MUZWIILE-HABUSU KUTONDA!
Kana Inkwinano yee Mbola ya Matende ya Cisi Coonse Iwoola Kuwondinsanisa Bantu Tota?—IBibele Iwambanzi?
Mu cisi coonse impalo ya bantu balikana 5 bbiliyoni ka balweele Inkwinano yee Mbola ya Matende ya Cisi Coonse yeete izanwe mu mwezi wa 20 November kutwaala 18 December, 2022. Buungi bwa bantu balizuwa kuti zizaano zee mbola ziwoola kuleta ziintu zilotu insinyi kuwondinsanisa bulyo bantu.
“Zizaano ziina ziho za kucinca cisi. Ziina ziho za kucinca muboneno wa bantu. Ziina ziho za kuwondinsanisa bantu cee nzila ilihitize ahulu.”—Nelson Mandela, yabali kubanga mueteleli wee nkaanda ya South Africa.
“Imbola ya matende . . . itusanga bantu kuba ni nsepo, kusaanga, kulisaka, ni kuwondinsana mwi nzila zicincana-cincana.”—Gianni Infantino, mueteleli wa FIFA. a
Kana Inkwinano yee Mbola ya Matende ya Cisi Coonse kapa zimwi zizaano ziwoola kuwondinsanisa bantu? Kana kubusu kakube ni nkozo ni kuwondinsana?
Kana Inkwinano yiina bulyo iwoola kuwondinsanisa bantu?
Inkwinano yee Mbola ya Matende ya Cisi Coonse yee ciinu cilimo ibaleti kuti bantu bawambe ziintu ziingi insinyi bulyo imbola. Iyi inkwinano ibaleti kuti bantu bawambe ahulu zee ndaba ya muhalilo wa bantu ni ndaba zee politiki zee nswanelo za bantu, kusalulula bamwi, ni kulikanelela mwi ndaba za masheleñi.
Nihakuba bulyo, buungi bwa bantu bawaanite kuti zizaano zikola sina Inkwinano yee Mbola ya Matende ya Cisi Coonse ikoonda ni kusaangisa. Nihakuba kuti bantu balikolanga kulweela izo zizaano, kaziwooli kuleta kuwondinsana kwikalilile. Kono, zitondezanga mikwa icincana-cincana ya zicitantu za bantu ziiwambite iBibele kuba inako isumpwa mazuba a mamanisilizo.”—2 Timoteya 3:1-5.
Insepo yee niti ya kuwondinsana kwa bantu mu cisi coonse
IBibele iha insepo yee niti ya kuwondinsana kwe cisi coonse. Isepisa kuti bantu boonse kaba wondinsane hamwiina mwi mpuso ya kwiwulu isumpwa “Mubuso wee Leza.”—Luka 4:43; Matewu 6:10.
Simwiine wowo Mubuso, Jesu Kreste, kaabone kuti kuba ni nkozo ku bantu boonse mu cisi. IBibele iwamba kuti:
“Yoshiyeme kaa nkonde, mi inkozo kayiekezehe.”—Lisamu 72:7.
“Kaa lamulele muhumanehi yolilila kwaali. . . Kaa balamulele ku babalyatilila ni ku mifilifili.”—Lisamu 72:12, 14.
Nihaiba suunu, intuto za Jesu cizibatusi buungi-buungi bwa bantu kuwondinsana mwi nkaanda zilikana 239. Ciba balituti kusaaba ni citoyo. Kuti muwaane indaba cakwiizula, mubale indaba zicincana-cincana zicokuti “Ziwoola Kututusa Kumanisa Citoyo.”
a Fédération Internationale de Football Association, katengo kabona za cizaano cee mbola ya matende.