Дьиэ кэргэни барытынан хааччыйарга харчы наада (Притчи 30:8). Библия этэринэн, харчы хахха буолар (Экклезиаст 7:12). Кэргэнниилэргэ үп боппуруостарын ырытарга чэпчэкитэ суох буолуон сөп, ол эрээри харчыттан сылтаан сыһыаҥҥытын алдьатымаҥ (Ефесяннарга 4:32). Кэргэнниилэр бэйэ-бэйэлэрин итэҕэйиэхтээхтэр, итиэннэ харчыны хайдах туттар туһунан иккиэн бииргэ сүбэлэһиэхтээхтэр.

БИБЛИЯ ТУОХ ДИИРИЙ. «Эһигиттэн хайаҕыт эмэ башня туттуон баҕардаҕына, маҥнай олоро түһэн, тутуутун ситэрэригэр төһө үп барыахтааҕын суоттаныа суоҕа этэ дуо?» (Лука 14:28). Харчыны хайдах туттар туһунан иккиэн бииргэ сүбэлэһэргит улахан суолталаах (Амос 3:3). Дьиҥнээхтии туохха наадыйаргытын уонна төһөнү туттаргытын эрдэттэн кэпсэтиҥ (Притчи 31:16). Харчылаахпыт эрэ диэн тугу эмэ атыылаһартан туттунуҥ. Төһө кыалларынан иэскэ кииримэҥ. Кыаххытынан олоруҥ (Притчи 21:5; 22:7).

ТУҺАЛААХ СҮБЭЛЭР

• Ый бүтүүтэ харчыгыт ордуннаҕына, ону хайдах дьаһанаргытын бииргэ быһаарыҥ

• Өскөтүн бюджеккытыттан таҕыстаххытына ороскуоккутун хайдах аччатаргытын толкуйдааҥ. Баҕар бэлэм аһы атыыласпакка, дьиэҕитигэр ас астанарга быһаарыныаххыт

БИБЛИЯ ТУОХ ДИИРИЙ. «Баайгытын дуолгутун Иегова эрэ иннигэр буолбакка, дьон иннигэр эмиэ чиэһинэйдик» туттарга дьулуһуҥ (2 Коринфяннарга 8:21, СД). Кэргэҥҥиттэн төһөнү өлөрөргүн уонна барыыргын кистээмэ.

Үп-ас боппуруостарын быһаарарга кэргэҥҥин кытта хайаан да сүбэлэһэр буол (Притчи 13:10). Кэргэнниилэр харчы туһунан аһаҕастык кэпсэтэллэрэ эйэлээх буолалларыгар көмөлөһөр. Ылбыт хамнаскытын бэйэҕит киэнин курдук буолбакка, уопсай дохуот курдук көрүҥ (1 Тимофейга 5:8).

ТУҺАЛААХ СҮБЭЛЭР

• Хас биирдиигит бэйэтин баҕатынан төһө харчыны туттарын эрдэттэн быһаарыныҥ

• Харчы туһунан кэпсэтэргитигэр хаһан проблема үөскүүрүн кэтэһимэҥ