5 Уруок

Таҥара сиргэ тугу оҥорор санаалааҕый?

Иегова сири туохха анаан айбытай? (1, 2)

Билигин сир тоҕо ырай буолбатаҕый? (3)

Куһаҕан дьону туох күүтэрий? (4)

Иисус кэлэр өттүгэр ыарыһах, кырдьаҕас уонна өлбүт дьоҥҥо тугу оҥоруоҕай? (5, 6)

Кэлэр былаҕастабыллары ылар туһуттан, тугу гыныахха нааданый? (7)

1. Иегова сири, дьоннор дьоллоохтук уонна үйэлэр тухары олороллоругар айбыта. Кини сиргэ кырдьык быһыылаах, үөрэн-көтөн олорор дьон, мэлдьи олохсуйарыгар баҕарбыта (Псалом 115:16; Исаия 45:18). Сир хаһан да эстиэ суоҕа, кини мэлдьи баар буолуоҕа (Псалом 104:5; Экклезиаст 1:4).

2. Таҥара киһини айыан иннинэ сиргэ миэстэ талбыта уонна онно олус кэрэ ырайы оҥорбута. Кини ону Эдемскай сад диэн ааттаабыта. Онно кини бастакы эр киһини уонна дьахтары — Адаамнаах Еваны олордубута. Таҥара кинилэр оҕолоро төрөөн-ууһаан сири толороллоругар баҕарбыта. Дьоннор сири барытын сыыйа ырайга кубулутуохтаах этилэр (Бытие 1:28; 2:8, 15).

3. Адаамнаах Ева Таҥара сокуонун соруйан кэһэннэр, аньыыны оҥорбуттара. Ол иһин Иегова кинилэри Эдемскай садтан үүрбүтэ. Ырай сүтэриллибитэ (Бытие 3:1—6, 23). Ол эрээри Иегова сири туохха анаан айбытын умнубатах. Дьоннор үйэлэр тухары олороллоругар Кини сири ырайга кубулутуом диэн эрэннэрэр. Таҥара бэйэтин санаатын хайдах толоруой? (Псалом 37:29).

4. Сир ырай буолуон иннинэ, куһаҕан дьоннор суох буолуохтара (Псалом 37:38). Ити Армагеддон диэн Таҥара куһаҕаны суох оҥорор сэриитигэр буолуоҕа. Ол кэнниттэн Сатана 1 000 сыл устатыгар хаайыллыаҕа. Ол аата куһаҕаны оҥорооччулартан сиргэ ким да суох буолуоҕа. Таҥара эрэ норуота тыыннаах хаалыаҕа (Арыллыы 16:14, 16; 20:1—3).

5. Ол кэнниттэн сир үрдүнэн 1 000 сыл устата Иисус Христос Ыраахтааҕы  буолан салайыаҕа (Арыллыы 20:6). Кини дьон өйүттэн уонна этиттэн, сыыйа аньыыны суох гыныаҕа. Адамнаах Ева аньыыны оҥоро иликтэринэ эҥкилэ суох этилэр. Дьоннор эмиэ ол курдук итэҕэһэ суох буолуохтара. Ол саҕана ыарыы, кырдьыы уонна өлүү суох буолуоҕа. Ыарыһахтар үтүөрүөхтэрэ, кырдьаҕастар төттөрү эдэрдэригэр төннүөхтэрэ (Иов 33:25; Исаия 33:24; Арыллыы 21:3, 4).

6. Иисус Тыһыынча сыл салайар кэмигэр, Таҥараҕа бэриниилээх дьоннор сири барытын ырайга кубулутуохтара (Лука 23:43). Ону таһынан, Таҥара мөлүйүөнүнэн өлбүттэри, сиргэ олорорго тилиннэриэҕэ (Апостоллар 24:15). Өскөтүн ол дьоннор Таҥара ирдэбиллэрин толорор буоллахтарына, сиргэ үйэлэр тухары олоруохтара. Оттон толорбот буоллахтарына — букатыннаахтык кыргыллыахтара (Иоанн 5:28, 29; Арыллыы 20:11—15).

7. Итинник, Таҥара хара маҥнайгыттан сиргэ анаан тугу оҥороору санааммыта барыта туолуоҕа. Эн инники өттүгэр ити былаҕастабыллары ылыаххын баҕарыаҥ этэ дуо? Ону ситиһэргэ, Иегова туһунан билиигин кэҥэтэриҥ уонна кини ирдэбиллэрин тутуһарыҥ наада. Онно эйиэхэ, чугаһынан баар Иегова Туоһуларын сүгүрүйэр дьиэлэригэр ыытыллар көрсүһүүлэргэ сылдьарыҥ көмөлөһүө (Исаия 11:9; Еврейдэргэ 10:24, 25).

[Иллюстрация, страница 10]

Ырай сүтэриллибитэ.

[Иллюстрация, страница 11]

Армагеддон кэнниттэн сир саҥаттан ырай буолуоҕа.