9 Уруок

Таҥара сулууспалааччылара ыраас буолуохтаахтар

Биһиги тоҕо барытыгар ыраас буолуохтаахпытый? (1)

Таҥараҕа ыраастык сүгүрүйүү диэн тугуй? (2) майгы-сигили өттүнэн? (3) өй-санаа өттүнэн? (4) эт-хаан өттүнэн? (5)

Ханнык кирдээх тылы туттуо суохтаахпытый? (6)

1. Иегова ыраас уонна сибэтиэй Таҥара. Кини бэйэтин сүгүрүйээччилэриттэн духовнай, майгы-сигили, эт-хаан уонна өй-санаа өттүнэн ыраас сылдьалларын күүтэр (1 Петр 1:16). Өскөтүн биһиги Таҥара иннигэр ыраас буолуохпутун баҕарар буоллахпытына, бэйэбит кыһалла сатыахтаахпыт. Биһиги кирдээх аан дойдуга олоробут. Ол үрдүнэн, бэйэбит куһаҕан баҕаларбытын кытта охсуһарбытыгар тиийэбит. Ол да буоллар биһиги бэриниэ суохтаахпыт.

2. Таҥараҕа ыраас сүгүрүйүү. Өскөтүн биһиги Иеговаҕа сулууспалыахпытын баҕарар буоллахпытына, сымыйа итэҕэл үөрэҕин уонна абыычайдарын тутуһуо суохтаахпыт. Биһиги сымыйа итэҕэлтэн тахсыахтаахпыт уонна кинини хайдах да өйүө суохтаахпыт (2 Коринфяннарга 6:14—18; Арыллыы 18:4). Таҥара туһунан кырдьыгы билэн баран, сымыйаны үөрэтэр дьоннор бутуйалларыттан сэрэниэхтээхпит (2 Иоанн 10, 11).

3. Майгы-сигили өттүнэн ыраас буолуу. Иегова бэйэтин сулууспалааччылара мэлдьи дьиҥнээх христианнар курдук быһыыланалларыгар баҕарар (1 Петр 2:12). Кини биһиги тугу гынарбытын  барытын көрөр, оннооҕор кистээн оҥорор дьыалаларбытын (Еврейдэргэ 4:13). Биһиги куһаҕан сексуальнай быһыыттан уонна да атын бу аан дойду кирдээх дьыалаларыттан тэйиччи сылдьыахтаахпыт (1 Коринфяннарга 6:9—11).

4. Өй-санаа өттүнэн ыраас буолуу. Өскөтүн бэйэбит өйбүтүн ыраас санааннан толорор буоллахпытына, майгыбыт эмиэ ыраас буолуоҕа (Филиппиецтарга 4:8). Онтон өйбүт кирдээҕинэн туоллаҕына, түмүгэр куһаҕан быһыылаах буолуохпут (Матфей 15:18—20). Өйбүтүгэр куһаҕаннык дьайыан сөптөөх аралдьыйыылартан, биһиги тэйиччи сылдьыахпытын наада. Биһиги Таҥара Тылын үөрэтэн, өйбүтүн ыраас санааннан толорор кыахтаахпыт.

5. Эт-хаан өттүнэн ыраас буолуу. Христианнар Таҥара илдьиттэрэ, ол иһин кинилэр бэйэлэрин уонна таҥнар таҥастарын ыраастык тутуохтаахтар. Ас астаары эбэтэр аһаары сылдьан, итиэннэ тахсан киирэн баран илиини хайаан да суунуохха наада. Өскөтүн дьиэҕэ сөптөөх канализация суох буоллаҕына, тахсан киирии көмүллүөхтээх (Второзаконие 23:12, 13). Эт-хаан ырааһыттан, доруобуйа кытаанаҕа тутулуктаах. Христианин дьиэтэ көрүллэ-харайылла сылдьыллыахтаах уонна иһиттэн да, таһыттан да ыраас буолуохтаах. Кини дьиэтэ ураты бэрээдэгинэн холобур буолуохтаах.

6. Ыраас тыл. Таҥара сулууспалааччылара хаһан баҕарар кырдьыгы этиэхтээхтэр. Сымыйаччылар Таҥара Саарыстыбатыгар киириэхтэрэ суоҕа (Ефесяннарга 4:25; Арыллыы 21:8). Христианнар быдьардык тылласпаттар. Кинилэр куһаҕан ис хоһоонноох түбэлтэлэри уонна дьээбэлэниилэри истибэттэр уонна кэпсээбэттэр. Кинилэр бэйэлэрин ыраас тылларынан үлэлэригэр, оскуолаҕа уонна олорор сирдэригэр баар дьоннордооҕор уратылар (Ефесяннарга 4:29, 31; 5:3).

[Иллюстрации, страницы 18, 19]

Таҥара сулууспалааччылара бары өттүнэн ыраас буолуохтаахтар.