Bukaabo bwa Kulizuwa Buzunzu Bwinjihite—Ziwamba iBibele
Kuya cee mpiho ibapangwa mu cisi coonse, a muntu yeenke mu bantu beena 4 ulizuwa buzunzu.
“Kusaaba ni balikani, kuwoola kuama zumwi ni zumwi ibe kuti uhala kuhi kapa wiina zilimo zikumahi.”—Chido Mpemba, mutusi ku mukulwana wee Nkopano ya Makete mu Cisi Coonse he Ndaba za Cilikani (World Health Organization’s Commission on Social Connection).
Kucincana ni mubahupulela buungi bwa bantu, kulizuwa buzunzu kakuami feela bakulwana kapa bantu beekele boonke kono kukopanyeleza ni bahwile, bantu beena makete hande, bakondisa mu buhalo, ni beena mwi seso. Kusaaba ni balikani ni kulizuwa buzunzu kuwoola kuama makete a muntu ku mubili ni mu maikuto.
“Kulizuwa buzunzu kaheena maikuto feela a kulizuwa bubi,” kuwamba Dr. Vivek Murthy, U.S. mukulwana wa madokota. Uekeza ca kuwamba kuti: “Mafu awoola kuletwa kusaaba ni balikani kapa kulizuwa buzunzu aswana ni mafu awoola kuletwa kufweba misanga yotombwe yiina 15 mwi zuba.”
Ziiwamba iBibele
Mubumbi weetu kasaki kuti tulikauhanye ku bamwi. Mulelo wee Reeza wa kuti bantu balikole cilikani cilotu ni bamwi.
Cikuka ca mwi Bibele: “Ireeza caati: ‘Ka kushiyeme kuti muntu azwiile-habusu kuba yeenke.’”—Matangilo 2:18.
Ireeza usaka kuti tube ni cilikani naaye. Utusepisa kuti kaa cutile kweetu heba ni tulikataza kucutila kwaali.—Jakobo 4:8.
Cikuka ca mwi Bibele: “Kusaanga kwa bantu balemuha kuti basaka zee Reeza, kakuti Mubuso wa kwiwulu waabo.”—Matewu 5:3.
Ireeza usaka kuti tumulapela hamwiina ni bamwi. Kupanga bulyo, kututusa kuba basaangite.
Cikuka ca mwi Bibele: “Mi tutwaalinzane inkulo kuti tususuwezane kuba ni lato ni misebezi milotu, saanzi tukeshebisi kukopana hamwiina, . . . kono tususuwezane.”—Baheberu 10:24, 25.
Kuti muwaane indaba cakwiizula ibaka hakuli kwa butokwa kulihambusa ku buzunzu, mubale indaba yahe webbusaiti “Bulutu mwa Lifasi la Lipangaliko ze Ñata.”
a The Global State of Social Connections, by Meta and Gallup, 2023.