MUZWIILE-HABUSU KUTONDA!
Bulapeli ni Nkoondo ya mwa Ukraine—IBibele Iwambanzi?
Mubone zicilila zibawamba bakulwaana babulapeli bezibenkene ahulu kuamana ni nkoondo ya mwa Ukraine:
“Mukulwaana wa bulapeli busumpwa Orthodox Church bwa mwa Russia, wee zina lya Patriarch Kirill, kana abanyansi inkoondo ikweete kulwiiwa kwa Russia. . . . Putin ulitusisa indaba za mapa zibuwamba bulapeli kuba ibaka ha kweete kulwa inkoondo.”—EUobserver, March 7, 2022.
“Patriarch Kirill . . . uwamba kuti inkoondo ikweete kulwiiwa kwa Russia mwa Ukraine buikatazo bumwi bwa kulwiisa cibi.”—AP News, March 8, 2022.
“Mukulwaana wa bulapeli bwa Orthodox Church bwa mwa Ukraine, wee zina lya Metropolitan Epiphanius I wakwa Kyiv, abafuyoli bantu baakwe kuti bawoole ‘kuzunda impi ya masole ba Russia’ lamande . . . Hape abawambi kuti kwihaya masole ba Russia kaheena cibi.”—Jerusalem Post, March 16, 2022.
“Katengo kenkeleke kasumpwa [Ukrainian Council of Churches and Religious Organizations (UCCRO)] kawamba zicilila, tulapelela impi ya masole ba Ukraine ni boonse bakweete kulwa mweyi nkoondo kuzimanina inkaanda yeetu, tulapelela boonse bakweete kulwiila Ukraine ku cila.”—UCCRO a Statement, February 24, 2022.
Muhupula bule? Kana balapeli balihinda kuba beecilili ba Jesu Kreste baswanela kususuweza bantu baabo kukalwa mu nkoondo? IBibele iwambanzi?
Zicibubapangi bulapeli mu nkoondo
Indaba zakale zitondeza kuti bulapeli hañata buwambanga kuti kakufosahele kuyenda kukulwa inkoondo, kuti kushiyeme kulwa inkoondo, kamba kuti inkoondo iswanela kulwiiwa kuti kube ni nkoozo. Ca zilimo ziingi, Impaki za Jehova cibabatusi bantu kubona bulicengisi bwa bulapeli. Mubone mitala yimwi iñoletwe mwi hatiso zeetu.
“The Crusades—A ‘Tragic Illusion’” itondeza kuti bulapeli busumpwa Catholic Church bwa mwa Roma njibona bubaletisi inkoondo ku behayiwa ahulu buungi bwa bantu, cakuwamba kuti insebelezo yee Leza ni ya Kreste.
“The Catholic Church in Africa” mutala umwi utondeza bulapeli mu bubakangilwa kumanisa kulihaya kwa mishobo, ni nkoondo ya kumanisa mushobo umwi.
Indaba zahe webbusaiti “Is Religion to Blame?,” “Religion’s Role in Man’s Wars,” ni “Religion Takes Sides” zitalusa bulapeli bwa Catholic, Orthodox, ni Protestant bakulwaana babulapeli babazimanini mabbali woonse ee nkoondo zibalwiiwa.
Kana Balapeli Bacikreste baswanela kulwa mu nkoondo?
Zabaluti Jesu: “Uswanela kusaka mwaako sina molisakila.” (Matewu 22:39) “Muzwiile-habusu kusaka zila zeenu.”—Matewu 5:44-47.
Mubone: Kana bulapeli buwoola kuwamba kuti buzuwa intayelo ya Jesu ya kusaka bamwi cenako iswana ni basusuweza beecilili baabo kukalwa mu nkoondo? Kuwaana inkalabo, mubale indaba zahe webbusaiti zitakuti “True Christians and War” ni “Is It Possible to Love One’s Enemies?”
Zabawambi Jesu: “Mubuso waangu kaheena wee cinu cisi. Kambe mubuso waangu wee cinu cisi, zikombwa zaangu ni zanilwiila kuti kaanzi ni hewa.” (Johani 18:36) “Kakuti boonse balitusisa mukwale kabehayiwe ca mukwale.”—Matewu 26:47-52.
Mubone: Haiba Bakreste kana babali kuswanela kulwa ni haiba kusileleza Jesu, kana baswanela kulwa mu nkoondo cebaka limwi suunu? Kuti mulitute Bakreste beentanzi muba beecilili mutala wa Jesu, mubale indaba yahe webbusaiti itakuti “Is War Compatible With Christianity?”.
Kakupangahalenzi ku bulapeli bususuweza inkoondo?
IBibele iluta kuti iLeza kaa tambuli bulapeli buwamba kuti buzimanina Jesu kono ni busecilili intuto zaakwe.—Matewu 7:21-23; Tite 1:16.
Imbuka ya mwi Bibele ya Kuzikula itondeza kuti iLeza uhinda bulapeli bwiina bulyo kuba ni mulandu wa mafu “abantu boonse babehayiwa mucisi.” (Kuzikula 18:21, 24) Kuti mulitute ibaka, mubale indaba yahe webbusaiti itakuti “What Is Babylon the Great?”
Jesu abawambi kuti bulapeli boonse busatambulwa kwe Leza ka bushinyiwe cebaka lya misebezi yateni mibilala, cisamu coonse cisabiiki cicelo cilotu “citemwa ni kusohelwa mu mulilo.” (Matewu 7:15-20) Kuti mulitute zeete ni zipangahale, mubale indaba yahe webbusaiti itakuti “The End of False Religion Is Near”.
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Katengo ka UCCRO, kamba Ukrainian Council of Churches ni Religious Organizations, kupanyeleza inkeleke ziina 15 zizimanina bulapeli bwa Orthodox, Greek ni Roman Catholic, Protestant, ni za Evangelic mane bulyo ni bulapeli bwa Cijuda ni Cimozilemu.