Kakusasani Lamande, kali 10 October 2022, mamisaelo (missiles) a Russia abadami mileneñi ya mwa Ukraine kuyolisa misuha ku nsinyehelo ziibapangi Ukraine mazuba oobele ku masule kwi bbiriji ya butokwa ahulu inunga Crimea ni Russia. Izi ziintu zibapangahali inakozana mapolitisheni habalemusa kuti kaku pangahale Armageddoni.

•   “Hanu citwiina ahulu hafwihi ni Armageddoni siina mukubekalile mwi nako za [Purezidenti wa Amerika John F.] Kennedy ni Bukaabo bwa Mamisaelo (Missile) a Cuba. . . . Kanihupuli kuti kuwooleka kulitusisa cilwiiso ca nyukiliye (nuclear weapon) cee nako iswana muntu naa saleti Armageddoni.”—U.S. Purezidenti Joe Biden, 6 October 2022.

•   “Nizumina kuti hahanu katwinjile mwi nkoondo ya Armageddoni, ubu kabube bukaabo ku cisi coonse.”—Purezidenti wa Ukraine Volodymyr Zelensky, habuuzwa ziwoola kuzwa mwi nkoondo ya kusebelisa zilwiiso za nyukiliye (nuclear weapons), BBC News, 8 October 2022.

 Kana kusebelisa zilwiiso za nyukiliye (nuclear weapons) kakuletise kuti kube ni Armageddoni? IBibele iwambanzi?

 Nee. Liinzwi lya “Armageddoni” liwaanika bulyo kaa mwiina mwi Bibele kwiñolo lya Kuzikula 16:16. Iyi nkoondo kayiami ku nkoondo mukati kee nkaanda kono ku nkoondo mukati kee Leza ni “basimwiine bee cisi coonse.” (Kuzikula 16:14) ILeza kaa litusise inkoondo ya Armageddoni kumanisa bubusi boonse bwa bantu.—Danyele 2:44.

 Kuti mulitute ziingi kuamana ni Armageddoni mweete iamine cisi coonse, mubale indaba yahe webbusaiti icokuti, Inkoondo ya Armageddoni Ciintunzi?

 Nee. Nihakuba kuti babusi ba bantu mwendi bawoola kulitusisa zilwiiso za nyukiliye (nuclear weapons) kubusu, ILeza keete naa zuminine cisi kushinywa. IBibele icokuti:

•   “Cisi ciikala kuya kwiile.”—Muwambi 1:4.

•   “Bantu bashiyeme kabayole cisi, mi kabahale mwateni kuya kwiile.”—Lisamu 37:29.

 Nihakuba bulyo, bupolofita bwa mwi Bibele butondeza kuti ziintu zikweete kupangahala zitondeza kuti hahanu kakube ni ncinceho zikaando ziseeni kubonwa mu buhalo bwa bantu. (Matewu 24:3-7; 2 Timoteya 3:1-5) Muwaane ziiwamba iBibele kuamana ni buhalo bwa kubusu mwi ntuto yee Bibele ya kuwambolinsana isalihilwa.