MUZWIILE-HABUSU KUTONDA!
Mu Cisi Coonse Impiho Zitondeza kuti Cikuhisa Ahulu—IBibele Iwambanzi?
Mu mwezi wa July 2022, mu cisi coonse impiho zitondeza kuti cikuhisa ahulu:
“Unu mwezi China ilemusa bantu baayo lwa bubeli mu mileneñi yiina 70 mweete kuhise ahulu.”—25 July, 2022, Impiho ya CNN Wire Service.
“Cebaka lyakuti mwa Europu kubanga ni nako ikuhisanga ahulu, kwiina bukaabo bwa ku bbukuka kwa mililo mwi nkaanda ziingi.”—17 July , 2022, Impiho ya The Guardian.
“Lensunda, mileneñi miingi ya mwa United States (Amerika) yiina mu mazimo akuhisa ahulu kuzamba mukuhisikizanga mu zibaka ziina ku mbali ni wate kwa Upa, inkalulo za Mbowela ni zibaka ziina hakati ka Wiko.”—24 July, 2022, Impiho ya The New York Times.
Zoonse zikweete kupangahala zitalusanzi? Kana cisi keete ni ciwoole kuhalwa bantu hape? IBibele iwambanzi?
Kana kuhisa kwizuzilikiza bupolofita bwa mwi Bibele?
Inkalabo nji eeni. Kuhisa kuama cisi coonse kutondeza ziibapolofiti iBibele kuamana ni nako yeetu. Ca mutala, Jesu abapolofiti kuti katubone “ziintu zitiiza,” kamba “ziintu zikomokisa ni kutiiza.” (Luka 21:11; intoloko ya Good News Translation) Kuweleka kwa kuhisa kwa mazimo a cisi kutiizize baangi kuti zibakweete kupanga bantu ka ziletise kuti cisi kaanzi cihalwa bantu.
Kana cisi keete ni ciwoole kuhalwa bantu hape?
Inkalabo nji nee. ILeza ababumbi cisi kuti ibe muzi wa bantu kuya kwiile. (Lisamu 115:16; Muwambi 1:4) Insinyi kusiilila bantu kushinya cisi, iye “kaa shinye bashinya cisi,” sina mwa sepiseeze.—Kuzikula 11:18.
Mulolisise bupolofita boobele butondeza zimwi zaa sepise iLeza:
“Muzuka ni nkaanda iseena menzi ka zisaange, Mi inkaanda iseena menzi kayi kondwe ni kutubula impalisa.” (Isaya 35:1) ILeza keete asiilile cisi kusanduka cibaka cisahalwa bantu, kono mwa cibozekeze mu mwiikalilo wiina hande.
“Ubabalela cisi, uciha kuti cibe ni zicelo ziingi mi ucinunisa ahulu.” (Lisamu 65:9) Cee mbuyoti za Jehova, cisi kacibe iparadaisi.
Kuti mulitute ziingi za kwizuzilikizwa kwa bupolofita bwa mwi Bibele kuamana ni kucinca kwa mazimo ewulu, mubale indaba yahe webbusaiti itakuti “Kucinca kwa Mazimo Ewulu ni Buhalo Bweetu Kubusu—Ziiwamba iBibele.”
Kuti mulitute ziingi ziisepisa iBibele kuamana ni kubozekezwa kwa mwiikalilo wiina hande, mubone indaba yahe webbusaiti itakuti “Njeeni Yeete Abooze Cisi Kuba mu Mazimo Eena Hande?”