MUZWIILE-HABUSU KUTONDA!
Bakreste ni Nkoondo—IBibele Iwambanzi?
Sina feela mutwa bonena mwi nkoondo ikweete kulwiiwa mwa Ukraine, buungi bwa bakulwana ba Bakreste basusuweza inkoondo. Mubone bakulwana ba bulapeli mu bakweete kuzimanina inkoondo:
“Tutemba ni kulitumela ku masole beetu bakweete kuzimanina Ukraine ku cila. . . Cee nkulo zeetu zoonse, twiina naanwe.”—Metropolitan Epiphanius I wakwa Kyiv, impiho ya The Jerusalem Post, 16 March, 2022.
“Mukulwana wa bulapeli busumpwa Orthodox Church bwa mwa Russia abapangili insebelezo masole ba Russia Lensunda ni ku basusuweza kuzimanina inkaanda yaabo ya Russia kuti masole ba mwa Moscow bazwiile-habusu ni nkoondo yaabo ibakweete kulwa mwa Ukraine.”—impiho ya Reuters, April 3, 2022.
Kana Bakreste baswanela kulwa mwi nkoondo? IBibele iwambanzi?
Ziiwamba iBibele
IBibele itondeza kuti becilili bee niti ba Jesu Kreste ka baswaneli kulwa mwi nkoondo.
“Booze mukwale waako mu cipusu caawo, kakuti boonse balitusisa mukwale ka behayiwe ca mukwale.”—Matewu 26:52.
Kana muntu yozimanina kamba kulwa mwi nkoondo uzuwa maanzwi a Jesu?
“Ni miha mulawo muhya wa kuti mulisake mukati keenu, sina muni ba misakili; naanwe mulisake cee nzila iswana. Bantu boonse kabezibe kuti mu balutiwa baangu—haiba ni mulisaka mukati keenu.”—Johani 13:34, 35.
Kana muntu yozimanina inkoondo utondeza ilato lya bawambi Jesu kuti kali izibahaze balutiwa, kamba becilili baakwe?
Kuti mulitute ziingi, mubale indaba yahe webbusaiti itakuti “Is War Compatible With Christianity?”
Bakreste ni nkoondo suunu
Kana indaba ya kuti Bakreste baswanela kulihambusa ku nkoondo izuweka? Eeni. IBibele ibapolofiti zee nako yeetu, kuba “mazuba a mamani-mani,” kuti mweyo nako kakube ni bantu mu macaba woonse baseete ni “balitute inkoondo,” kuyendelela ni ntuto za Jesu.—Isaya 2:2, 4, indaba za kuunsi.
Kuti mulitute ziingi, mubale Itawala yahe webbusaiti itakuti “ILeza Uhinda Bule Inkoondo?”
Hahanu Jehova, a “iLeza wee nkozo,” kaa litusise mubuso waakwe wa kwiwulu kulukulula bantu “balyatililwa ni ku mifilifili.”—Bafilipi 4:9; Lisamu 72:14.
Kuti mubone mweete apangile bulyo, mulweele ividiyo itakuti Mubuso wee Leza Ciintunzi?
a Jehova nji izina lye Leza.—Lisamu 83:18.