MUZWIILE HABUSU KUTONDA!
2022: Cilimo Cikukutu—IBibele Iwambanzi?
Mu cilimo ca 2022, tuzwiilile-habusu kuzuwa makande enkoondo, bukaabo bwa masheleñi, ni ziintu ziamana ni nkezahalo zisalindilwe. IBibele bulyo iwoola kutalusa ibaka lizuweka zoonse izi ha zikweete kupangahala.
Ibaka zoonse izi ha zipangahala mwa 2022
Ziintu zibapangahali mu cilimo cibamani naazo zitondeza ha jolola kuti tuhala mwi nako yiisumpa iBibele kuba “mazuba a mamani-mani.” (2 Timoteya 3:1) Iyo nako ibatangi mu cilimo ca 1914. Mubone zoonse zikweete kupangahala mwi nako zeetu mu ziwondinsanela ni ziibapolofiti iBibele kuamana ni nako yeetu:
“Inkoondo.”—Matewu 24:6.
Cilimo ca 2022 Nji Cilimo Europe Hayikopane Hape ni Bukaabo Buletetwe Inkoondo.” a
Mubone indaba yahe webbusaiti icokuti “Russia Itaseza Ukraine.”
“Kutayela kwa zilyo.”—Matewu 24:7.
Cilimo ca 2022 Cilimo cee Nzala.” b
Mubone indaba yahe webbusaiti icokuti “Inkoondo ya mwa Ukraine Iletise Kutayela kwa Zilyo Mucisi.”
“Matuku.”—Luka 21:11.
Polyo ciibabooli, butuku bwa tulabi twa ha mubili (monkeypox), ni butuku bwa COVID-19 buletete bukaabo mwi nkaanda ziingi, ubu bukaabo butondeza sinte matuku mwa woola kukukila kapili ni bantu mu basawooli kulisileleza hande.” c
Mubone indaba yahe webbusaiti icokuti “Impalo ya Bantu Balikana 6 Miliyoni Babafwi ku Butuku bwa COVID-19.”
“Ziintu zitiiza.”—Luka 21:11.
Kuhiisa ahulu, inanga, mililo mu mizuka, ni muunda. Cilimo ca 2022 mu cihupulwe kuba cilimo ico mazimo ewulu abacinci ahulu mwi nkaanda ziingi mi abaleti isinyehelo ziingi, kwi haya buungi bwa bantu, ni kukuuza buungi-buungi bwa bantu mu cisi coonse.” d
Mubone indaba yahe webbusaiti icokuti “Mu Cisi Coonse Impiho Zitondeza kuti Cikuhiisa Ahulu.”
“Mifilifili [kapa, “kulilwisa,” indaba za kuunsi.].”—Luka 21:9.
Bantu babengete ahulu, cebaka lya kuboolela haansi kwa masheleñi, mi ku baletisi kuti bantu baangi bacawula ahulu mu cilimo ca 2022.” e
Mubone indaba yahe webbusaiti icokuti “Kuweleka kwe Nteko Mucisi.”
Kakupangahalenzi mu cilimo cikeza?
Kakwiina muntu yowoola kuwamba ca kunepahala zeete ni zipangahale mu cilimo ca 2023. Kono citwiizi bulyo cokuti hahanu, Mubuso wee Leza, kapa muuso wa kwiwulu, kawulete incinceho zikaando mu cisi. (Danyele 2:44) Uwo mubuso kawu manise ziintu zoonse zinyandise bantu ni kuleta kusunwa kwe Leza kupangwa hanu haansi.—Matewu 6:9, 10.
Tumisusuweza kuteeka ku nkelezo ya Jesu Kreste ni “kuzwiila-habusu kutonda” cimubweene kwiizuzilikizwa kwa bupolofita bwa mwi Bibele. (Mareka 13:37) Tumikumbila kuti muwambe naaswe kuti mulitute ziingi kuamana ni iBibele mwi woola kumitusikiza hanu ni kumiha insepo ya buhalo bulotu kubusu inwe ni ba luhasi lweenu.
a AP News, “Cilimo ca 2022 Nji Cilimo Europe Hayikopane Hape ni Bukaabo Buletetwe Inkoondo,” ba Jill Lawless, 8 December 2022.
b Katengo Kabona za Zilyo mu Cisi (World Food Programme), “Bukaabo bwa Kutayela kwa Zilyo.”
c JAMA Health Forum, “Kuhala mwi Nako ya Butuku—Kuzwa COVID-19 kwinjila mu butuku bwa tulabi twa ha mubili (monkeypox), Polyo, ni Matuku Amwi X,” ba Lawrence O. Gostin, JD, 22 September 2022.
d Earth.Org, “Ziintunzi ziletise Kucinca Ahulu kwa Mazimo Ewulu mwa 2022?” ba Martina Igini, 24 October 2022.
e Carnegie Endowment for International Peace, “Bantu bakweete Kucawula ahulu mwa 2022 Cebaka lya Kuboole Haansi kwa Masheleñi,” ba Thomas Carothers and Benjamin Feldman, 8 December 2022.