Kuhala ca Kusalya Inyama—IBibele Iwambanzi?
Mu cisi coonse, buungi bwa bantu cibasaka kuhala ni basalyi inyama.
“Buungi bwa bantu suunu cibeena muboneno ni muhalilo wa kusasaka kulya inyama, kusanyandisa zinyolozi kapa ku zilitusisa sina cilyo, zizwato kapa mwi nzila zimwi.”—The Vegan Society.
Bamwi bantu kabalitusisi ziintu zizwa ha zinyolozi insini cee baka lyakuti batokomela zinyolozi, kono cee baka lyakuti basaka kusileleza ziintu zihala, kuba ni makete, kapa cee baka lya cilumeli.
“Kusalya inyama kushutana ni nzila zimwi za kusala za kulya kakuti bantu bahinda kuba mufuta umwi ntumelo, inkatulo ya muhalilo, ni nkatulo ya buntu ya kutusa kuti cisi cibe mu mazimo eena hande.”—Britannica Academic.
Kana kusalya inyama kuwoola kutusa cisi kuba hande kubusu? IBibele iwambanzi?
Mubumbi weetu mwa hindila bantu ni zinyolozi
IBibele itondeza kuti Mubumbi weetu, Jehova iLeza, a uhinda bantu kuba ba butokwa kuzamba zinyolozi hape uhele bantu kubusa zinyolozi. (Matangilo 1:27, 28) Kuzwaho, iLeza uzuminine bantu kulya zinyolozi. (Matangilo 9:3) Nihakuba bulyo, kaa zuminine bantu kunyandisa zinyolozi.—Inguli 12:10.
Kuya cee Bibele, muntu ni muntu uwoola kusala kulya kapa kusalya inyama. b Kulya inyama kapa kusalya kakuwooli kuama mwa tuhindila iLeza. (1 Bakorinte 8:8) Kakwiina yoswanela kunyansa zumwi hakwiiza he nkatulo ya za kulya.—Baroma 14:3.
Zeete ziletise kuti buhalo bube hande kubusu
IBible itondeza kuti muhalilo utulisalila kuba naawo keete ni ucince bukaabo bwiina mu cisi. Buungi bwa bukaabo bubakopana naabo bantu bwiina mwi politiki, muhalilo, ni mwiikalilo wa mu cisi, usawooli kulukiswa. IBibele iwamba kuti:
“Cinyonzi kaciwooli kuwololwa.”—Muwambi 1:15.
Mubumbi weetu kaa manise bukaabo butukopana naabo. IBibele ilitusisa ciwambo cee nswanisezo kutalusa zeete naa pange.
“Mi cinabona iwulu ihya ni cisi cihya; kakuti iwulu lyeentanzi ni cisi ceentazi zibamani, mi iwate kalisikwiina.”—Kuzikula 21:1.
ILeza mwayolise mubuso wa bantu ca Mubuso waakwe, kapa “Iwulu lya kale,” cee “wulu inhya,” Impuso ya Mubuso wa kwiwulu. Mubuso waakwe kawuzwise “cisi ca kale,” kutalusa bantu babilala, ni kubusa hewulu lya “cisi cihya,” kapa bantu basaka kuhala ca kubusiwa kwaali.
Mu mpuso ya Mubuso wee Leza bantu kaba litute kuhalinsana ni zinyolozi ni ziintu zimwi zibabumbwa.—Isaya 11:6-9.
a Jehova nji izina tota lye Leza.—Lisamu 83:18.
b IBibele itulayela “kulihambusa . . . ku malaha.” (Zicitantu 15:28, 29) Ico citalusa kuti katuswaneli kunywa malaha kapa kulya inyama iseena yee tilwa malaha; hape katuswaneli kulya zilyo za biikwa malaha.