MUZWIILE-HABUSU KUTONDA!
Kuzinda ha Cikolo—IBibele Iwambanzi?
Kali 24 May, 2022, ciintu cibilala ahulu cibapangahali mwi toropo inini isumpwa Uvalde, Texas, mwa Amerika. Kuya ca makande abazwiswa kuba The New York Times, “mukwame wee ntobolo abehayi baana ba cikolo beena 19 ni maluti babaanakazi boobele. . . ku Cikolo ca Robb Elementary.”
Cabumayi, inkezahalo izo zibilala zipangahalanga inako ni nako. Kuya cee mpiho ya USA Today ibabihi kuti mwa Amerika feela, “ku bazindwa twiina 249 ha zibaka za cikolo mu cilimo cibamani kuzamba zilimo zoonse mane kuboola ku masule mu cilimo ca 1970.”
Ibakanzi izi inkezahalo zibilala ha zipangahala? Tuwoola kukolela bule ubu bubilala? Kana kwiina insepo yakuti mifilifili kayi mane? IBibele iha inkalabo.
Ibakanzi mifilifili hayi zwiilile-habusu kwinjiha?
IBibele italusa inako ituhala kwiili kuba “mazuba a mamani-mani” inako buungi bwa bantu keete ni babe ni “ilato lye cizaalo” ni beena “bukali,” kutalusa kuti ni babawooli kuba ni mikwa mibi ahulu ni mifilifili. Bantu beena mikwa mibi “kaba dodobele mu bubilala.” (2 Timoteya 3:1-5, 13) Kuti mulitute ziingi, mubale indaba yahe webbusaiti itakuti “Did the Bible Predict the Way People Think and Act Today?”
Buungi bwa bantu balibuuza, ‘Ibakanzi iLeza hasatibeli ziintu zibilala ziswana sina kuzinda ha cikolo kuti kaanzi zipangahali?’ Kuti muwaane inkalabo izwa mwi Bibele, mubale indaba yahe webbusaiti itakuti “Ibakanzi Ziintu Zibilala ha Zipangahalanga ku Bantu Bashiyeme?”
Tuwoola kukolela bule ubu bubilala?
“Kakuti ziintu zoonse zibañolwa ku masule zibañolelwa kutuluta, kuti. . . ca kusengwa-sengwa ca Mañolo tuwoole kuba ni nsepo.”—Baroma 15:4.
Zikuka za mwi Bibele ziwoola kututusa kukolela mifilifili yiina mucisi. Kuti mulitute ziingi mubale imagazini ya Mubuke! itakuti “Will Violence Ever End?”.
Kuti muwaane iakalezo ziwoola kutusa bazaazi kutusa baana baabo kukolela impiho za makande atiiza, mubale indaba yahe webbusaiti itakuti “Disturbing News Reports and Your Children.”
Kana kwiina insepo yakuti mifilifili kayi mane?
“Kaa balamulele ku mifilifili ni ku bantu baba lyatilila.”—Lisamu 72:14.
“Kaba sandule mikwale yaabo kuipanga malimi a zikekele ni kusandula milinga yaabo majekisi . Cicaba keete ni cilwiise cicaba cimwi ca mukwale, Mi keete ni balitute inkoondo.”— Miika 4:3.
ILeza kaa pange ziintu zibasawooli kupanga bantu. Mubuso kamba Muuso waakwe wa kwiwulu kawu manise zilwiiso ni mifilifili yoonse. Kuti mulitute ziingi zeete ni upange Mubuso wee Leza, mubale indaba yahe webbusaiti itakuti “Mu Mubuso wee Leza ‘Inkozo Kayinjihe.’”
