MUZWIILE-HABUSU KUTONDA!
Mabaka Hatuwoola Kuba ni Nsepo mu Cilimo ca 2023—IBibele Iwambanzi?
Citutanga cilimo ca 2023, tuboonse twiina insepo yakuti ziintu zilotu ka zipangahale kweetu ni mahasi eetu. Ibakanzi hatuwoola kuba ni nsepo?
IBibele Ituha Insepo Kaza Buhalo Bulotu Bwa Kubusu
IBibele ituha indaba indotu yakuti bukaabo butukopana naabo mwe yiinu inako bwe nakozana mi ka bu maniswe. Kana mwiizi? IBibele “ibañolelwa kutuluta, kuti ca. . . kusengwa-sengwa ni Mañolo tuwoole kuwaana insepo.”—Baroma 15:4.
Kuti mulitute ziingi ziisepisa iBibele, mubale indaba yahe webbusaiti icokuti “A Real Hope for a Better Tomorrow.”
Insepo iwoola kumitusa mwe yiinu inako
Insepo ya mwi Bibele mwi swanina ni “iankora ya buhalo bweetu.” (Baheberu 6:19, indaba za kuunsi) Iyo nsepo iwoola kutukoza. Iwoola kututusa kukolela bukaabo butukopana naabo, kuba ni muboneno ushiyeme, ni kuba basaangite mwi nako zoonse. Ca mutala:
Mulitute insepo ya mwi Bibele mwi batusikizi mukwame ya bali kukatazwa kunywa ahulu bujwala. Mulweele ividiyo Nibasuntiswa Muhalilo Waangu.
Mubone insepo ya mwi Bibele mwi woola kututusikiza hatufwiilwa muntu utusaka. Mulweele ividiyo Ziintu Ziwoola Kutusa Bantu Bafwiililwe.
Mukoze insepo yeenu
Buungi bwa bantu balindile kuti babone ziintu zilotu ha zipangahala, kono bawaanite bukaabo kuzumina kuti insepo zaabo ka zizuzilikizwe. Ziisepisa iBibele ziwoola kusepiwa tota. Ibakanzi? Cebaka lyakuti insepiso za mwi Bibele zizwa kwa Jehova iLeza a iye mwiine, “yasawooli kuceenga.” (Tite 1:2) Nji Jehova bulyo yowiina ziho za kwizuzilikiza insepiso zaakwe zoonse; uwoola “kupanga zoonse zasaka.”—Lisamu 135:5, 6.
Tumimema kupanga mumuwoolela moonse kuti mutuswe kwi insepo ya mwi Bibele. Muwoola kukoza insepo yeenu mwi Bibele caa “kutatuba Mañolo cee ntokomelo.” (Zicitantu 17:11) Muwaane inkalabo inwe mubeene mwi ntuto yeetu yee Bibele isalihilwa. Mutange cilimo ca 2023 ni mwiina insepo!
a Jehova nji zina tota lye Leza.—Lisamu 83:18.