таҥара куһаҕаны оҥоро турар израильтяннары истибэт этэ. Ол эрээри аньыыларын кэмсинээччилэри истэргэ бэлэм. Таҥараҕа үҥэр улахан чиэс буолар. Ону өйдүүрбүт олус суолталаах. (Аман өс 28:9; Апостоллар 3:19 ааҕыҥ.)

 Видеоролигы көрүҥ «Таҥара дьон үҥэрин барытын истэр дуо?»

 Иеговаҕа эрэ үҥүөхпүтүн наада, тоҕо диэтэххэ кини Айбыт Айааччыбыт уонна соҕотох дьиҥнээх Таҥарабыт буолар (Матфей 4:10; 6:9). Ол эрээри бары аньыылаах төрөөбүт буоламмыт, биһиги аньыыбыт туһугар өлбүт Иисус Христос аатын нөҥүө үҥүөххэ наада (Иоанн 14:6). Иегова биһиги куруук биири хатылаан үҥэрбитин эбэтэр үҥэр кинигэҕэ суруллубуту ааҕарбытын баҕарбат. Биһиги киниэхэ үҥэн ис санаабытын кэпсиирбитин баҕарар. (Матфей 6:7; Филиппиецтарга 4:6, 7 ааҕыҥ.)

 Биһиги Айааччыбыт оннооҕор испитигэр үҥэрбитин истэр (1 Самуил 1:12, 13). Кини биһигини хаһан баҕарар үҥэрбитигэр көҕүлүүр. Күммүтүн үҥэн саҕалыыр уонна бүтэрэр, ону таһынан аһыах иннинэ итиэннэ туох эмит кыһалҕа үөскээтэҕинэ үҥэр үчүгэй буолуо этэ. (Саалтыыр 54:23; Матфей 15:36 ааҕыҥ.)

 Таҥараҕа чугаһыыр чэпчэкитэ суох, тоҕо диэтэххэ дьон үгүс өттө Таҥараны итэҕэйбэт уонна кини сири ырай оҥоруом диэн этэрин күлүү гынар (2 Тимофейга 3:1, 4; 2 Петр 3:3, 13). Ол иһин  биһиги биир итэҕэллээхтэри кытта алтыһарбыт уонна бэйэ-бэйэбитин өйүүрбүт улахан суолталаах. (Еврейдэргэ 10:24, 25 ааҕыҥ.)

 Таҥараны таптыыр дьону кытта бииргэ буоларбыт киниэхэ чугаһыырга көмөлөһүөҕэ. Иегова Туоһуларын көрсүһүүлэрэ итэҕэлбитин бөҕөргөтөргө олус үчүгэй кыаҕы биэрэллэр. (Римляннарга 1:11, 12 ааҕыҥ.)

 Эһиги Иеговаҕа кини Тылыттан тугу билбиккитин дириҥник толкуйдуур буоллаххытына чугаһыаххыт. Онон кини дьыалаларын, сокуоннарын уонна эрэннэриилэрин туһунан дириҥник толкуйдааҥ. Ол эһиэхэ Таҥара дириҥ тапталын уонна муудараһын сыаналыырга көмөлөһүөҕэ. (Саалтыыр 1:1—3; Иаков 1:25 ааҕыҥ.)

 Эһиги Таҥараҕа эрэнэр уонна итэҕэйэр эрэ буоллаххытына, киниэхэ чугаһыаххытын сөп. Итэҕэли үүнээйини кытта тэҥниэххэ сөп: уу куттахха эрэ үүнээйи улаатар. Итэҕэл эмиэ улаатарын туһугар Биибилийэ ханнык эмэ үөрэҕэ тоҕо кырдьык буоларын туһунан толкуйдуохха наада. (Матфей 4:4; Еврейдэргэ 11:1, 6 ааҕыҥ.)

 Иегова кинини таптыыр дьон туһугар кыһаллар. Кини биһигини итэҕэлбитин уонна бараммат олоххо эрэлбитин алдьатыан сөптөөхтөн барытыттан харыстыыр (Саалтыыр 90:1, 2, 7—10). Таҥара доруобуйабытын буортулуур уонна олохпутун дьоло суох оҥорор дьайыылартан сэрэтэр. Иегова биһиэхэ саамай үчүгэй суолунан барарбытыгар көмөлөһөр. (Саалтыыр 72:27, 28; Иаков 4:4, 8 ааҕыҥ.)