Sean Gladwell/Moment via Getty Images
MUZWIILE-HABUSU KUTONDA!
Mibuso Mu Cisi Coonse Ibasebelisi Masheleñi Ahitilila 2 Tiriliyoni ya Madola a Amerika Mu Nkoondo—IBibele Iwambanzi?
Mu cilimo ca 2022, mibuso ya mu cisi ibasebelisi masheleñi akasika ha 2.24 tiriliyoni ya madola a Amerika ca mulelo wa kwiitabila ku nkaanda ya Russia ibatasezi Ukraine, aa ababi masheleñi maangi tota a seeni kusebeliswa ku masule. Kuya cee mpiho ibazwiiswa mwa April 2023 kubeena Stockholm International Peace Research Institute (SIPRI), mwa 2022:
Masheleñi abasebeliswa ku mpi za mwa Europe “abaweleki ca 13 pesenti mu cilimo ca 2022, Ili kuweleka kukaando ahulu kuba pangahali mwa Europe mu nako yee nkoondo ya mukowa.”
“Inkaanda ya Russia…ibaekezi masheleñi asebeliswanga mu nkoondo ca 9.2 pesenti, mi ico cibaletisi kuti inkaanda ya Russia ibe ya butatu ku nkaanda zilitusisanga ahulu masheleñi maangi mu cisi coonse.”
Inkaanda ya Amerika nji yiina ha namba 1 kakuti “isebelisa masheleñi akasika ha 39 alitusiswa mwi nkoondo mu cisi coonse.”
“Kuweleka kwa masheleñi asebeliswa mu nkoondo mu cisi coonse mu zilimo zaahanu kutondeza ha lukaanda kuti tuhala mu cisi ciseena insilelezo tota,” kuwamba Dr. Nan Tian, zumwi wa babihi ba makande a SIPRI.
IBibele ibapolofiti kuti inkaanda ziina ahulu ziho mu cisi kazizwiile-habusu kulilwiisa hape ituwambila ciintu cimwiina bulyo ceete ni cilete inkozo yee niti.
Bupolofita buwamba za kuweleka kwe nkoondo
IBibele isumpa inako zituhala kuzili kuba “inako za mamani-mani.”—Danyele 8:19.
Ibuuka ya Danyele ibapolofiti kuti mweyo nako, kakube ni mibuso yee cisi yiina ziho yeete ni ililwiise. Iyi mibuso yiina ziho “kayi lilwiise,” cebaka lyakuti mubuso ni mubuso usaka kuti ube bulyo wowona wiina ziho. Mweyo nako kaba sebelise “maluwo,” kapa masheleñi maangi.—Danyele 11:40, 42, 43.
Kuti mulitute ziingi kuamana noobu bupolofita bwe Bibele, mulweele ividiyo ya Bupolofita Bobutalelelizwe kwa Daniele Kauhanyo 11.
Ceete ni ciletise kuti kube ni nkozo yee niti
IBibele iwamba kuti mubuso wee Leza kawuyole mibuso yoonse ya bantu. ILeza “kaatome mubuso useete ni usinyiwe ni kamita. Mi uwo mubuso keete ni ushimbulukile ku cicaba cimwi. Kawu sinye ni kumanisa mibuso yiinu yoonse. Mi njiwona bulyo weete ni ube kwateni kuya kwiile.”—Danyele 2:44.
Jehova a iLeza hahanu kaa lete inkozo yee niti ibakangitwe kuleta bantu. Bule? Ca Mubuso waakwe wa kwi wulu kaa manise zilwiiso zoonse ni kumanisa mifilifili yoonse.—Lisamu 46:8, 9.
Kuti mulitute ziingi zeete ni upange Mubuso wee Leza, mubale indaba yahe webbusaiti icokuti “Mwa Mubuso wa Mulimu ‘Kozo Ikaekezeha.’”
a Jehova nji zina tota lye Leza.—Lisamu 83:18.