MUZWIILE-HABUSU KUTONDA!
Inkoondo ni Kucinca kwa Mazimo Ewulu Ziletete Bukaabo bwa Kutayela kwa Zilyo mu Cisi Coonse—IBibele Iwambanzi?
Inkoondo ya mwa Ukraine ni kucinca kwa mazimo ewulu, ziletete ahulu kutayela kwa zilyo mu cisi coonse. Celyo ibaka bantu bahala mu nkaanda ziseena hande masheleñi bawaanite bukaabo kuwaana zilyo.
“Cebaka lye nkoondo, kucinca kwa mazimo ewulu, kudula kwa zilyo, ni zimwi bulyo zibozekeze haansi misebezi ya kulima ni kuuzwa kwa zilyo.”—António Guterres, UN secretary-general, 17 July 2023.
“Bacaziba bawamba kuti Russia kayisikwiina mu ntumelelano ya kuzuminina zilyo kuzwa mwa Ukraine kuti ziwoole kuuzwa ku nkaanda zimwi celyo ibaka zilyo kazitange kudula ahulu mu nkaanda ziseena hande masheleñi, sihulu inkaanda za ku Mutulo wa Afrika ni ziina Hakati kwa Upa (Middle East).”—Atalayar.com, 23 July 2023.
Mulitute ziiwamba iBibele kuamana ni kutayela kwa zilyo ni buhalo bwa kubusu.
IBibele ibapolofiti za kutayela kwa zilyo
Jesu abapolofiti kuti: “Kakuti cicaba kacilwiise cicaba cimwi ni mubuso kulwiisa mubuso umwi, mi kakube ni kutayela kwa zilyo.”—Matewu 24:7.
Imbuka ya mwi Bibele ya Kuzikula italusa inswanisezo ya batiizi bee mbizi boone. Zumwi waabo batiizi bee mbizi uzimanina inkoondo. Mi wiciliilwe zumwi yozimanina inzala, inako yeete ni kube ni kutayela kwa zilyo ni kudula kwa zilyo. “Ni baboni imbiizi isiiha, mi mutiizi waayo aba kweete zikala zoobele mwi yanza. Cinazuwa ciintu cibali kuzuweka sina liinzwi . . . Cicati, ‘Ikilo imwiina ya buloto kayiwuzwe isheleñi ya sebeleza muntu izuba lyoonse! Mi makilo ootatwe a mahira kaa wuzwe isheleñi ya sebeleza muntu izuba lyoonse.’”—Kuzikula 6:5, 6, Intoloko ya Contemporary English.
Bupolofita bwa mwi Bibele buamana ni kutayela kwa zilyo bukweete kwiizuzilikizwa mwi nako isumpwa mwi Bibele kuba “mazuba a mamani-mani.” (2 Timoteya 3:1) Kuti mulitute ziingi ziamana ni “mazuba a mamani-mani” ni batiizi bee mbizi boone bawambitwe kwi ñolo lya Kuzikula, mulweele ividiyo icokuti The World Has Changed Since 1914 mubale ni ndaba yahe webbusaiti icokuti “The Four Horsemen—Who Are They?”
IBibele mwiwoola kumitusikiza
Mwi Bibele kuwaanika inkelezo iwoola kututusa kukolela miikalilo mikukutu itukopana naayo, kukopanyeleza bulyo kudula ni kutayela kwa zilyo. Mubone mitala yiina mwi ndaba yahe webbusaiti icokuti “How to Live on Less.”
IBibele hape ituha insepo yakuti ziintu kazibe hande. Itusepisa inako yeete ni kube “ni zilyo ziingi mu cisi” mi zumwi ni zumwi kaabe ni zilyo ziingi za kulya. (Lisamu 72:16) Kuti mulitute ziingi kaze nsepo ya mwi Bibele ya kubusu ni ibaka a muwoola kwi sepa, mubale indaba yahe webbusaiti icokuti “A Real Hope for a Better Tomorrow.”