MUZWIILE-HABUSU KUTONDA!
Kana Inkoondo ya Cisi Coonse Ciina Hafwihi ni Kutanga?—IBibele Iwambanzi?
Mu zilimo zilikana 30 zicizibahiti, buungi bwa bantu babalizuwi kuti cilikani cee nkaanda mu cisi coonse cibali kukolete ahulu. Kono, zibapangahali hahanu zitondeza kuti ka njimona bulyo.
“Buungi bwa bantu babilela kuti inkoondo ya Gaza mwi letise bukaabo ku nkaanda ziina hafwihi ni Isilayele ni Hezbollah heba ni batanga kulwiila ku museto wa Lebanon.”—Reuters, 6 January 2024.
Hape inkaanda ya Iran ciyatanga kupanga ma nyukiliye, kuweela hezo Russia ni China ciba wondinsana ni Iran. Iyi ndaba iletise mifilifili ku nkaanda za kwa Wiko The New York Times, 7 January 2024.
“Russia ikweete kuletisa isinyehelo zikaando mu zibaka ziingi za Ukraine.”—UN News, 11 January 2024.
“Inkoondo iwoola kubuka ca buhuba cebaka lya kukula kwa cifumu ni cisole ca China, indaba ya Taiwan ni miseto yaayo, ni kusawondinsana kwa China ni Amerika.”—The Japan Times, 9 January 2024.
Kana IBibele iwamba cimwi kaza kusaaba hande kwa miikalilo mu cisi kutu bweene suunu? Kana iyi miikalilo kayiletise inkoondo ya cisi coonse?
IBibele ibapolofiti za miikalilo yiina kwateni
IBibele keena ibapolofiti ca kupunda mazina e nkaanda zikweete kulilwisa suunu. Kono, ibapolofiti za kwinjiha kwe nkoondo mu nako zeetu kuti izo “kazizwise inkozo mu cisi.”—Kuzikula 6:4.
Imbuka ya Danyele ibapolofiti kuti “mu nako ya mamanisilizo,” mibuso yiina ziho kayizwiile habusu “kulipumba,” kapa kulwiila kuyendisa cisi coonse. Uko kulilwisa kuama kutondeza ziho zee mpi ya masole baabo ni kulitusisa “maluwo,” kapa masheleñi maangi.—Danyele 11:40, 42, 43.
Inkoondo ikezite
IBibele itondeza kuti miikalilo mu cisi kayibe mibi ahulu pili niuseeni kuba hande. Jesu abapolofiti kuti “kakube ni bukaabo bukulu buseeni kubonwa kuzwa nshimuluho yee cisi kwiiza kusika mwe yiinu nako.” (Matewu 24:21) Ubo “bukaabo bukulu” ka buletise inkoondo ya Armagedoni, inkoondo italwiswe kuba “inkoondo yee zuba ikaando yee Reeza wa Ziho Zoonse.”—Kuzikula 16:14, 16.
Kono, inkoondo ya Armagedoni kayihaze bantu, insini ku basinya. Ceyo nkoondo, Ireeza kaa manise impuso ya bantu, iletise inkoondo zikweete kuleta isinyehelo ziingi. Kuti mulitute za Armagedoni mweete iletise inkozo isamani, mubale indaba zicilila: