Lensunda, kali 20 November 2022, Katengo kee Nkopano ya Macaba (COP27 United Nations) kabona za kucinca kwa mazimo ewulu kaba zuminzani kuha masheleñi ku nkaanda zihumanehete kuti bawoole kukolela bukaabo bwa kucinca kwa mazimo ewulu, nihakuba bulyo buungi bwa bantu balizuwa kuti zoonse izi zikweete kupangwa keete zimanise bukaabo tota buleta kucinca kwa mazimo ewulu.

•   “Ni saangite kuti twazwisa masheleñi a kutusa ku sinyehelo zibaletwa kucinca kwa mazimo ewulu,” mwa bawambili António Guterres, mukulwana wee Nkopano ya Macaba (United Nations), kali 19 November 2022. “Kono twiizi kuti aa masheleñi keete a manise bukaabo boonse . . . Ipulaneti yeetu yiina mu mwiikalilo mukukutu.”

•   “Hahanu cisi mwendi kacikopane ni kucinca ahulu kwa mazimo ewulu kweete kuame bantu boonse.”—Kuwamba Mary Robinson, mueteleli wakale wee nkaanda ya Ireland ni Mukulwana wee Ntukelo za Bantu mu Nkopano ya Macaba (UN High Commissioner for Human Rights), 20 November 2022.

 Bahya babilela ahulu zeete ni zipangahale kwi pulaneti yeetu kubusu. Nihakuba bulyo, kana inkaanda ziwoola kusebeza hamwiina kumanisa kucinca kwa mazimo ewulu ni kwizuzilikiza iyo nsepiso ya kumanisa kucinca kwa mazimo ewulu? IBibele Iwambanzi?

 IBibele itondeza kuti nihakuba kuti bantu balikataza ni kusebeza katata, inzwelopili yoonse yeete zipange inkaanda kumanisa bukaabo bwa kucinca kwa mazimo ewulu keete bumanise bukaabo boonse. Mubone mabaka oobele hakwiina bulyo:

•   “Cinyonzi kaciwooli kuwololwa.”—Muwambi 1:15.

   Intaluso: Mibuso ifokola kakuti bantu keena babahewa ziho za kuliyendisa. (Jeremiya 10:23) Nihakuba kuti inkaanda ziwoola kuwondinsana hamwiina, keete ni bawoole kumanisa bukaabo mu cisi, nihakuba kuti balikataza bule.

•   “Bantu ka balisake beene, basaka masheleñi, . . . Bakakanina ha mihupulo yaabo.”—2 Timoteya 3:2, 3.

   Intaluso: IBibele ibapolofiti ca kunepahala kuti bantu baangi mwi nako yeetu kababe balisaka abo beene ni basasaki kusebeza hamwiina kutusa bamwi.

 Nihakuba bulyo, mwiikalilo wiina hande wa cisi ceetu kawu zimene he nsepiso za mibuso ya bantu. ILeza abasali Muyendisi yoswanela wa cisi, Jesu Kreste. Kuamana naaye iBibele iwamba kuti:

•   “Mubuso kawube he heta lyaakwe. Mi kaa sumpwe Muelezi Mulotu, iLeza wee Ziho, Tayo wa Kamita, Induna wee Nkozo.”—Isaya 9:6, indaba za kuunsi.

 Jesu nji Simwiine wa Mubuso wee Leza, kapa muuso wa kwiwulu. (Matewu 6:10) Wiina ziho, wiina butali, mi usaka ku babalela ipulaneti yeetu ni zoonse ziina mwateni. (Lisamu 72:12, 16) Mwi Mpuso yaakwe, muuso wa kwiwulu kawu sinye boonse “basinya cisi” mi kaa sandule ipulaneti yeetu kuba meekalo malotu.—Kuzikula 11:18, indaba za kuunsi; Isaya 35:1, 7.

 Kuti mulitute ziingi kuamana ni mweete bumanisizwe bukaabo bwa kucinca kwa mazimo ewulu, mubale indaba yahe webbusaiti icokuti “Climate Change and Our Future—What the Bible Says.”