MUZWIILE-HABUSU KUTONDA!
Ibakanzi Hakwiina Ahulu Cituhu?—IBibele Iwambanzi?
Buungi bwa makande eena impiho za bantu bawamba kapa kupanga ziintu zibi cebaka lye nketululo, ku bantu balwiisa bantu bamwi.
“Hanu cikwiina ahulu citoyo he intaneti cebaka lye nkoondo ya Isilayele ni Gaza ni cebaka lya bantu basusuweza mifilifili ni citoyo.”—The New York Times, 15 November, 2023.
“Kuzwa kali 7 October, kubatangi kuba ni bantu baangi ba mifilifili ni bawamba ziintu zibi cebaka lya kwi njiha kwa citoyo.”—Ba Dennis Francis, baeteleli ba United Nations General Assembly, 3 November, 2023.
Ziwambo zibi, mifilifili, ni nkoondo kaheena zihya. Mane, iBibele italusa bantu ba ku masule babali “[kunongisa] maanzwi aabo a cituhu, sina masho” mi babali kususuweza inkoondo ni mifilifili. (Lisamu 64:3; 120:7; 140:1) Kono iBibele iwamba kuti citoyo citubweene suunu ciine intaluso inkaando ahulu.
Citoyo—Cisupo ca mu nako zeetu
IBibele italusa mabaka oobele hakwiina ahulu cituhu suunu.
1. Ibapolofiti zee nako iyo “ilato lya baangi kalifokole.” (Matewu 24:12) Bantu ka batondezi ilato, kono buungi bwa bantu batondeza mikwa isusuweza citoyo.—2 Timoteya 3:1-5.
2. Citoyo cinjihite suunu cebaka lye nkukuwezo ya Satani Diabulusi. IBibele iwamba kuti “cisi coonse ciina mu mayanza a muntu mubilala.”—1 Johani 5:19; Kuzikula 12:9, 12.
Nihakuba bulyo, iBibele hape ituwambila kuti hahanu Ireeza kaa manise ziintu ziletise citoyo. Ca butokwa ahulu ni kuzamba, kaa manise manyando woonse aletetwe citoyo. IBibele isepisa kuti:
Ireeza “Kasinde zinsozi ku meenso abo, mi ifu keete nilibe kwateni, nangati maswabi kapa kulila kapa kusasaminwa keete nizibe kwateni. Ziintu zakale cizibamani.”—Kuzikula 21:4.